YEREMIA 52 - Biblía Axweesantá Hhohho' ar Mungú 2004

Huu'umaá Yerusalemu

¹ Sedekia waawuti'iima ngiwa iimu/ún kureeriiwós a mibeeri tsár nee wak. Inós kureeraá waawuti'iima baraá Yerusalemu ngaa /aáy a mibaá nee wak. Aayoorós umuuwós a Hamutali dasír Yeremia, yaamuuloousmoó gixsár Libna.

² Sedekia tlehhma'aá tlakw gina tleéhh geeraá AAKOÓ MUNGUHE ar adoodá' Yehoyakimu aa tleéhh.

³ AAKOÓ MUNGÚ múk Yerusalemu nee oo Yudawo guna ló'wa i buúhh giri amór saáw i guús. Sedekia kuwa sawaawuti'in nee waawutmoó Babuloni gana sií'.

⁴ Bál slahhángw mibaangw tawa mibaangw, oo kurkú gwaleél iimír Sedekia tawa waawutmo, waawutmo Nebukadnesa oo Babuloni nee slaqwaruuserós tana haratláy amór gixsár Yerusalemu, gixsa kari /amatseék bihhe sleémeerowo.

⁵ Gixsadá' ina adoodá' wa hotaatiín ay kurkú mibaá nee wak oo waawuti'iimár Sedekia.

⁶ Bál slahhángw tsiyáhh tawa gwaleél, qwari ina ló'wa tsimaamiíhh baraá gixsaro, asma muruú /aymár mukós i /ayi iwa faák.

⁷ Naagáy, dirka baraá koo/iro kari fooxiís, slaqwaruuse iri /akumít tsee/aá gixsa qoomár xweeraawo, loohidár koo/i nee tiqá' ti dók bihhaá asalmoó waawutmo, tay kumiít ay Araba, qoomaarihe múk Kaldayo gixsadá' kaa harweér bihhe sleémeero.

⁸ Slaqwararuusér múk Kaldayo waawutmo Sedekia guri aluú wa gús guri aleesleér dír xatstá Yeriko, slaqwaruuseerós sleémeero guri geexeér tari tlatlaáhh.

⁹ Naagáy múk Kaldayo waawutmo nguri oohiyé', ngway huwiyé' amór waawutmoó Babuloni baraá Ribla, tidár baraá yaamaá Hamati, guri didá' wa sakwasleemuút.

¹⁰ Baraá Riblawo waawutmoó Babuloni daaqoó waawutmo Sedekia guna tsuú/ dír geeraá Sedekia wa ale. Sleeme geeraharuuse sleémeero ar Yuda gari tsuú/.

¹¹ Naagáy ilaá Sedekia giri tu/ún nee guri tseék ar him'e, guri ar tláy ay yaamaá Babuloni, guri tseék ay bál gwa'ararós.

Doó Mungú kuwa feé/

¹² Bál slahhángw kooán tawa mibaangw oo kurkú mibaá nee gwaleél iimír Nebukadnesa, waawutmoó Babuloni, waawuti'iima ngiwa iimu/ún, Nebusaradani geeraharusmoó úr oo xuumuuse, kudá' waawutmoó Babuloni sagadiyuús, ina dáh baraá gixsár Yerusalemu.

¹³ Doó AAKOÓ MUNGÚ guri daá/ ar asla, nee doó waawutmoowo nee mari sleémeero awa Yerusalemu umuúqo doó ure guna daá/ ar asla.

¹⁴ Slaqwaruuse sleémeero ar Kaldayo, tidár dinkwa nee geeraharusmoó úr oo xuumuuse, koo/i sleémeero tidá' gixsár Yerusalemu ga harwet kana feé/.

¹⁵ Nebusaradani muu sleémeero kuduú narkuute aa meet baraá gixsa, nee kudá' daba' ga haniis dír waawutmoó Babuloni dinkwa mukdá' maraá xuú' tlehhtuwo, guna loohatís yaamaá Babuloni.

¹⁶ Ala Nebusaradani, geeraharusmoó úr oo xuumuusér waawutmo, muu bahh'alé oo narkuutér yaamuudá' guna geexáy as qamaá sabiíbu ngiwa doosliya'.

¹⁷ Múk Kaldayo uheemidá' taa tleéhh ar muqslír sirdaa/aat kina giqáy baraá Doó AAKOÓ MUNGUHE, dinkwa nee akweeso, nee slahhsaadá' taa tleéhh ar muqslír sirdaa/aat, tidá' baraá Doó AAKOÓ MUNGÚ, nee muqslaadá' sirda/aten sleémeero kari ar tláy yaamaá Babuloni.

¹⁸ Inooín sleeme hutli'i kina ar tláy, nee hhaansi'i nee makaási, nee iimpu, tsukumi'i kudá' uren nee xoosla sleémeero ar muqslár sirda/aten tidaádá' tar baraá doó Mungú wa ar gadiyumaamisi.

