YEREMIA 6 - Biblía Axweesantá Hhohho' ar Mungú 2004

Yerusalemu wakuuse gaa harwét

¹ Múk Benyamíni, ti'iité' baraá Yerusalemuro, ta'aaimé' amór amohhooa. Tarumbeéta ufahhaak baraá gixsár Tekoaro, laya laqaamaak amoqár Bet-hakeremu. Asma amotlakwe ni bihhaá /iikú wa hardát dinkwa nee qwanoó ure.

² Gixsár Siyoni ka ló'wa hhoohhoo' nee i natsaatsá' ala gixsarí aníng a hhaamiís.

³ Muu in i hardah adór de'eemuuse nee daqooroó bee/angw'ín, heemaduuín kiri kikii' kiri kiíngár harweer, as daqooray'ín nguwa gan'aamisiya'.

⁴ Tari ooi, «Ti amohhe'ese', gixsár Siyoni kawa i haratleera'. Gimsé' a i haratlawaán qoomár /ametleemuuwo. Gár tlaakw a tsiindi in darát, nee geehhantamaá tsiindo naa tlenaanuyé'.

⁵ Naagáy daxta a haraatlawaán xweeraawo, maraá waawitá i hhaamisaán.»

⁶ AAKOÓ MUNGÚ Aleesleemusmo i kaahi, «Xaaiwós tsataak, koo/ír Yerusalemu ka hhapeérí ki/isá' bihhe sleémeero. Gixsarí i hariín kawa sakwasleemuti, asma gár aa hats baraawose a /ayta.

⁷ Adoodá' hhalaangw ma'aá hhohho' ngir baraawósií meetamamisi, án adoodá' gixsár Yerusalemu tlakweema ngir amohhe'eemis baraawose. Xaraasleema nee hhitiru'uma ki baraawós wa axamiis. Tiqtirós nee mulkaywós umuú deeloro un ga/áw.

⁸ Múk Yerusalému, tí masók a gurbu'utahúng, laqaá bar adooriheeká nun ló'wa kwaáhh ar aahhi, nuri xaanxay tleéhh oo hee i baloó hootiiká.»

Dee/aanuú múk Israeli

⁹ AAKOÓ MUNGÚ Aleesleemusmo i kaahi, «Panoó múk Israeli kudá' aa meet burumburaare', adór múk sabiíbuú burumburiím i /imamisi, adoodá' múk sabiíbu daber'ín ngir malé baraá haleemaá sabiíbúr waarahhamaamisiya'.

¹⁰ Xáy, heé ni ádbaw a heemá oo gi gurbuú' as tawa axaasi? Ga/aaweek iaaín naa giwiyé' ya/abtor'eé' axaasaro ngi aleeslay'aaká, Axweesantá AAKOÓ MUNGÚ dir'ine a gár waaqa'atiit, ngi i qwalaala/iaaká.

¹¹ Gawaá adoorihe buhhtaá AAKOÓ MUNGÚ baraeene naa hatsiyé' as inooín. Aníng ilaa/aro taa harslaaqaát.» AAKOÓ MUNGÚ iri báy, «Buhhta ku'uuseek gawaá na/iidaá baraá loohi, nee sleeme dír daqtá masoomba sleémeero, hhawaate nee /ameenaaro ki ar tláy, tam bariise nee bariisér aa diimadiindi.

¹² Maray'ín ki múk hatlá' i haniis, tam qamuuín nee tlaaway'ine. Asma aníng múk yaamuuká' u slaáhh. Anuú AAKOÓ MUNGÚ tí ngina oó'.

¹³ Inooín sleémeero iimír na/aá ninákw wa tleemu ay múk urén slaasláwár ganaa'aaká ngi tawo slaiyá'. Tam aaruuse nee kaahamuusero umuú heewo gaa a lama gan tlaaq.

¹⁴ Muk'eé' i baraá qwanáy dirii', ala inooín qwanoó muu kun duquuqún tawa kaahi, ‹Wayda i deer wayda i deer.› laatí wayduú daadáw i kaahh.

¹⁵ Xáy, qoomár tawa tlehhma'aá slasla/aren tlehhiiti mure ka ara'ári? Aasla'áy, mure ka ara'ariiká tam ar niiná. Tam adór baraá gitsee/er'ine ngir laqana' ngi xuiaaká. Gawaá adoorihe inooín ta alhuu' nee kudá' huuhu'uumá' qoomár bira slaáhh ngiri hhaamiís. Anuú AAKOÓ MUNGÚ tí ngina oó'.»

