YOBU 14 - Biblía Axweesantá Hhohho' ar Mungú 2004

¹ «Heé /ameeni aa laqwál, Deelór hotaawós ka ureeká, slám in hoot ar slahh'amu.

² In adór /aamiito'ór wa gaanslár uráy, iri gwaa', In adór mahhatír wa gaanslár ta'aaín, iri kahhuut.

³ Aá Mungú, gár hee kus adór gár kilá' wá ii qaytsit a milá? Gár nee inós tis afo tlaxuundá'?

⁴ Heé gár hhoohhoo' ngi baraá gár slasla/aár wa duúx a heemá? I kaahh tumu wák.

⁵ Deelór hotaá hee kaa qoomeés, Aá Mungú, kuúng faarór slahheeriiwós aga qoomés. Hartsatangwdá' kuúng taa qás gu waaraahhiiká.

⁶ Na'ás ala bihhi qaytsiteek, maweek, as kahhó' deeloorós masók ga saqwalalaa/ adór heé bu'utuú tlaatla/ángw wák.

⁷ Asma xa'ano burkwa tsaát, harahhifór niwa ti'iiti i deer, i ya/án niwa male harma/i.

⁸ Tam dee/aruuwós baraá hhapeero i dina, tam i baraá hhapeérí slupuuti,

⁹ ala tam niitsamaá ma'aay bir nga sláy, niqo harmaa/, haleemiiwós niri harma/iyá'.

¹⁰ Ala hee bira gwaá' i baloó kí/i? Hhiintla burngwa sa tsiqiít, gár aa met a milá?

¹¹ Adoodá' ma'aay baraá tlawto nir /ona', nee yaae ir /oon,

¹² an adór hee ir gwaai, iri baloó sihhitiiká, Ay dír doori nay ilaáwá qwaariya' i tlayká, sleeme ku gwarangwariiká.

¹³ A tsiní geera bar iga lú/ baraá gi'i, tay qoomár muneerók i pu'ut. Ay dír qoomaadá' naa hanís i fak, nee iri insleér.

¹⁴ Ahaá, hee bira gwaá' i male slafíngwí kí/i? Deelo sleémeero ar gadiyér'eene un daám ay dír afiqoomár gweermor'eé' i xeer.

¹⁵ Daqaní geeraawo aníng kuúng iri atét nee aníng niri ooiím, kuúng aníng bir artá wá slá', anuú gadiyér dabaawók.

¹⁶ An qoomár kuúng aníng iwa ya/ati del, nee tlakweemaaeé' kiwa meer fadituuwo.

¹⁷ Tlakweemaeé' geeraawo iga baraá tlakwáy hara tsék, kuúng geeraawo dakuúsar'eé' aga tuuntúk.

¹⁸ Ala tlom'i i huhu'uná' tla/aá uren dír kiteeri'ine i tu/umitiyá'.

¹⁹ Adór alwuór ma'aay ir tla/aá hhaslaaslit, an adór tluwoó úr ir yaamaá feehhamaamis, an adór kuúng harahhifór muu kar gaamaamis.

²⁰ Kuúng hee un dáhh kuri hhaamís ay kureeraá kureér. Gitsee/aawós in warqés kuri kwáhh amór saaw.

²¹ Na/iiwós birka ilaiwaá/, inós gár i xui i káhh, birka daáhh inós gár i ara'ari i káhh.

²² Aqo har slahh'amuú slaqwtós gun tsatsahhán nee liitlakweerós gari sa tsuunqumiis.»