¹⁹ Geeraharusmooduú xuumuuse isanga'aay sleeme guri ar tláy, nee hhansi'i, nee iimpu, nee hutli'i, nee kiteeraá tsa'aaso kay qamaamin, nee tsukumi'idá' uren, nee isangaoó ilahhooár muruú wahaangw, xooslarí bahh'alé ar sahaábu, tooka ar muqslár /awak.

²⁰ Daanduú muruudá' Solomon aa tlehhiiti adór uheemi tsár, nee tlahhasaadár ma'aywo, nee slaqsi'iidá' mibaá nee tsár awa awér taa tleéhh ar muqslír sirdaa/aat, kudá' bihhaá baraay tlahhesoodae nee kiteeridaá wa iwitanango awa muqslír sirdaa/aat, kudá' Solomon aa tleéhh as Doó AAKOÓ MUNGÚ, muruuwí sleémeero ku qoomay wásl.

²¹ Umuú uhmoowo baraá uheemidá' tsár tlenaangós a miíta dakaát, harweermoorós a miíta kooán nee gár niina, yaangaremaawós a milimiíta mibeeri faanqw nee kooán, sleémeero a xooxamáy.

²² Dír umuú ságw uhmoowo kwa muqslár sirdaa/aátí qaás, tlenángw umuúqo sago a miíta tsár, nee sentimiíta mibeeri tsár, umuúqo sago kuna qaalín ar muqslír tsiiriihh ar mamaá komamaánga, sleémeero a muqslár sirda/aten.

²³ Komamaánga dinkwaaro a mibeeri gwaleél nee lahhoó' baraá bihhér uhmoowo. Dinkwaaro komamaánga sleémeero ar qaalidá' gaa harwet a tsiiruú wák.

Múk Yuda kuwa ar tláy Babuloni

²⁴ Aluuwo Nebusaradani geeraharusmoó xuumuusér waawutmo, Seraya, kaahamusmoó úr oo Mungú, nee Sefania, alee/isusmoó kaahamusmo, dinkwa nee xuumuuse tám ar afkú do', giri ar tláy.

²⁵ Baraá gixsaro slaqwarusmoó wák guna ar tláy oo aáng slaqwaruusér geeraharahaár baraá slaqwaraaro, dinkwa nee muu faanqw oo waawutmoó hara'ayayimá', kudaá baraá gixsár i ay. Sleeme goousmoó geeraharusmoó úr oo slaqwaruuse, kudá' muruú slaqwaruusér amohhe'eemiís, nee múk hatlá' mibeeri lahhoó' kudá' aa baraá gixsár Yerusalemúr i áy.

²⁶ Nebusaradani geeraharusmoó xuumusér waawutmo, mukwí guna huúw ay dír waawutmoó Babuloni baraá Ribla.

²⁷ Waawutmo Nebukadnesa oo Babuloni mukwí guna muúx, guri tsuú/ baraá Ribla tidár baraá yaamaá Hamati. Gawaá adoorihe múk Yuda kuri loohatís baraá yaamuuine.

²⁸ Gár taa diirí gooín a faarór mukdá' Nebukadnesa aa loohatís: Baraá kurkú faanqw oo waawuti'iimarós, múk Yahudi oo aa loohatís a kume tám nee mibeeri tsár nee tám,

²⁹ kurkú mibaá nee dakaát oo waawuti'iimarose, múk aa Yerusalemúr wa ar tláy a tsiire dakaát nee mibeeri tám nee tsár.

³⁰ Kurkú mibeeri tsár nee tám oo waawuti'iimár Nebukadnesa, Nebusaradani geeraharusmoó úr oo xuumuuse, múk Yahudi oo ira tláy a tsiire faanqw mibeeri tsiyáhh nee kooán. Muu sleémeero oo taa loohatís dinkwaaro a kume tsiyáhh nee tsiire lahhoó'.

³¹ Kurkú mibeeri tám nee faanqwe iimidá' Yehoyakini waawutmoó Yuda kuwa ar tláy, bál slahhángw mibaá nee tsár tawa mibeeri tsár nee kooán, Efil-merodaki waawutmoó Babuloni, kurkuduú kilá' kuwa waawutmoó wa qaás, waawutmo Yehoyakini oo Yuda guna gurtláy, guri gweér baraá tseegamooro.

³² Nee inós tari axweés ar axweesantá tsuu', guri qaás dír ilaiwa/ame ta ak waawituú hatlae, kudá' nee inós baraá Babuloni.

³³ Naagáy Yehoyakini tlabaá tseegamo giri duúx, iri /ayín umuú deelooro dinkwa nee waawutmoowo.

³⁴ Umuú daqto muruú /aymaarós kuna hanmiís nee waawutmoó Babuloni har afiqoomoó Yehoyakini aa slaá' umuú deelooro, ay bál gwa'ararós.