YOBU 16 - Biblía Axweesantá Hhohho' ar Mungú 2004

¹ Yobu giri mu/aywaáts,

² iri oó', «Ar yaariir aga axamaamiís, gurkwa/amisuuhúng i slahh'eemiis.

³ Alhhe'eesoó boqondaahúng kwisingá' a xaylá? Laqaá gár nu a'aw i deéro ar axweesantí kas tlaxuunda'?

⁴ Aníng geera bar kuungae, nee kuungá' bar aninge, muruú adór kusuú kilá' ni daanduueé' kata' aníng sleeme geera uqo aleesláw ooaro daandeemohúng i ale, nee sakw'eé' nguri dingiís.

⁵ Geera nu alee/iís baraá axweesantahúng tisinge, axweesante'eé' ar gurkwa/asa geera kuungá' nu gurkwa/ás.

⁶ Ala aníng tam axweesa alee/isoó ni slaslaw i kaahh, nee tam bara xasliiti, dimbé iqo káhh.

⁷ Looeemaá kilae Mungú iga slahh'eés, muk'eé' sleémeero gwa hhaamiís.

⁸ Inós aníng iga nuuqúy, adoorí an adór ira aleesláy. Ham daxta slaqwte'eé' aa kaangaa/út, nee inós aníng in lamabu'ún.

⁹ Mungú aníng ina karslamiís ar buhhtaawós, iri aáhh, ina sihhnií qiriritlimiís, wakusmooeé' iri ilií duxún.

¹⁰ Muu aníng i niqimis, nee tin waaqaseesén, taa i burumburiít ti tlaaqarma' muux.

¹¹ Mungú aníng iga qás baraá dabaá múk xaraásl, nee iga kwáhh baraá dabaá múk tlákw.

¹² Qoomár aníng niwa waydúr hoot, Mungú aníng iri karslamiís, ina isa óh iri karslamiís, inós aníng ina adór gaangeeirós tleéhh ar i duquusi.

¹³ Ina tlaquút ar maheeri badu sleémeero. Gurtleemu wasleero gumbayayáueé' guri tlaáq, saaxir'eé' sleeme iri yaamií wá/.

¹⁴ Ina giqáy, iri tlir'imaamiís, ina adór slaqwaruusér wá i haratlatláy.

¹⁵ Aníng guniyadu iga tsiít as niwa tsuunqumiis, taa qaroó baál, aga iwiít baraá hhape.

¹⁶ Gitse/aeé' naa daa/atuyé' as /aa/e, hhamhhamaá ilaaeé' niri bo/aa/ayé'.

¹⁷ Ala slám aníng gár tlaakw ar naa tleéhh i káhh. Firor'eé' dír Munguhe ka hhohho'.

¹⁸ Aá hhapaá yaamu, tseerer'eé' ar taa ku'uús ma baloó lu/aara', /aa/e'eé' ki axaasi umuú diiro

¹⁹ Aníng a ló'wa xuú', lamabu'usmooeé' i gawaá doori. Oo aníng i aleekal/aám i gawaá doorí dirii'.

²⁰ Mulqer'eé' aníng i waaqaaqá', hhirhheerieé' naa ku'uutiyé' as Mungú nguwa fiririim.

²¹ A tsiní geera hee bar aníng i aleekal/án dír geeraá Munguhe, adoodá' gawaá daanduú yaamuwo muu i /imamiisi.

²² Ar ló', kureerieé' ki niina, aníng a tláw amoodá' muu niwa kaaki/iiká.