YOBU 17 - Biblía Axweesantá Hhohho' ar Mungú 2004

¹ «Aníng aga diqay tsatiít, deelor'eé' aa fák, /aantar'eé' kaa amohhe'eés.

² Looeemaá kilae múk aníng i niqiím iga harweér, niqay'ín i tsee/aá /awaak.

³ Aá Mungú, na'amaamís, án daanda ooháng, ni tu/uút, heé hatlá' oo i daanda óh i kaahh.

⁴ Kuúng mulqer'eé' aga fuquraangw waslés, gím na'ás, daxta aníng miwa arba/iyé'.

⁵ Heé mulqeerós ga geewaqaqtiím ar peésa, na/iiwós i ila' bo/aa/ayá'.

⁶ Dír geeraá muko, aníng taa gár qaseengw tleéhh, aníng a heé ta i nitsimiiti.

⁷ Slahh'amuuwo ilaaeé' naa maa/utiyé', ana kanga/uút niri xwatsi tleehhiít.

⁸ Múk gan'amuú koóm slahh'amueé' burkwa ár tan xamaa', nee múk tlakweemaá koomaaká aníng in bibisiná', adór heé Mungú gu xuaaká wa ale.

⁹ Tam adoorihe, heé ganaá', aqo gan'amu gun ar hoot, heé muruú hhó' tlehhiít /uuru gu ló'wa sláy.

¹⁰ Ala tam kuungá' sleémeero hardaharé' dír geeraaeé', aníng tam heé wák oo sagaloó' oo ni slaw axáy deéro.

¹¹ Deelor'eé' aa fák, kangw'eé' kudá' naa qoomeemeés aa hhitiruút, harahhifor'eé' aa payshút.

¹² Dír mulqer'eene xweera a tlaatla/aangw bareemák kwaáo an ooána gwa/aateema i baraá giwtisíng wa dayá'.

¹³ Barnaxes gi'i ina dír hotangw'eé' tleéhh barnaxes qatanir'eé' aga hhaáf baraá giwti.

¹⁴ Aníng barnaxes /aanta ana baabuúeé' báw nee naanaga an aayír'eé' laqaá hho'or'eé',

¹⁵ daqaní harahhifór naa aniíngí met a gaalá? Heé harahhifor'eé' tí ga ár a heemá?

¹⁶ Harahhifor'eé' nee aninge an /eetána baraá gi'i? Tsaraawo ti alkoomána ay baraá hhape?»