YOBU 11 - Biblía Axweesantá Hhohho' ar Mungú 2004

Axweesantá Sofari

¹ Aluuwo Sofari kuduú Na'amatmo Yobu guri mu/aywaáts, iri oó',

² «I qoondaaká axweesanoó yaariír kwí kuwa tawo may, xáy, heé axweesanaay yaariír tin laqána tawa heé dakuús wásl.

³ Ahaá pooqirók muu gu xasltísa? Nee barnaxes a niqiín, heé kuúng u mureekeés i káhhi?

⁴ Kuúng a kat, ‹Gár án ni kah a ló', eeít, dír geeraá Munguhe án ti hhoohhoó'.›

⁵ Hám alók geeraawo Mungú nin ilawaats nee axweesantók tisíng gari mu/aywaats.

⁶ Alók geera naaqór sagalooa ngi oo', asma inós xu'tír yaariir ga ló'wa kón. Xueek Mungú tlakweemaawók sleémeero gaa faariiká.

⁷ A aleesleéra naaqór Mungú xu'utiiro nee harki/isoó Munguúdá' /uuruú koóm u aleesleéra xu'utiro?

⁸ Uroó Mungú ina saweés ay dooriwo gawa. Kuúng gár ta aleesleer a milá? Sawemaá baraywo, gi'i gin harwaaraahh, kuúng gár xu'utiro ta alesleer a milá?

⁹ Qoomaywós tleenaango yaamu gi baa/ uroó bihheero tlawtadá' ur ga baa/.

¹⁰ Mungú barnaxes aa waaraáhh, hee guri tseek, guri sakwasleemuut, heé sií' a heemá?

¹¹ Mungú múk gana'aaká gu xuu', tlakweema birnga ár gi tawo mayká.

¹² Daktani bar fuquraangw ngu sleér a adór daqwaay hee gun laqwaal.

¹³ Yóbu, muunaáwók barnaxes u qwáts, dabaawók aqo in gáwtí tlés, Mungú kuwa firiin.

¹⁴ Muruú tlákw barnaxes do'oge i deer, sieek, ma ya/aamaar tlakweema niwa do'ók wa hootiya'.

¹⁵ Daqaní kuúng a geeraá mukwí ti'ít alkút i káhh, kuúng daqaní a sihhít ar pihhaay dír geeraá muko.

¹⁶ Slahh'amuuwók sleémeero kuri gunqaarés, bura insleér tari adór alwuór aa waarahh.

¹⁷ Hotaawók niri mi/mii/iyá' tsee/amuú /ametleemu ba/a, qoomár giwti baraá hotaawoge tari adór qoomár tsiraahhór looa.

¹⁸ Kuúng tari píhh, asma harahhifo a koón, kuúng tun xún, tari hungu/ús ar wayda.

¹⁹ An qát tam heé u naáxw i kaahh, múk yaariír alee/isaay guri dirók i firín.

²⁰ Ala múk tlákw ilaaín i maa/uutiyá', lohduuín sleémeero awa tar gowi niri qwaariyá', harahhifor'ín ar alhhe'eesaay tari gwa'ara.»