YOBU 1 - Biblía Axweesantá Hhohho' ar Mungú 2004

Neetlaangw Yobu nguwa iiár

¹ Heeko i deer, oo baraá yaamaá Usi. Inós a heé hhoó', oo gan'amuú tlehhahhiít, heé Mungú ilaiwawaá/, nee oo tlakweemaá sla'aaká. Heewí umuuwós a Yobu.

² Yobu daaqaay ngu kon faangw nee dasu tám.

³ Yobu a daqaarmoó tlií/, bee/aangw ngu kon kume faanqw, angamía kume tám, awér doosla ngi kon kumuú wák. Daqwaayér /ameena ngi kon a tsiire kooán. Sagadiyuusér do'ós ka ló'wa yaariir. Inós a heé ló'wa iia tleér baraá yaamuudaá da/aawe.

⁴ Ki/imaá yaariire daaqoó Yobu muruú /aymár úr kun tlehhahhiit ar baalaqaasi dír maray'ín wa alé. Hhaeeín kudaá tám awa dasu ngin dah'imaamisiyá', as tawa al/ayín nee tawa alwahan.

⁵ Alaá umuúqo deelór ur bira sa waaraáhh, Yobu na/iiwós gin ateet giri hhoohhooees. Matlaatlér boo/ deelór ur bira sa waaraáhh, in tláy ilahhooár da/a gan haniis as umuúqo na/aywós. Yobu gár adoorí ngis tlehhiiti in kaahi, «Wane na/iieé' Mungú ngwa tlakweemí tleehhiyé' nee baraá gur'er'ine ngwa /oosliné'.»

⁶ Looarka wake malaykér Mungú ina burumburít dír geeraá AAKOÓ MUNGÚ. Neetlaangw sleeme iri dír dinkwaadá' i hardáh.

⁷ AAKOÓ MUNGÚ Neetlaangw gway yaahaás, «Kuúng a dáhh?» Neetlaangw AAKOÓ MUNGÚ guri mu/aywaáts, iri oó', «Dír ni daahh a baraá daanduú yaamu nina harweeririím.»

⁸ AAKOÓ MUNGÚ Neetlaangw guri báy, «Án ngi slaá' sagadiyusmooeé' Yobu ngwa aán. Inós a heé hhoó', oo gan'amuú tlehhiít, heé Mungú gu ilaiwawaá/, slám a heé tlakweemaá sla'aaká. Baraá yaamuwo heé adór inós i kaahh.»

⁹ Neetlaangw AAKOÓ MUNGÚ guri mu/aywaáts, iri oó', «Yobu Mungú gun qo tawo ilaiwawá/i?

¹⁰ Gár us ilaiwawa/i aqo adoosíng kuúng kuwa xuun bihhe sleémeero, inós nee múk do'ós sleémeero nee muruuwós sleémeero. Slám inós ugwa ló'wa tsúq, daqaari'iimarós iri ló'wa doogiín baraá yaamuwo.

¹¹ Axáy dakók gawaawós i tleeseek, daqaari'iimarós kwatiiteek, áx buraqo /ooslinká.»

¹² AAKOÓ MUNGÚ Neetlaangw guri báy, «Adór ta sla' tleehheek daanduú daqaari'iimarose, ala inós mu kwatiitaar.» Neetlaangw iri tláy dír geeraá AAKOÓ MUNGUHE.

Na/aá Yobu nee daqaari'iimarose niwa hhané'

¹³ Looarka wake qoomár na/aá Yobu, daaqaay nee dasuuwo, tawa dír doó hhiyaaín oo úr wa al/ayin nee tawa difaáír wahan.

¹⁴ Ya/abusmo ina hardáh dír Yobu, guri báy, «Qoomár atén tawa aweérár dooslaan, nee daqwaaye i iisapaydá' wa qeér,

¹⁵ múk Seba atén tina ii haratláy, sagadiyuuseerók kari tsuú/ ar paánga, hikwa kiri hayóh, aníng kilooeé' ana /úw, as kaangwí nguwa oo'.»

¹⁶ Qoomár sagadiyusmoodá' kaangwí ooaro nguwa hhe'eesiiká, oo hatlá' nina hardáh, iri oó', «Doori nina huuiyé', sagadiyuuse nee bee/aango ngiri qororo'oosiyé', aníng kilooeé' nina /úw, as kaangwí nguwa ooár aw.»

¹⁷ Qoomár kwí kaangwí nguwa hhe'eesiiká ooaro, oo hatlá' nina hardáh, iri oó', «Múk Kaldayo tina amohhe'eés ar daqooray tám, angamiadu ngiri hayoohiyé', sagadiyuuse ngiri tsu/iyé' ar paánga, aníng kilooeé' nina /úw, as kaangwí nguwa ooár aw.»

¹⁸ Qoomár kaangwí ooaro nguwa hhe'eesiiká, oo hatlá' ina hardáh, iri oó', «Na/iiwók, daaqaay nee dasuuwo, qoomár tawa dír doó hhiyaaín oo úr wa /ayin, nee tawa difaáír wahan,

¹⁹ bambaaór duhhúm nina baraá xaanxáy wa haratleér, do' guri badu sleémeero wa sláhh, masoomba sleémeero gari hara huú' iri qátl, aníng kilooeé' ana /úw as kaangwí nguwa ooár aw.»

²⁰ Aluuwo Yobu kaangwí sleémeero nguwa axamaamiís, iri sihhiít, tlabaawós giri feehhamiís, se'eengós nee daamoórose giri deéqw as tsuunqumis, iri yaamií huú' ar gura', Mungú guri sluufiís.

²¹ Iri oó', «Nina daanduú yaamií hardáh ar /aankwets, an tláw daanduú yaamuwo ar /aankwets. AAKOÓ MUNGÚ, ngina haniís, nee hamí AAKOÓ MUNGÚ gara tláy, umuú AAKOÓ MUNGÚ i xirfuuti.»

²² Baraá muruuwí sleémeero, Yobu Mungú ngwaa tlakweemií tleehhiiká, nee sleeme gwaa gár tlaákw bayká.