YEREMIA 51 - Biblía Axweesantá Hhohho' ar Mungú 2004

Sakwasleemár hatlá' daanduú Babuloniro

¹ AAKOÓ MUNGÚ i kaahi, «Ga/aaweek, aníng fur'a an dúk ar Babuloni ga hhitiim nee yaamuloouusér Kaldayoro.

² Aníng múk haritleemis un ya/aáw ay yaamaá Babuloni, nee ngiri haritleesiyá'. Inooín umuú gaaro ngiri faakiyá' baraá yaamuwo barka i haratláy badu sleémeero qoomár slahh'amuuwo.

³ Múk maheeraá tlaquút oo Babuloni pa/ángw tsaxaara mukuwa sláy, tam pa/ángw tlabaá slaqwara ngiwa dahaasiya' munguwa slayé'. Masoombarós ma gurtlawaara', slaqwaruuserós hhaamisaak.

⁴ Inooín tan huuhu'ún kiri tsuu/ baraá yaamaá Kaldayoro, inooín kin baraá lohduuín wa tlaaqaaqán.

⁵ Asma múk Israeli nee oo Yuda kwaa gunqareesiiká nee AAKOÓ MUNGÚ Aleesleemusmo, Munguúín, tam yaamuuín naa hatsii'i tlakweemaawo, geeraá Kudá' Hhoohhoó' oo Israeliro.

⁶ Baraá Babulonír wa /akumiitaré', umuú heewo slaqwtós ngi tu/i, mutunduwa hhaamiís baraá sakwasleemarós, asma qoomaarihe AAKOÓ MUNGÚ i li/oó bu'ún, yaamuudá' gin sakwasleemuut ar adoodá' iwa harina'.

⁷ Aáng Babuloni dír AAKOÓ MUNGUHE a adór xooslmoó sahaábu, kudá' aa yaamu sleémeerór wahaás, xoordu sleémeero gina difaáirós ar wahaás gawaá adoorihe xoordu niri slarhhamuumutiyé'.

⁸ Babuloni aa gaanslár hú' nee iri qeqtiín. Tsuunqumiisé' as inós, xa'anoó maasáy ti hanise' as slahh'amuuwós, doóqa i hungú/.

⁹ Múk Babuloni hungu/uusaro ugwa mak iiara'araán, kár ala ugwa aleeslawaaniiká, mawaak, gusé' a tlawaán umuú heewo amór ayaawós, asma sakwasleemarós ka ló'wa ur, aa tsa/aán ay gawaá doori, aa tsa/aán ay gawaá huunkáy.

¹⁰ AAKOÓ MUNGÚ gaa tsaáhh adór dakuús kar koomaanaaká. Gusé' baraá Siyoni gadiyér AAKOÓ MUNGÚ, Munguúrén a alki/itaán.

¹¹ AAKOÓ MUNGÚ munér waawituú múk Mede gaa dúk asma Babuloni ga ló'wa hhaamiisár wa slaa'. Asma gaarí an li/aydú AAKOÓ MUNGÚ, kudá' i bu'un as Do'ós. Maheerihúng duuxaak! Gaambu oohaak!

¹² Bendeérár slaqwara gáwtí tleesaak ar Babuloni kawa i haraatleera'. Xuuma /uuru ti doge'. Xuumuuse qaasaak, múk haramamahhamit amohhe'eesaak. Asma AAKOÓ MUNGÚ muruuwí tsaraawo gun tleehh, kudá' aa qoomeés gun boo/ees daanduú yaamuloouusér Babuloniro.

¹³ Kuungaásíngá' afaá ma'áy wa hootá', daqaarér muruú yaariír, alhhe'eesayhúng naa hardáh, taamír slafingwhúng ka tsaat.

¹⁴ AAKOÓ MUNGÚ Aleesleemusmo lo'o gaa /aáy ar slafiingós. Aníng múk yaariír adór ingigi ngu amorhúng i huúw. Inooín daa'ángw bara/ oo baali kuri daa' daanduú Babuloniro.»

Daa'ángw Mungú kuwa sluufmiisi

¹⁵ Inós yaamu gina tleéhh ar /uuruuwós. Yaamu gina gawdeés ar sagalooarós, baraá xu'utirose doori giri iihhaáf.