Múk Israeli loohír Mungú gaa sií'

¹⁶ AAKOÓ MUNGÚ i kaahi, «Sihhiité' dír waatsarár loohi, nee ta qaytsitá', nee muruudá' aáng aa tleehharuumiit yaahasaak. Leelehhaak didár loohír ganaa' i diri', ka eehadá', daqaní kuungá' wayda u sleerá' baraá munerhunge. Ala inooín i kaahiya', ‹Atén loohisíng a eeharanaaká.›

¹⁷ Aluuwo nuri xuumuuseérí qaás, nuri báw, ‹Afór tarumbeéta iiárií qaasaak.› Ala inooín tari oó', ‹A iiárií qaasanaaká.›

¹⁸ «Gawaá adoorihe kuungá' xoórdu, iia qaasaak, kuungá' dinkwár muu, tí inooín gi slaw xuaak.

¹⁹ Yaámu, iia qaasaak, ga/aawaak, aníng mukwí u amotlakweérí huúw, adoodá' inslaway'ín kudá' tlákw kus hariím. Asma inooín axweesante'eé' ngaa gaárií xui'iiká, nee intsaahhasar'eé' sleeme ngina si'iyé'.

²⁰ Asma milá misa ubaánír amór Shebár daáhh i hubé' tidá' mooyángw tsuú' koom? Nee uúdi ar mooyángw tsuú' koom mis nga amór yaamaá saáw wa hubé'? Ilahhooarhúng tidár da/a ka ya/aniká, laqaá ilahhooarhúng tidár muruú ta tsu/i i sla'atimisiiká.

²¹ Gawaá adoorihe anuú AAKOÓ MUNGÚ a kah: Qaytsiít mukwí aníng u dukuutseérí qaás, dukuutseerí gi dukúts, giri daráhh yaamií alé. Ín baabá nee na/ii'ín nin dinkwaárií huuiyá', tam inslaawmo nee mulqumoowós aqo kin hhaamiis.»

Haratleemuú /iikú daáhh

²² AAKOÓ MUNGÚ i kaahi, «Qaytsité', xoorór /iikú daahh ni hi'ít, xoorór /uuruú slaqwarár koom, ti amohhe'eemís amorqá' saáw wa aleeró.

²³ Inooín ga/aldu nee lawlu nga baraá dabaaín i oohiyé', múk xaraásl i gurtleemú konká, i kududuhiyá' adór hhaahhoó' ma'aay. Naa tsa/ané' gawaá daandeemaá faras, taa amohhe'eesiyé' slaqwaraaro daanduú Siyoniro.»

²⁴ Múk Israeli tari oó', «Atén kangw'ín ugwa axaasaán, dabaarén na tsatmiitiyé', amotlakwe taa sleér, slahh'amuú adór kuquú /ameenír xwayla taa sláy.

²⁵ Baraá qamu keemuuwo i qiitlanaaká, tam laqaá tawa hi'iitanór awaan baraá lohdu. Asma wakuuse xooslár slaqwara gaa amohhe'és dabaaine, umuú diiro gaa dae tlaqa.»

²⁶ Tlabaá guniyadu dahasaak, muk'eé', nee ta gwangwara'amitá' baraá da/arár wa aleeró. Tsuunqumisé' ar /aa/aá uren, adór heé na/aywós oo wák aa gwaa'. Asma heedá' nu hhaamiís ni gaanslár hardah.

²⁷ Yeremía, aníng kuúng ugwa qaás as tawa heé muk'eé' ga/áw nee heé muk'eé' gan'aamiís, as lohuduuín kiwa xu' nee kiwa qwats.

²⁸ Inooín sleémeero naa dee/anutiyé', ki sage gawden. Inooín an múk tawo hi'imiít as muu kuwa kaantin. Ki gawden adór muqslír sirdaa/aat nee muqsli. Inooín sleémeero a múk a hhitruut.

²⁹ Asla kaa oohisa hhe'eés, ala muqslaadá' harimaaká i weqaweqká as tiwa paratl, kár ala gár nis kumiit muk'eé' hhohhoeemisuwo i káhh, asma múk tlákw slasla/aremaín gi hingemisiiká.

³⁰ Inooín ki bay, «Baa/ír peésa ar taa kwaáhh,» asma anuú AAKOÓ MUNGÚ inooín iga sií'.