YEREMIA 50 - Biblía Axweesantá Hhohho' ar Mungú 2004

Hayoohár Babuloni

¹ Kaangwí an axweesantá AAKOÓ MUNGÚ tidá' aarusmo Yeremia aa axaás daanduú yaamaá Babuloniro nee yaamaá Kaldayo,

² «Afo ilahanisaak baraá xoorduwo, Bendeéra gáwtí tleesaak nee ka oá', ma gaa lu/aara', ooaak adór yaamaá Babuloni kira hayóh, munguú ta bay Beli kwaa mureekeés. Munguúdá' ta bay Merodaki kwaa dae tsaát, murslaaqatuuín kwaa mureekeés nee slaqsi'ii'ín kaa dae tsaat.

³ «Asma xoororka /iikú daahh ni haratleér amór xooroorí, yaamuuká' ngiri deewa'atisiyá'. Heé baraaká' i hotaá áw i kaahh, muu nee makaywo tan tlatlaahh baraá yaamuudae.»

Ki/imaá múk Israeli

⁴ AAKOÓ MUNGÚ, Munguú Israeli i kaahi, «Qoomaadae nee daqtadae, múk Yuda ta buruumburiit dinkwaárí ale nee tari kii/ ar /aa/e tawa anuú AAKOÓ MUNGÚ, Munguúín leelehhiiti.

⁵ Loohír gixsár Siyonír kaw kari yaahaas, amooqaqae gur'er'ín nga amoodá' xu'usiyé' tawa kaahi, ‹Qwalaas, ti haragwaa'aán nee AAKOÓ MUNGÚ baraá alqadoodá' alhhe'eesay wasl, tidá' baloó gunqarutaaká.›

⁶ «Muk'eé' a adór bee/ángw aa qwaar, kin qwaareemiis nee de'eemuuser'ín, kina gan'aás gawaá tlom'i, nin gawaá tloomarí wa tláy ay gawaá gongoamooqá', inooín slumtaín ngiri gunqareesiyé'.

⁷ Umuú gár gaa harasliqiti gina /ák. Wakuuser'ín giri beer, ‹Atén ti tlakweeká asma inooín AAKOÓ MUNGÚ nguna sadakuusiyé', kuduú qawtantaín ar ló', AAKOÓ MUNGÚ kuduú harahhifór baabi'ii'ín.›

⁸ «/Akumiité' baraá yaamaá Babuloniro, tsee/áy ti'iitaak baraá yaamaá Kaldayo, umuú heewo kuqá' munguwa dán, adór gurtuú geeraá aara.

⁹ Asma ga/aaweek aníng xoororka ngi /ur/uúr amór Babuloni, dinku'uumár xoordaá yaariir awa /iikú dahhá', taa amohhe'eesiyé' Babuloni ngiwa hayoohiya'. Maheeri'ín a adór awa migusmoó slaqwarár baál, kudá' dab/oórár waawatlaaká.

¹⁰ Yaamaá múk Kaldayo kin hayoh, mukdá' sleémeero gaa hayoh tari hhe'ees. Anuú AAKOÓ MUNGÚ tí ngina oó'.»

Huu'umaá Babuloni

¹¹ Kuungásingá' aalir'eé' hayoohimá', tam qwalaala/aa'a tam bara/a'a, tam /an/anusa'a adór bukár baraá gitso, tam aahhamiinda'a adór farsuú yaqaambe,

¹² yaamuuhúng kudaá xwayliitó'órhúng ki mureekees. Aayorhúng baraá yaamuukae ka mureekees. Tí ar ló' Babuloni tari xoorór alhhe'eesáy baraá xoorduwo. Iri darma tleehhít, nee yaamaá kaahar nee xaanxaay.

¹³ As xarasleemaá AAKOÓ MUNGUHE yaamuuká' yaamuloouusér gi hoot i káhh, ala kin ló'wa deewa'atis, umuúqo heé aa baraá Babulonír ar waaraahhi in daanda feehhiit, gari niqín asma inkahhi'iidá'.

¹⁴ Ti amohhe'ese' Babuloni kawa harweda', kuungásingá' sleémeero tlaqutuú baalá', tlaqutaak, miwa mahaangw meét. Asma AAKOÓ MUNGÚ ngwaa sadakuusiyé'.

¹⁵ Tsee'é' bihhe sleémeerowo, daxta Babuloni aa ya/a/aán, maraywós kudá' uren naa huuhu'uné', koo/irós ka fee/. Asma AAKOÓ MUNGÚ li/aay gun buu' daanduú Babuloniro. Gimsé' li/aay buaak. Adoodá' inós aa tlehhaahhít tay tlehhe'.