¹⁶ Qoomár bira ilawaáts ma'aay dooriwo nin xuuruiyá'. Tlaangú iri tleehharuut bihhér yaamu sleémeerowo. Maankari iri wer'eeliín qoomár tluuwaywo. Fur'a ngin baraá kuuntaywós wa duxún.

¹⁷ Umuú hee a daktani, ku xu'uti wásl, umuú kareeramowo nee murslaaqatuuwose ki mureekees, asma slaqsi'iiwós a lama, slám i hiinsliiaaká.

¹⁸ I gaa buiiaaká, a lamtá tawo, qoomár sakwasleemar'ine i hhaná'.

¹⁹ Munguú Yakobo a adór inooineeká, asma inós umuú gaaro gana tleéhh. Múk Israeli an múk aalirós, AAKOÓ MUNGÚ Aleesleemusmo an umuuwós.

Yuúndú Mungú

²⁰ Kuúng an yuúndueé' nee xooslmooeé' oo slaqwara. Kuúng un xoordúr naasuusúw, kuúng un waawuti'iimárár hhaamiís.

²¹ Kuúng un farsúr tsuú/ nee slaqwaruuseedá' gaa i tsa/aandi, kuúng un gaardaá farsúr giqáw nee mukdá' gi madiita.

²² Kuúng un hhawaate nee /ameenárár tsuú/, kuúng un bariise nee masoombárár tsuú/, kuúng uri daaqaay nee dasúr tsuú/.

²³ Kuúng un de'eemuuseérár tsuú/ nee bee/aango. Kuúng un doosluuseérár tsuú/ nee awer'ín tidá' tar doosli. Kuúng un ga/aawuuseérár tsuú/ nee geeraharuuseero.

Muxtár Babuloni

²⁴ AAKOÓ MUNGÚ i kaahi, «Aníng Babuloni nee yaamuuloouuse sleémeero ar Kaldayo a muúx, ilaahunge a aandá', asma muruudá' tlákw sleémeero taa tleehhít baraá gixsár Siyoni.

²⁵ Ga/aaweek, kiíng tloomár hhaamimiis, aníng nee kiíng ti araán. Kiíngasíng yaamu sleémeero gi hhitaatiim, aníng dakw'eé' u gawaawók i tleés, iri gawaá tla/uú wa daáhh, iri adór tloomár taa daá/ tleéhh.

²⁶ Tam tlaa/anoó ta dirógí leehhi oo ta qaasi dír qul/ír do' i kaahh, tlaa/anoó ta qaasi baraá ihhafiirír do' i kaahh, ala an xaanxay tleehhít daqisleém. Anuú AAKOÓ MUNGÚ tí ngina oó'.

²⁷ Bendeérár slaqwara gáwtií tleesaak daanduú yaamuwo, tarumbeéta ufaahhaak baraá tla/ángw xoorduwo, xoorodu ti amohhe'eesiye' slaqwaraaro. Waawuti'iima ateetaak tawa haraatlay, waawuti'iimár Ararati, nee Mini nee Ashkenasi, geeraharuusér slaqwara qaasaak, farsuú yaariír adór ingigi huwaare'.

²⁸ Xoordu amohhe'eesaak as tawa slaqwi nee inós, waawituú Mede amohhe'eesaak nee ga/awuuse nee saayuuser'ine, nee umuúqo yaamaá baraá waawuti'iimar'ín i diriiá'.

²⁹ Yaamu naa daaraxaatiyé' nee i nu/uu/utsiyá' as slahh'amu. Asma AAKOÓ MUNGÚ gár aa ístí tsaát dír Babuloniro ga boo/ees, yaamaá Babuloni ki deewa'atis, niri yaamuloouuse wasleesiyá'.

³⁰ Slaqwaruusér Babuloni slaqwara gaa harslaaqát, naa meetiyé' baraá ku/er'ín tidá' gawden, /uureemooín naa faakiyé'. Inooín an adór /ameena, maray'ín kaa daá/ ar asla, muqslár afér maray'ín kaa giqáy.

³¹ Hee in ta'aaín nee kuqá' tiwa doogiya', nee ya/abusmo in amór kuqá' i ta'aaín as tiwa doogiya'. As waawutmoó Babuloni kuwa kaangwí bay, adór gixsarós kara i haraatláy umuú bihhiwo.

³² Duxe kaa hayóh, koo/i kaa daá/ ar asla, slaqwaruuse aa daandeemo feehhamít.»

