YOBU 13 - Biblía Axweesantá Hhohho' ar Mungú 2004

¹ «Qaytsité', muruusíng ilaa'aá kilae ugwa ár, iaá kilae ugwa axaás, nguri tsaáhh.

² Mura' sleémeero oo kuungá' ta xua', aníng sleeme u xuú', a kaahaaká aníng an garkar tawo ta kuungae.

³ Ala aníng geera a slaá' nee Munguú /uuruú koóm tawa axweesaan, a slaá' tiwa dír geeraawós wá aleekalaa/.

⁴ Kuungá' lama an slikiindá' ar di/i, kuungá' sleémeero a qwaslaarér gaa wasl.

⁵ A tsiní ló' geera bara xaslité', daqaní taqo ooi i sagalooár koná'.

⁶ Gimsé', kangw'eé' kwí iiárií qaasaak. Aníng birti aleekal/aám iiárií qaasaré'.

⁷ Kuungá' ka xua' bar lamtá katá', adoosinge Mungú un sagadiyusá'a? Kawa xua lama bar katá' in dirós wa hariínda?

⁸ Kuungá' kwaáo hám an Mungú sla'á'a kuwa aleeaeera'? U aleekala/á'a dír geeraá kwasleemaro?

⁹ Alók bar nun tsee/aarina, geera kuungá' a /uurá'a? Ka xua' kuungá' Mungú u adór múk wa al/agá'a?

¹⁰ Kuungá' naxooro nu ii gahhaat barnaxes barqaanti aga tlehhé' ar naaqo.

¹¹ Tam uraywós u da'ayuumita'aakáhe, tam sleeme a kwislmita'aakáhe as inós?

¹² Axweesantahúng ar sagalooa a da/arár tawo. Aleekal/angwhúng a adór baquú baa/í.

¹³ Xasliité', án a ilaawáts, gaasíng aníng i slaw i sleer.

¹⁴ Aga ya/aám tam slafingw'eé' baraá tsaxwií dahaasaro.

¹⁵ Mungú bar aníng i gaasár wa slaa' i gaasi, Aníng harahhifo a koomaaká, tam adoorihe aníng ti aleekalaá/ dír geeraawose.

¹⁶ Adoorí bara aleesláw, daqaní arba/ti aga sláw. Asma heé tlaákw dír geeraawós gi kayká.

¹⁷ /Aymi'iieé' kuká' ló'wa iialooeesaak, axweesante'eé' tí muneérí oohaak.

¹⁸ Kwasleemar'eé' aga ló'wa iislaáx ar ló' a xuú', dakuús a koomaaká.

¹⁹ Heé axweesante'eé' tí ga sií' a heemá? Aníng ti amoohhoó' niwa xasliit tam niwa gwaa'.

²⁰ Munguúeé', muruuwí tsár kilós haniisang, aníng daqaní a nahhaataaká dír geeraawoge.

²¹ Gár geera a ti, na'ás dakók kwí aníng ira sláhh ar ki/eek, nee na'ás mi gaasaar ar de'ee tlaquuwók.

²² Axweesantók iimu/umang ooaro, aníng ngi mu/aywaáts, laqaá aníng te'eé' ngi iimu/uúm oiingo, kuúng ngi mu/aywáts.

²³ Dakumisueé' nee tlakweemaeene a magá'? Na'ás dakuúsar'eé' nee tlakweemaeene ooang.

²⁴ Ahaá waáy, aníng misa baseehúp, baré daxta aníng ina adór wakusmoowók tléhh.

²⁵ Kuúng gitsór fur'aa i diingimis tsatto a slá'a? Laqaá muundoó fur'a ir tlatleer u alta'aiínda?

²⁶ Kuúng sakwasleemár xaraasl ngaa daanduueéní tsa/ás, nee tlakweemaaeé' awa iimír masoombi'iima ngaa gawaaeé' tsa/ás.

²⁷ Ya'aaeé' iga tsék ar piíngu, digir wakeetingw'eé' sleémeero un tsee/aariín, nee ugwa harki/isáy qás.

²⁸ Aníng an suwawa'aát a adór xa'anoó aa slupuut, a adór tlawuú tlúsá aa /aáy.»