¹⁶ Dahasuuse har'oohaak balaangw munguwa dahaasiyé' yaamaá Babuloniro, tam qoomár fiqituuwo matawa fiiqiít, asma paángár baramaanusmo, umuú heewo múk do'ós guri alkii/, umuú heewo iri amór yaamuuwós i goow.

Ki/imaá múk Israeli

¹⁷ Múk Israeli, a adór bee/ángw ta slakaati nee diraangw kudá' ta tlatlahhaás. Geeraawo kina hhaamiís nee waawutmoó Ashuru, nee hám daxta Nebukadnesa waawutmoó Babuloni kudá' gaa fadu giqaaqay.

¹⁸ Gawaá adoorihe, AAKOÓ MUNGÚ Aleesleemusmo, Munguú múk Israeli, i kaahi, «Aníng waawutmoó Babuloni un muúx nee yaamuuwose, adoodá' waawutmoó Ashuru ngura muúx.

¹⁹ Múk Israeli u ki/ís baraá qawtanti'ín, nee angamír'ín kari gawaá tloomár Karmeli nee Bashanír wa de'én, muruú /aymár bu'uút nguri slayá' gawaá tlom'aá Efraimu nee Gileadiro.»

²⁰ AAKOÓ MUNGÚ i kaahi, «Qoomaadae nee daqtadae tlakweema ki leelehhiit yaamaá múk Israeliwo, ala ki ariiká. Dakuús ka leeleehh yaamaá Yudawo, ala ka harasliqitiiká asma aníng panaydá' aa meet u gurtláw.»

Mungú múk Babuloni gu sakwasleemuut

²¹ AAKOÓ MUNGÚ i kaahi, «Tlawsé' haratlawé' amór yaamaá Merataimu, nee haratlawé' amór yaamuloouusér Pekodi, tsu/uuté', ló'wa hhaamiisaak. Umuú gár naa ooi tleehhaak.

²² Afór slaqwara a axamisaán baraá yaamuwo. Hhitiru'uumár yaariir i deer baraá yaamuwo.

²³ Axáy a adoomá, gixsarí aáng adór yuúnduú yaamu sleémeero, adór ira qeqtiín. Babuloni adór ira dír dae tlaaq tleehhít tla/ángw xoorduwo.

²⁴ Kiíng Babuloni ina tsaaxweelír i qaás iri óh, ala gár taa tsáhh i káhh. Tina sláy tari óh asma tina tlampa'asaán nee anuú AAKOÓ MUNGÚ.

²⁵ AAKOÓ MUNGÚ xosluuwós kudaá slaqwara gaa gweér, xosluuwós kudá' xaraaslá' ngaa tsee/ií gagaár. Asma Aako, MUNGÚ Aleesleemusmo, gadiyér i tleehhi i deér baraá yaamaá Kaldayoro.

²⁶ Qwalaas, i haratlawaak bihhe sleémeerowo, kuuntáywós kisaak, inós burumburaak adór balaángwá ale, ka ló'wa hhaamisá', tam gár wák ma dirós i meetisaara'.

²⁷ Slaqwaruuseerós tidár adór awe tsu/aak, mawaak i /eetiye' dír tsu/uta. Tsaxwaaín asma deelor'ín naa hardát, qoomar'ín ar muxta naa xeér.

²⁸ «Iia qaasaak, inooín naa /akumiitiyé', naa kotsqomitiyé' baraá yaamaá Babulonír wa alé, ta baraá Siyonír wa kángw ilaharmiis adór AAKOÓ MUNGÚ, Munguúrén li/aay ngura buú', li/aay as Do'ós kudá' hhoohhoó'.

²⁹ «Múk ga/ale tlaqutuwo ga xuú' ateetaak as Babuloni kawa i haratlay, umuú heé mahaangw tsaxaararo gu xuú' huwaak. Gixsa harweeraak asma hee miwa /akuút. Li/aay buaak ar qoomoó tlehhmi'iiwós adoodá' múk hatlá' ngway tlehhít ti tlehhe', asma inós ina daara/aán, AAKOÓ MUNGÚ, kudá' hhoohhoó' oo Israeli guri waaqá'.

³⁰ Gawaá adoorihe, masoombar'ín ka tsuu/ baraá afeeni nee slaqwaruuser'ín ka hhaamiis baalaadae. Anuú AAKOÓ MUNGÚ tí ngina oó'».