³³ AAKOÓ MUNGÚ Aleesleemusmo, Munguú Israeli, i kaahi, «Babuloni a adór afeenír balaangw muxta, qoomár barta balángw muux. Ala deelór niiná i sí', nee qoomár bu'uungw ni hardát.

³⁴ Waawutmo Nebukadnesa oo Babuloni gixsár Yerusalemu gana hhitín nee gari naasúy, gari adór hutloó kaahaár tleéhh, gana guú/ adór dayshamo. Guruuwós guna hatsiís muruú tsuua nee gari waá/ amór saaw.

³⁵ Múk Siyoni i ooi, ‹Hhituru'uuma sleémeero tidá' múk Babuloni naa atén i tleéhh nee hhaeerene ka gawaaín i ki/isi.› Múk Yerusalemu ii ooi, ‹Tseerduurén kudá' taa ku'uús ki bui gawaá múk Kaldayo.› »

Mungú múk Israeli gu alee/iis

³⁶ Gawaá adoorihe, AAKOÓ MUNGÚ i kaahi, «Ga/aawaak, aníng kuungá' nu aleekalaá/ daanduú kangwhunge nee li/aay nguwa buu' as kuungá'. Tlawtá Babuloni a /oomeés, nee kutlaywós u kahaás.

³⁷ Babuloni a taangu tleéhh, tari mar'ír intsaawe i hot, tari dír dae tlaaq, tari dír ta waaqaseesen, nee heé baraadá' wa hoót iri kaahh.

³⁸ Inooín ni /orootliyá' dinkwár wa ale adór direeri. Tari /oorootl adór na/aá diraangw.

³⁹ Inooín hheehhár /ayma gi eér, aníng ngiri muruú /aymár úr i amohhe'eés, inooín ngiri xufitiís nay ta/amitiyá', inooín tan guu' ta daarkitiiká, nee sleeme ta baloó tlayká. Anuú AAKOÓ MUNGÚ tí ngina oó'.

⁴⁰ Inooín in baráy /aytiís adór deeloó bee/ángw ta tsu/i, adór gwaandaawe nee gurtaawe.»

Huu'umaá Babuloni

⁴¹ «Adór Babuloni kara ar tláy, gixsadá' taa xirfayeemaamiís baraá yaamuwo! Babuloni aa gár dae tlaaq tleehhít baraá tla/ángw xoorduwo!

⁴² Tlawi naa haratleér amór Babulonírí ale, Babuloni kaa tuuntuúk nee /ur/urtá gwaanduú ma'aay.

⁴³ Gixsaduuwós naa gár dae tlaaq tleehhitiyé', yaamuuín naa qor'otiyé' nee a xaanxaay, yaamaá ta hootiiká, yaamaá tar waraahhiiká nee muu.

⁴⁴ Aníng munguúdá' ta bay Beli oo Babuloni u sakwasleemuút, nee gadaádá' aa guú/ aníng ngin kwarkwaár ngiri waa/. Xoordu i malé kumitiaaká daqaqángw amoorose, koo/ír Babuloni aa hú'.

⁴⁵ Muk'eé', ti'itaré' baraasinge. Umuú hee slaqwtós ngi tu/i dír buhhtaá xaraaslá' awa AAKOÓ MUNGUHE.

⁴⁶ Ma diqiya' tsatmiitara' nee ma da'ayumitaara', asma lamtá ta axamisa' baraá yaamuukae, kurkwí gár ta kaahi a tí, kurkuqae gár ta kaahi a tí. Nee hhita i baraá yaamu, waawutmo i amór kuqá' i haratláy.

⁴⁷ Gawaá adoorihe, ga/aawaak, baala ni xeér ar aníng murslaaqatuú munguaá Babuloni nguwa muux, yaamuuín sleémeero ki mureekees, muk'ín sleémeero ku baraadií tsuu/.

⁴⁸ Naagáy doori nee yaamu, nee umuúqo gár baraaínií diriia, tari daa' ar qwala/ as Babuloni, asma hhituusér /iikú daahh aa amor'ínií haratleér. Anuú AAKOÓ MUNGÚ tí ngina oó'.

⁴⁹ Babuloni aqo in hú' asma múk Israeli nguwa tsú/, as adoodá' Babuloni múk yaariír nguwa tsu/aa/iín baraá yaamuwo.»

