YEREMIA 8 - Biblía Axweesantá Hhohho' ar Mungú 2004

¹ AAKOÓ MUNGÚ i kaahi, «Qoomaadae fadaá waawituú Yuda, nee fadaá geeraharuuser'ín nee fadaá kaahamuusér Mungú, nee fadaá aaruuse, nee fadaá yaamuloouuse sleémeero ar Yerusalemu ki xwaar baraá /aantuú wa ale.

² Fadu kiri intlah dír tsee/amá nee slahhaangw nee tsatse/uú gawaá doori, dír muruudá' aáng inooín naa slaiyé' nee naa sagadiyusiyé', nee kudá' naa eehariyé' nee ngina hara'ayaárí lehhiitiyé', nee ngiri sluufmisiyé'. Faduuká' ki burumburiiká laqaá ki fooliiká', aqo nin meetiyá' gawaá daanduú yaamu adór tsuunkáy.

³ Panaay sleémeero oo daa'awtá mukwí tlákw umuú dír i dirii'i gwa'ara kari fitlín ta slafiingo. Anuú AAKOÓ MUNGÚ Aleesleemusmo tí ngina oó'.»

Tlakweema nee sakwasleema

⁴ Kuúng Yeremia muksíng baweek, AAKOÓ MUNGÚ i kaahi, «Qoomár hee bira huú', i malé sihhiitiikáhe? Hee bira qwaár, xáy i baraá loohirós tidá' i ki/iikáhe?

⁵ Ahaá ala waáy, mukwí loohír ganaa' maska sií', niri ak kumiitiyé' baraá qwanay'ín. Inooín niri ak naagisiyé' munguaá lama eeharahaduuwo, niri si'iyé' ki/imaá amor'eene.

⁶ Aníng iia ana mak ló'wa siíhh, ala inooín looeema nga ooi'iiká. Heé tlakweemaawós gaa hhu'uu'un tam oo wák i kaahh, oo baraá muunaáwósií káh, ‹Gár naa tleéhh a milá?› Umuú heewo loohirós gana eehár adór farsuú geerií kumiít baraá slaqwaraaro.

⁷ Tam halé/ sleeme qoomár loohaay ga xuu', hhooka, nee paréq nee diingoro qoomár ki/ima ngi dakumiisiaaká. Ala muk'eé' kwí gár i xui i káhh daanduú dabér AAKOÓ MUNGUHE.

⁸ Xáy, kuungá' adór tar oa', ‹Atén a sagalooár koomaán, a dabér AAKOÓ MUNGÚ koomaán?› Ala ga/aawaak, goouusér lamuuse lama gaa gooiín.

⁹ Mukhúng oo sagaloó' ku mureekees inooín naa sagaqwaariyé' nee kiri ohín nee tsaaxwel. Inooín axweesantá AAKOÓ MUNGÚ ngaa si'iyé'. Xáy daxta sagalooár inooín i kona' a gaalá?

¹⁰ Gawaá adoorihe, tlaaway'ín un múk hatlá' i haniís, qamuuín in múk hatlá' i haniís. Asma iimír na/ií wa tleemu ay múk urene, umuú heewo a slaasláwár hariimaaká gan iinuus, nee iimír aaruusér wa tleemu ay kaahamuusér Munguhe sleémeero a lamuuse.

¹¹ Inkaahha'aá muk'eé' ngina gáwtá wa taafiné' hungu/usaro, tawa kaahi, ‹Wayda i deer, wayda i deer.› Laatí wayda tumu niiná i kaahh.

¹² Kuungá' tunda mureekeési qoomár muruudá' ta waki kuwa tlehhité'. Aasla'áy, kaa mureekesiiká, tam mureekesoó niiná ngwaa slay'iiká. Gawaá adoorihe inooín i huuiyá' baraá tla/ángw mukdá' aa huuhu'un. Qoomár bira sakwasleemút ta hhán. Anuú AAKOÓ MUNGÚ tí ngina oó'.»

¹³ Qoomár aníng muk'eé' nguwa burumburtá wa slaa', adór heé sabiíbuuwós burumburiím inooín an adór sabiíbuú mamaá koomaaká, inooín a adór /aantsír mamaá koomaaká tam loo/oorós ina /óts. Tam muruudá' sleémeero naa haniís ina ilaá wa qwaár. Anuú AAKOÓ MUNGÚ tí ngina oó'.

¹⁴ Xaysé', gár ta daamaramaan diirihe? Burumburiité' baraá gixsadaá koo/i gawden ta hhaamaán baraadá'. Asma AAKOÓ MUNGÚ, Munguúrén gaa qoomeés atén tawa hhaamaan. Ta ma'aá qarkwí haniís asma kuwa sadakusaán.

¹⁵ Atén gár taa harahhifaán a wayda kuwa slawaan, ala ar hhoo' taa slawaán i káhh. Qoomár tiwa hungu/uusi ana haraaxuaán kitaangose tina ló'wa dae tlaáq.

¹⁶ Afór farsuín aga axaasaán baraá Dani, kididihoó farsuín oo slaqwara yaamu sleémeero gaa diingiís. Nin hardihiyá' as yaamu nee umuú gaaro ngiwa hhitina', gixsa nee mukose ngiwa hhitina'.

(AAKOÓ MUNGÚ)

¹⁷ Ga/aawaak, án kuungá' nu daysheérí tleés. Daysheedá' qarkuín xa'anoó koomaaká, kuungá' nuri kikíhh. Anuú AAKOÓ MUNGÚ tí ngina oó'.

Gurhaamír Yeremia as mukós

¹⁸ Gurhaamir'eé' tihe ti tu/iiká, muunaáeé' i ló'wa slahhahhaa'.

¹⁹ /Aa/aá muk'eé' iiárií qaasaak badu sleémeero awa yaamu, ta kaahi, «Xáy, AAKOÓ MUNGÚ i káhhi Siyoniro? Xáy, waawutmoowós i barawoseekáhe?» «Ahaá baré aníng iga buhhtisiyé' ar slaqsi'ii'ín kudaá adór Mungú, slaqsii'ín kudaá munguaá xuaawaslen.»

(AAKOÓ MUNGÚ) (Yeremia)

²⁰ «Bu'uungw aa hhooáy nee age aa alhhe'eesuút, ala atén taa ba/amisiiká.

²¹ Slahh'amuú muk'eé' an slahh'amueé', aníng a amoqwaqwadiím nee an tsuunqumiís.

²² Ahaá, baraá yaamaá Gileadiwo xa'anoó maasáy i káhhi? Ahaá, qwaslaarmo i káhhi Gileadiwo? Ahaá baré muk'eé' kuú narkute kwa hungu/uusiiká.