³¹ Aako, MUNGÚ Aleesleemusmo, i kaahi, «Ga/aawaak, kuungásingá' daara/aamá', ti araán, asma baalarhúng naa hardát ar án kuungá' nuwa muux.

³² Heé daara/aám i dukuuts nee i huu', heé gu tleés i kaahh. Aníng asla a oohiís baraá gixsaduuwós, nee umuú gaaro gari /ák bihhaawose.»

³³ AAKOÓ MUNGÚ Aleesleemusmo i kaahi, «Múk Israeli kwaa ló'wa baramaanuús, tam múk Yuda sleeme. Mukdaádá' inooín gaa loohatis gaa ló'wa slahh'eés nee geemawto kaa sií'.

³⁴ Ala ba/amusmooín oo /uuruú koóm, AAKOÓ MUNGÚ Aleesleemusmo an umuuwós. Inooín gin aleekalaa/, giri amohhooárií haniis baraá yaamuwo, ala yaamuloouusér Babuloni amoqwanaay gway sleér.»

³⁵ AAKOÓ MUNGÚ i kaahi, «Qatlo i gawaá múk Kaldayo, nee gawaá yaamuloouusér Babuloni, nee i gawaá geeraharuuser'ín, nee i gawaá muk'ín oo sageloén.

³⁶ Qatlo i gawaá qwaslaare, asma inooín i daktu'uumitiyá', qatlo i gawaá miguuser'ín, asma ki hhaamiis.

³⁷ Qatlo i gawaá farsuuín nee i gawaá gaarduuín. Qatlo i gawaá slaqwaruuser'ín tidá' taa tlaáxw as tawa da'ayuút adór /ameena. Qatlo i gawaá daqaari'iimar'ín, asma umuú gaaro kan hayoh.

³⁸ Ma'ay'ín ni kahiye', as kahhó' niwa kahiya', asma Babuloni a yaamaá murslaaqatuú mungui. Muu a slarhhamumuút daanduú slaqsa'aá munguaá hatláe.

³⁹ Gawaá adoorihe, makaá sla/a i baraá Babulonír i hotaá ayá', bahu nee sakwel niri baraadá' wa hootiyá', múk baraadá' i kaahh ay kureeraá kureér.

⁴⁰ Adoodá' aníng gixsadaá Sodoma nee Gomora nee gixsadaá inslaaway'ín ngira hhitiím a adoorír kilá' heé baraadá' i hotaá áw i kaahh. Nee garmoó hee oo baraadá' i deél i kaahh. Anuú AAKOÓ MUNGÚ tí ngina oó'.»

⁴¹ AAKOÓ MUNGÚ daanduú Babuloni i kahi, «Ga/aaweek, muu i bihhaá /iikú wa hi'iit, xoorór /uuruú koom nee waawituú yaariír tinda /iikú wa /ur/uriít.

⁴² Ga/alduuín nee lawluwo nga taataahhiyé', a múk xaraásl, oo gurtleemuú koomaaká. Kududuhay'ín a adór gwaanduú tlawi, inooín ta gawaá daandeemaá faras. Farsuuín ngwa ii tsa/ané', tindin haratláy amór kuungaá Babuloni.

⁴³ Waawutmoó Babuloni kangw'ín gwa axaás. Dabaawós niri tsatiitiyé' adór hima, slahh'amaaye gwa ót, slahh'amaaye gwa ót adór /ameenír dír asltá xwayla.

⁴⁴ Ga/aaweek, adoodá' diraangw nir baraá darmuú Yordanír wa /akuuti ay baraá tla/ángw daqtá bee/aangw, an adoodá' aníng múk Babuloni ngur guus baraá yaamuuín wa ale. Aníng geeraharusmooeé' oo ni slaa' un tsawaár, nee nguri qaás. Asma heé adór aníng a heemá? Heé aníng i sakwasleemuút a heemá? De'eemusmoó aníng i tlampa'aás a gaalá?

⁴⁵ Gawaá adoorihe, adoodá' AAKOÓ MUNGÚ aa qoomeés daanduú múk Babuloniro iiárií qaasaak, nee adoodá' i tleehhamór wa slai dír yaamuloouusér Kaldayo. Tam deeláy'ín awa bee/aangw kun yaamúr duuruxún, nee kiri ar tláy, múk yaamuudá' hoót tari waa/oo/.

⁴⁶ Kududuhoó hayoohár Babuloni yaamu gi daaraxaas, nee /aa/eeín kiri axaas baraá tla/ángw xoordaá hatlae.»