YOBU 10 - Biblía Axweesantá Hhohho' ar Mungú 2004

¹ Slafingw'eé' aa tlií/, wa/aa/ir'eé' an kángw kilá' wa káh, an slahh'eés ooaro.

² Mungú un baw, «Án mi sakwasleemutaar, ala na xu'utisáng gár án nee kuúng tis tlampa'amisaan.

³ Gadiyér dabaawók kawa waaqaqa' i qoónda? Aníng iwa baramaanus i qoónda? Kángw tlakuuse mus sla'atamis.

⁴ Ahaá ilaawók a adór kuqaá heéwo? Mura' adór kur ara'aan a adoodá' hee ngur ara'ári?

⁵ Ahaá deelór slafiingók a adór tiqár heéwo, nee kureeraá hotaangók a adór kuqaá heéwo?

⁶ Ahaá ala tlakweemaaeé' mis leelehhít nee dakuúsar'eé' mas xu'utír wa slá'.

⁷ Kuúng a xú' adór aníng nir tlakweemaá koomaaká nee aníng heé i tuú/ baraá dabaawoge adór ir kaáhh, kuúng a xú'.

⁸ Dabaawók aníng ina buqumbuquné' iri tleehhiyé', Ala baré daxta i gaamís?

⁹ Inslawiím, kuúng aníng ina tléhh ar hhape, hám daxta in male ki/ísa baraá hhape?

¹⁰ Ahaá a kuungeekáhe heé aníng iga adór ilwá wa tlorooq, nee oo iga adór di/tá /awák wá gawdeés.

¹¹ Slaqwtaeé' kari tléhh ar fadu nee kane, faduuká' nee kaneero kiri tuuntúk ar fu'unaay nee kaahari.

¹² Aníng ina slafíngw ar qeér nee sla'aarirók ar warqawaaká, ar harmagahhatoroge aníng wayda nguri sláw.

¹³ Ala hamí daxta aníng a xuú' adór qooma sleémeero kuúng aníng ir naaqo slahhtá slá'.

¹⁴ Ana daán kawa aan, xadaa xáy aníng tlakweema i tleéhha, as kahhó' aníng gurtleemuwo iwa si',

¹⁵ Aníng barnaxes a tlakusmo, tsaxwaaeé'. Nee aníng barnaxes a gan'amuú koóm, ti kilooeé' diidi'iisaaká, asma aníng slahh'amuueé' bura i qaytsiít a murumiít.

¹⁶ Sakw'eé' bura gáwtí tleés kuúng aqo adór diraangw, aníng in iimu/uún slaktuuwo, aníng iri slahh'eemís waa/oo/amorók ngiri laqaán.

¹⁷ Umuú qoomaaro lamabu'úngw daanduueé' u koón, kuúng an ló'wa buhhaabúhh as aníng. Qooma sleémeero slawo ngin tleemís.

¹⁸ Aá Mungú, miga har dúx baraá guruú aayor'eene, geera a tsiní barnaxes ana gwaá' dír muu ira ariiká.

¹⁹ Geera a tsiní bar tina harahuwísh baraá /aanta tiwa salaqwaál, tari adór heé umuuwós taa baloó ooiiká.

²⁰ Ahaá deelór hotaaeé' ka niináwéke? Xaa na'ás, mawáng, gurkwa/asár niiná ngi sláw,

²¹ dír nira tlawiiká baraá yaamaá muu niwa kaki/iiká, baraá yaamaá gurhaami nee giwtír ur,

²² yaamaá gurhaami nee gila, dír gwa/aateema tawa adór giwti.»