YOBU 12 - Biblía Axweesantá Hhohho' ar Mungú 2004

Mu/aywatstá Yobu

¹ Aluuwo Yobu guri mu/aywaáts, iri oó',

² «Kahhoo', án aga axaás, kuungá' sagalooa a koondá' sagalooa iqo kahhút kuungá' bara qatlé'.

³ Ala aníng sleeme xu'uti a koóm adór kuungá' wa ale, a kaahaaká aníng an garkar tawo ta kuungae, tidá' sleémeero taa aaiindé' muu ga xuu'.

⁴ Aníng aga gár waaqaseengw tleehhiít dír mulqer'eene. Anínguuwí Mungú ugwa firiim iri mu/aywaáts, anínguuwí gan'amuú koóm nee oo xaslxaansli wásl aga gár ta waaqaseesen tleehhiít dír muko.

⁵ Heé baraá palaaxi tsuunqumis gu waaqaqaa', tsuunqumis deelo sleémeero oo múk baraá slahh'amu.

⁶ Hotaá malguuse i wayduú koná', múk Mungú buhhtimís i hoot ar saxareema, Munguúín an /uuruuín.

⁷ Ala axáy makaay yaahaseek, inooín kuúng uqo intsaahhatisiyá'. Áx tsir/o yaahaseek, inós kuúng uqo kángw beér.

⁸ Laqaá tam yaamu yaahaseek uqo intsaahhatisiyá'. Áx nee siyó axweesé' kaangw nguqo oo'.

⁹ Baraá muruusíng sleémeero gár ga xuaaká a gaalá adór AAKOÓ MUNGÚ muruusíng sleémeero ngura tleéhh.

¹⁰ Slafíngw umuúqo makiito'ooro i baraá dabaawós, slafíngw umuú hee i baraá dabaawós.

¹¹ Ahaá iia axweesani ga tsatsahhandaakáhe, adoodá' tsifraangw muruú /ayma ngur tsaqamin.

¹² Sagalooa i dír bariise, xu'uti i dír múk kureeraá yaariir gaa /aay.

¹³ Ala sagalooa nee aleesleemu awa Mungú. Inós a hara'ayusmo nee xu'utusmo.

¹⁴ Bira fe/iít, heé tleehharo ga aleesláw i kaahh, hee burngwa tseék, heé gweeraro gu aleesláw i kaahh.

¹⁵ Tluwaay burngwa ilaá/, age tin faak, tluwaay burngwa geemawa hhe'eés, alwuo ti fák baraá yaamuwo.

¹⁶ Inós /uuru nee sagalooaro gi kón, al/aymuuse nee kudá' ta al/agina sleémeero a kós.

¹⁷ Hara'ayuuse gan máy iwa /aankwetsúr hi'iimit Har'ohuuse gari daktu'uu'úy.

¹⁸ Hhartá waawuti'iima gan baraá dabaá waawitá wa hayóh, afeetler'ín gari tlabaá lawali'iimárí tseek.

¹⁹ Kaahamuuse gan máy iwa /aankwetsúr hi'iimit, nee múk /uuruú koóm guri daahh.

²⁰ Múk axweesani ga xuú' gun afe tseek, bariise gari sagalooa hayoh.

²¹ Múk urén gun mureekees, Múk aleesleemuú koóm gun /uureemo hayoh.

²² Iloodaá baraá giwti gin geehhooees, nee muruú baraá giwti ngun huúw baraá gwa/aateema.

²³ Xoordu gin urees giri hhaamiis gin bahh yaarees giri tsiyayaax.

²⁴ Sagalooár geeraharuusér muu gan hingees, gari baraá darmuú wá harweertamaamis dír loohi iwa kahh.

²⁵ Tari baraá giwtír wá dabár tararahhamamiit, tari adór oonituusér wa ta/amiit.