YEREMIA 9 - Biblía Axweesantá Hhohho' ar Mungú 2004

¹ Alók geeraawo sagw'eé' an adór ma'aay nee ilaaeé' tari adór kutltá hhirhheeri, as kahhó' niwa /aa/amiim tlaatla/aangw nee xweeraawo, as daanduú muk'eé' kudá' taa tsuú/.

² Masók dír hotaaeé' baraá xaanxaywo i deer tidá' aauuse i qaqatatiin. As muk'eé' nguwa geexaw nari diya/aát, asma inooín sleémeero an fuquuse, nee múk nee /aytuuse dinku'uumisá'.»

³ AAKOÓ MUNGÚ i kaahi, «Tsifreeri'ín ngaa qwambatmisiyé' adór ga/ale iwa lamemaá axweesiya', nee inooín /uuru ngwaa slayé' baraá yaamuwo ala as gan'amuuwooká, asma nin kumiitiyá' baraá tlakweemaawo, ala aníng i xuiaaká.

⁴ «Umuú heewo ti harmagaahhi dír inslaawmowose. Nee hhiya' mu harahhifaar, umuú heewo a al/aymusmo nee umuú inslaawmowo a kaantusmo.

⁵ Umuú heewo inslaawmoowós gun lámtí tlaaq, heé looeema gi káh i kaahh, inooín afer'ín ngina algeemayé' lama ngiwa axwes. Inooín tlakweema ngina tlehhahhitiyé', tam hhu'u'uungo ngiri harslaaqatiyé'.»

⁶ AAKOÓ MUNGÚ Aleesleemusmo i kaahi, «Inooín /ayta ngin daanduú tiqií qaminá', nee al/ayma ngin daanduú tiqá' wa dogiitiyá'. Aníng iga si'iyé' xu'utiro. Anuú AAKOÓ MUNGÚ tí ngina oó'.»

⁷ Gawaá adoorihe AAKOÓ MUNGÚ Aleesleemusmo i kaahi, «Aníng in hhohhoeés nee in iiár. Xáy gár hatlá' ar muk'eé' ngway tleehh a milá?

⁸ Tsifreeri'ín a adór maheeraá qarkú koomá', inooín naa hatsiyé' lamto. Umuú heewo axweesanoó tsuú' gu axwees dír inslaawmowo, ala baraá muunaáwose a adór ngur dahhi gan leelehhiit.»

⁹ AAKOÓ MUNGÚ i kaahi, «Xáy, mukwí uqo sakwasleemutakáhe as muruuwí, xáy, li/oó muruuwí uqo buaakáhe dír xoorór adór tihe?

¹⁰ Aníng an /aa/aá áw gawaá sagér tlom'i, nee an tsuunqumiís as qawtantá hikwa ar baraá darma, asma yaamu naa xaanxay tleehhitiyé', tam gár baraadár waaraahh i káhh. Baraadae afór hikwa a axaská nee ar tsir/ooro, nee ar makaá sla/to, asma sleémeero naa diyaa/atiyé'.»

¹¹ AAKOÓ MUNGÚ i kaahi, «Aníng gixsár Yerusalemu a ufuú tse/ewasi tleéhh, tay dír qatuú intsaawe. Gixsadaá Yuda in xaanxay tleéhh, heé gi hoót iri qwaar.

¹² Heé sagaloó' i deéro oo muruuwí tsaahharo gu aleesláw? Heé AAKOÓ MUNGÚ aa i axweés a heemá as kaangwí nguwa alki/iiti dír múk hatlá'? Ahaá waáy, gár yaamu nisa adoorír gwaaiyé', niri deewaiyé' tam gár baraadár waraahh iri káhh?

¹³ AAKOÓ MUNGÚ iri mu/aywaáts, ‹Adoorí ina tleehharút asma muk'eé' hara'ayar'eé' tidá' ngi haniís ngina si'iyé', sleeme afor'eé' ngaa iialooeesi'iiká, slám naa hooti'iiká ar adoodá' hara'aya i diri'.

