YOBU 18 - Biblía Axweesantá Hhohho' ar Mungú 2004

Mu/aywatstá Bildadi

¹ Aluuwo Bildadi kuduú Shuhitmo guri mu/aywaáts, iri oó',

² «Ta axweemaamis ay xaylá? Bar mak lakita atén toorén geera ngi ooaán.

³ Kuúng baré atén tina adór hikwa tléhh, atén tiwa ara'aan a adór daktana.

⁴ Kuúng tin tawo kilók karslamís as muneerók, kuunge yaamu hotaawo kin máya as muneerók, laqaá kuunge Mungú tlom'i gin loohatísi?

⁵ «Aasla'áy, heé tlaákw aqo in hardah alhhe'eesoó tlaákw, nee gufuú asltós i gwa/aatiiká.

⁶ Tsaa'astá do'ós a giwti, tsaa'astá amoorós i gwa/aat ka gaas.

⁷ Bir hi'iimiit ya'aawós kudá' i kwakwaahhi kin ilaa/, kuri daahh nee muruuwós kudá' aa qoomeemeés.

⁸ Ya'aawós awa kilá' nguri baraá tsaaxweelírií huwiyá', umuúqo bir hi'iimiit aqo bohoongw gun harasliqiit.

⁹ Tsaaxweeli gun koolo ót, /akwseeyi guri nagwáhh.

¹⁰ Himuú tsaaxweeli kwaa luú/ baraá hhape tsaaxweeli kaa qaás baraá loohirós.

¹¹ Kun dae tlaaq badu sleémeero ar daér hhamhhám, umuú qoomaaro dae gan ar hoot.

¹² Geeraawo i mak /uuruú kón, ala hám daxta qwari gwaa tsamemeé', gwa'ara gwa haranaká/ as nguwa gwaangwara'.

¹³ Tiqtír tlakw kaahartós gaa fák, tiqtír gwa'ara diqiyaawós gaa aleetsát.

¹⁴ Kun hingees baraá do'odá' aa harahhifór i qaasi, kun huuw amór doó waawutmoó dae tlaáq.

¹⁵ Do'ós kudá' kaahaár, múk hatlá' baraadá' gini hotaá áy, Didií hooti kaa gufér ásltár tsataát.

¹⁶ Inós a adór xa'anoó dee/aruuwós aa kah, nee haleemiiwós sleeme gawto naa kahiyé'.

¹⁷ Gawaá daanduú yaamuwo heé inós gu insláw i kaahh, tam umuuwós ku baloó ooiiká.

¹⁸ Kwa hingeés baraá gwa/aateemaawo, kuri kwaáhh baraá giwti, kuna guús kway saweés gawaá daanduú yaamuwo.

¹⁹ Na/ii nee na/aá naango gi konká, heé aa meet baraá do'ose i kaahh.

²⁰ Iimír da/aá wa oohang ay /uwa mukdá' sleémeero kangós gwaa axaas tan ló'wa waa/oo/, tari da'ayuut.

²¹ Looeemaawo muruuwí mukdá' Mungú da'ayuumitaaká gu sláy. Diirí an dír múk Mungú gu hhaslitaaká ku sahariím.»