Ya/abtór Mungú amór múk Israeli kuduú baraá Babuloni

⁵⁰ «Kuungáká panoó aa kotsqomiit tsu/utaaro, hám ti'iité', ma tligatligaara'! Tam bar baraá yaamaá saawá' i diriiá' AAKOÓ MUNGÚ inslaslawaak, nee gixsár Yerusalemu ma gunqareesara'.

⁵¹ Kuungá' a kata', ‹Atén taa mureekeés, taa iigahhamiít, atén alsi'imu taa óh, asma dahaaye a dát didaádá' hhoohhoo' ar Doó AAKOÓ MUNGÚ.›

⁵² Anuú AAKOÓ MUNGÚ a kah, ‹Gawaá adoorihe, baala i hardát ar munguiidaá slaqsi'i awa Babuloni ngiwa sakwasleemuut, nee baraá yaamuuwós sleémeero mukdá' taa tlaqmaamiís ta /iif.›

⁵³ Tam Babuloni i tsa/aanda gawaá doori, tam koo/irós ngi tleereesa ay gawa, tam adoorihe múk ga hhaamiis u tleés. Anuú AAKOÓ MUNGÚ tí ngina oó'.»

Hhaamiisár hatlá' ar Babuloni

⁵⁴ «/Aa/aá Babulonír dahhá' iiárií qaasaak, afór ur ar hhaamisa ar yaamaá Kaldayór daahh axaasaak.

⁵⁵ Asma Anuú AAKOÓ MUNGÚ Babuloni a xaanxay tleéhh, afoorós tidá' yaariir a xasltís, wakusmooín i /oorootl adór gwaanduú maa'aá yaariir, tsimaahhir'ín i doogigiín.

⁵⁶ Kudá' ga hhaaiís aa Babulonírí hardát, miguuseerós kara tláy, ga/alduuín kaa giqaagáy. Asma Anuú AAKOÓ MUNGÚ a Munguú li/oó bu'uúm, tí ar ló', aníng li/aay u buú'.

⁵⁷ Aníng geeraharuuseerós nee múk sageloene u xufiitiís, nee ga/aawuuseerós nee geeraharuusér slaqwara nee miguuseerose. Inooín tan guu' ar gu'utér tawa daarkiitiiká, nee ar tleemu wasl. Aniíduú waawutmo, umuueé' a AAKOÓ MUNGÚ Aleesleemusmo, tí ngana oó'.

⁵⁸ «Anuú AAKOÓ MUNGÚ Aleesleemusmo a kah, koo/idá' yangaariit ar Babuloni ka yaamií daahh kari hhapeérár alqoomees, nee afeerós tidá' urén kari daa/ ar asla. Muu ina tawo gadiyumaamiís, xoordu tina tawo gadiyédár faakiyé' ala alhhe'eesay'ín a asla.»

Ya/abtór Yeremia ar taa Babulonírí huúw

⁵⁹ Kaangwí an kudá' aarusmo Yeremia aa hara'ayín Seraya garmoó Neria, garmoó Ma'aseya, qoomár Seraya nee Sedekia waawutmoó Yuda tawa Babuloni káy, bál kurkú tsiyáhh oo waawuti'iimár Sedekia. Seraya a geeraharusmoó slaqwaruuse.

⁶⁰ Yeremia amotlakweedá' sleémeero Babuloni ga slaw gana baraá kitaábií gooín, axweesanaydá' sleémeero taa aaín daanduú Babuloniro guri gooín.

⁶¹ Yeremia Seraya guri báy, «Gám bara hardát Babuloniro, kaangwí sleémeero ku soomús dír múkwí ale.

⁶² Naagáy aluuwo ka alhhe'és ar axweesantí, ‹AAKOÓ MUNGÚ, kuúng daanduú yaamuukae ana ó', i hhaamís nee gár baraaká' i meet i káhh, muu laqaá makaay, yaamuuká' nin xaanxay tleehhitiyá' ay alhhe'eesay wasle.›

⁶³ Qoomár kitaábuuwí soómaro bura hhe'és, ku tlaa/anií tsék, naagáy ku /aytís baraá yaaér Eufrate, ta o',

⁶⁴ ‹Adoorí an adoodá' gixsár Babuloni iri /et nee iri baloó sihhitaká malé alé, asma amotlakweedá' AAKOÓ MUNGÚ i gawaawós i huwi.› » Alhhe'eesoó axweesantá Yeremia.