¹⁴ Ala inooín muner'ín ngina gawdeesiyé' nee Ba'ali nguri eehariyé' adoodá' kira intsaahhatís nee baabi'ii'ín.› »

¹⁵ Gawaá adoorihe AAKOÓ MUNGÚ Aleesleemusmo, Munguú Israeli, i kaahi, «Ga/aawaak mukwí un hhamaandúr /aymiís, nee nguri ma'aá qárkwár wahaás.

¹⁶ Aníng i diyaá/ baraá xoordaá hatlá' awa i baloó xuiiaaká, tam baabi'ii'ín ngi xuiiaaká, nee wakuuse ngiri ya/aáw aluuín wa aleeró, ay dír án ngi hhaamiis.»

Múk Yerusalemu i /aa/amín as alee/isay

¹⁷ AAKOÓ MUNGÚ Aleesleemusmo i kaahi, «Kaangwí aldakwaak /ameenár tsuunqumis ateetaak ni hardat, /ameenár tsuunqumisuú baal ni hardat.

¹⁸ Inooín ni gaanslár hardihiyé' tawa tsuunqumisi as atén, hhirhheeri baraá ilaarene ni baráy gororoxotiye', hhirhheeri ni baraá ilaarén wa ti'imitiye'.

¹⁹ Afór /aa/e ar amór Siyonír daahh aga axaasaán ar kah, Atén taa hhaamiís, atén taa ló'wa mureekeés. Asma atén yaamuurén iga geexawaán, asma inooín marayrén kaa yaamií daáhh.»

²⁰ Aá /ameéna, axweesantá AAKOÓ MUNGÚ iiárií qaasaak, nee iiaahúng axweesantá afkós ngi axaasiye'. Dasuuhúng tsuunqumisuwo intsaahhatisaak, nee umuú heewo inslaawmoowós ngu intsaahhatisi daa'ángw folituuwo.

²¹ «Asma gwa'ara naa baraá marayrénií dát ar pa/eeri, gwa'ara naa dát baraá marayrén, na/ii gina baraá lohdií tsú/, nee masoombarén gana tsú/ baraá tla/ángw gixsa.»

²² AAKOÓ MUNGÚ ina báy, «Tí ooeek, ‹Tuaá muu naa qaqatiné' umuú diiro, naa tlufaafuiyé' baraá qamuwo adór tsuunkáy. Tu'u a adór hhaanslaá taa fiíq, heé gi burumbuúr i kaahh tumu wák.› »

²³ AAKOÓ MUNGÚ i kaahi, «Heé sagaloó' mitiwa xirfayeemiís as sagalooarós, heé /uuruú koóm mitiwa xirfayeemiís as /uuruuwós, heé daqaarmo mitiwa xirfayeés as daqaari'iimarós.

²⁴ Hee birti xirfayeemiis ti xirfayeesi as tí: Aníng iwa xui adór tar AAKOÓ MUNGÚ kudá' sla'aari warqawaaká, nee sakwasleemár ganaa' ga tlehhiít, nee hotaá gana'á' gi slaá' baraá yaamu. Asma muruuwí aníng i sla'atamis. Anuú AAKOÓ MUNGÚ tí ngina oó'.»

²⁵ AAKOÓ MUNGÚ i kaahi, «Ga/aawaak, deelo ni hardát ar mukwí taa hheehhe'eés oo aníng i haratlintatiaaká nguwa sakwasleemuut, múk ni sakwasleemuut a kwí:

²⁶ Múk Misri nee oo Yuda, múk Edomu nee múk Amoni, nee múk Moabu nee kudá' sleémeero se'engw'ín deeqwaquuta, kudá' baraá xaanxoó hootá'. Asma tam xoorduuká' sleémeero kaa hheehhe'esiiká, aqo adór xoorór Israeli, tidá' baraá muner'ine taa hheehhe'eesiiká.»