YOBU 15 - Biblía Axweesantá Hhohho' ar Mungú 2004

Wa'aá tsár awa Yobu nee mulqeerós tiwa axweesani tlaxuné'

¹ Aluuwo Elifasi kuduú Temanmo guri mu/aywaáts, iri oó',

² «Ahaá, heé sagalooár koóm axweesani gan mu/aywátsi ar barawaslaay? Ahaá, gár iwa hatsi a boqondaá tawoóro?

³ Ahaá, heé sagalooár koóm tin aleekal/ána ar axweesanoó gana'aaká. Laqaá ar axweesantá amoowásle?

⁴ Ala kuúng ilaiwa/amér Mungú an waaqaaqá', nee sluufmisuú Mungú un ila/aán.

⁵ Afkók ugwa tlakweemaá intsaahhatís Kuúng iimi aga náxw ar afkók kwisíng.

⁶ Axweesantók ar kilá' kuúng una sakí/, a aningeeká, /Aymi'iiwók kuúng un lamaabu'uná'.

⁷ Ahaá, kuúng an heé geeraáwo xwaylaro baraá daanduú yaamuwo? Qoomár Mungú tlom'i ngiwa tlehhiiti kuúng a deéro?

⁸ Kuúng baraá kwasleemár Munguhe iia aga qási? Laqaá heé sagalooár koóm an kuúng kilóge?

⁹ Gaarí kuúng ta ló'wa xu' atén ta xuanaaká a milá? Umuú gár kuúng ta xua ar atén tiwa qaambaál i deéro?

¹⁰ Baraá tla/angwrene bariisér uren ar sage al/awtani i deer, inooín a bariisér uren ta baabuúwoge.

¹¹ Ahaá, gurkwa/asár Mungú kuúng ur gurkwa/amisi i gaa buabu'káhe? Laqaá axweesantós ar tsatsa'areema kuúng an gaárí xu'káhe?

¹² Bareemák muunu ló'wa gaamiis nee ila' ngari duxuún,

¹³ tam Mungú kuri qítl si'iimaawo nee /ayma'aá tlakw awa adór kwisingá' kiri qítl ooaro.

¹⁴ Hee a gár milá tam kuwa gan'ámkwí harafaari, laqaá heé /ameeni aa laqwál iqo baloó gan'amuú kóna?

¹⁵ Bar Mungú mukós kudá' hhohhó' sleeme gun hharahhifiiká, tam sleeme doori dír geeraawose kin hhoohhooeeká.

¹⁶ Hee nee slasla/aruuwose nee hhituru'uumarose mi máy. Heé qo tlakweema dirose adór ma'aá wahaangw.

¹⁷ Axáy daxta aníng iiárií qaasáng, muruudá' naa ár ngu oó' nee ngu laqaám.

¹⁸ Intsaahhtimisuú múk sagalooár koóm, muruú bariiser'ín aa duquundiiká,

¹⁹ mukdá' kilooín Mungú aa yaamií haniís, tam hoomoó baraá tla/angw'ín ar waaraáhh i kaahh.

²⁰ Tlakusmo deelo sleémeero aqo in hoot ar slahh'amaaye. Heé sagagawít in hoot ar slahh'amaaye baraá kureeri sleémeero awa hotaangose.

²¹ Afór de'e tlaaq i baraá iaawós wá tseeamiín. Qoomár iwa diihhe'eés fisuuse gun haraadát.

²² Tlakusmo harahhifór ti'inángw baraá giwti ga konká, alhhe'eesaywo aqo kun gaas ar paánga.

²³ In toongaanuus amooqá' nee tiqae as muruú /ayma leelehhit, iwa kaahi, ‹Kár i amá?› Asma ga xuu' adór gwa'araaro iwa /uy iqo káhh.

²⁴ Da/a/amoó slahh'amaaye gun dae tsaat, adór heé slaqwaruusér waawutmo aa i haraatleér.

²⁵ Asma dakós guna looloqoós amór Mungú, iri qiítl Munguú Aleesleemusmo si'imaawo.

²⁶ Ina haraatláy ar ti'íngw daara/aangw, bartaqae i gaambór guhhér yaariír kón.

²⁷ Tam /uuntle'eeri gaa laláy, qwas/amay guna slaslaáx gawaá afeetlo.

²⁸ Ala inós ina hoót baraá gixsadaá muu iwa goów nee baraá taangu, maraá taa haraxuú' tawa ufuú tsa/eewasi.

²⁹ Heewí i baloó daqaari'iitiiká tam daqaari'iimarós i baloó sihhitiká gawaá daanduú yaamuwo.

³⁰ Adór iwa pa/i gwa'araro i káhh, inós a adór xa'anoó harma/oorós tsángw asla aa kahaás, nee /ayoorós fur'a ganar tlatleér.

³¹ A tsiní birta kilós máy al/agooro nee muruú daktu'uuma harahhifooro. Asma daktu'uuma an slasláwaarós.

³² Bu'utuuwós kun qoomees dír ira gwaaiiká, nee xwaylarós i yaeemi tleereská.

³³ Inós tari adór sabiíbuú mamaá /eetlá' slaslaáx, nee adór seituúnír /ayoorós paahhamiis.

³⁴ Kudá' sleémeero Mungú ngu da'ayuumita'aaká, na/ii ngi slay'aaká. Asla maraá múk slukmadaá /aa/aáy gi qororo'ós.

³⁵ Kuká' al/ayma ngi tsihiyá' nee tlakweema ngin laqwaliyá', baraá muner'ine gár hatlá' i káhh aqo har lameemo ngin qoomeemeesiyá'.»