YEREMIA 5 - Biblía Axweesantá Hhohho' ar Mungú 2004

Tlakweemaá Yerusalemu

¹ Axáy baraá lohdaá Yerusalemu wa hi'iimitaak, xuuxuaak nee ka gooiindá'. Didá' boo/oó muu i dirii'i iwa xuuxu'uumaak, axáy heé gan'amúr hoót u sleerá'a, nee oo looeemaá leelehhiít. Bura sleeré', daqaní aníng múk Yerusalemu u gurtláw.

² Inooín tam lo'o ngi /ayia' iwa kaahiya', «Adoodá' AAKOÓ MUNGÚ ir hotaatin.» Tam adoorihe inooín a lo'o ngin /ayiyá' ar lama.

³ AAKOÓ MUNGÚ gár i leelehhiiti a inkihhimu. Iga mak múx kár ala naa faxati'iiká. Ina mak da/aa/aán ala nanaaqa ngaa ya/ani'iiká. Inooín ki mune gawden tlaa/a ba/a, nee tlakweema hhu'u'uungo naa si'iyé'.

⁴ Aluuwo án niri oó', «Mukwí an narkuutér kilá', i fuqurángw kon'aaká. Inooín gár Mungú i slai ngi xuiaaká, dabér AAKOÓ MUNGÚ ngi xuiaaká.

⁵ Aníng a axweesantá áw dír geeraharuuser'ín, inooín gár Mungú i slai ngi xuiyá', nee dabeerose.» Ala inooín sleémeero i alqoná' waawuti'iimár AAKOÓ MUNGÚ ngina si'iyé', nee iialooeesaro nguna si'iyé'.

⁶ Gawaá adoorihe dirángw baraá sla/atá daáhh gin uhín, taweeramoó baraá xaanxoó daáhh gin hhaamiis, du'uma i baraá gixsaduuín wa gigidín. Umuúqo heé tsee/áy ti'iita kun karslamiis. Asma tlakweemaaín naa ló'wa tlahhiyé', nee inooín Mungú siasiuuwo naa ak harwaarahhiyé'.

⁷ Xáy, tlakweemaahúng adór ngir gurtlaw? Mukók aníng iga sií' nee lo'o ngiri /ayiyé' ar munguaá lama. Qoomár inooín ngiwa /aymiís niri aaxiyé', nina baraá fúqtí tlayé', baraá maraá tsaatuuse ngiri dalaa/iyé'.

⁸ Inooín an adór farasuú aa aax, kudá' ilatleeri aa alsihhimít. Umuú heewo harér inslaawmoowós gan al/aa/amín.

⁹ Xáy, aníng kaangwihe sakwasleemaro i qo máwa? Xáy, anuú AAKOÓ MUNGÚ daanduú xoorór adór tihe li/aay bu'utuuwo uqo máwa?

¹⁰ Tlawsé', waaraahhé' ar baraá qamuuwós awa sabiíbu, umuú gaaro hhitimaak, ala ma ak faaka hhe'eesara'. Haleemiiwós na tsataak, asma awa AAKOÓ MUNGUHEEKÁ.

¹¹ Asma múk Israeli nee oo Yuda naa ló'wa inkihhimu wasleesiyé' dir'eene. Anuú AAKOÓ MUNGÚ tí ngina oó'.

Mungú múk Israeli gwaa sií'

¹² Inooín lama ngaa tsatiyé' daanduú AAKOÓ MUNGUHE, nari ooiyé', «Atén gár ti /iisi i káhh, gár tlaakw ar atén ti slaw i káhh, laqaá tam slaqwara ti sleeraaká, laqaá giyeé.»

¹³ Aaruuse an adór fur'ár tawo, axweesantá Mungú i káhh dir'ine. Gimsé', tí inooín awa kilá' gin sleér.

¹⁴ Gawaá adoorihe AAKOÓ MUNGÚ, Munguú Aleesleemusmo, i kaahi, «Yeremía, asma muksíng iwa adoosír axweesi, ga/aaweek axweesante'eé' an adór asla tleéhh baraá afkoge, mukwí tari adór migír, inooín asla giri /ák.

¹⁵ Anuú AAKOÓ MUNGÚ a kah, ‹Aníng xoororka wák ngi amór saáw wa huúw as kuungá' múk Israeli nuwa i haraatleer. Xoorór kuungá' ta baloó bal'aaká, xoorór bál qaro, xoorór kuungá' ta tsifri xua'aaká, laqaá tam gár inooín ta kaahi kuungá' a tsahha'aaká.

¹⁶ Tlaangasuuín a adór /aantár piintsiyaá/, sleémeero a múk slaqwarár baál.

¹⁷ Inooín balangwhúng nee muruú /aymarhúng kun /aay. Inooín na/iihúng awa dasu nee awa daaqaywo ngi tsu/iyá'. Inooín daqooroó hikwaahúng nee bee/angwhúng ngun /ayiyá'. Inooín sabiíbuhúng nee seituúnirhunge ngin /ayiyá' gixsaduhúng kudá' koo/i gawden kuungá' taa harahhifé', inooín ngin hhaamiisiyá' ar xooslár slaqwara.›

¹⁸ «Ala tam adoorihe baraá deeloorí sleémeero aníng kuungá' nu ak hhaamisaaká. Anuú AAKOÓ MUNGÚ tí ngina oó'.

¹⁹ Nee qoomár mukhúng burnu yaahamiis, tawa kaahi, ‹Ahaá waáy, gár AAKOÓ MUNGÚ, Munguúrén, muruuwí sleémeero ngusa atén i tleéhh a milá?› Kuúng inooín ki beer, ‹Kuungá' aníng ina sié', munguaá dahaaye awa baraá yaamuuhúng kiri sluufmisuú eeré' as adoorí kuungá' xoorór ta xua'aaká kari sagadiyusá' baraá yaamaá xuaawásl wa ale.› »

Mungú i mukós gurbu'ún

²⁰ Xwaylár Yakobo kaangwí bawaak, nee dír múk Yudawo alki/itaak,

²¹ «Iia qaasaak, kuungaáká' iimibo/ nee múk daktana, múk ilaá koóm ala i xumiisiiká, múk iaá koóm ala i axamiisiiaaká.»

²² Anuú AAKOÓ MUNGÚ a kah, «Ahaá aníng mis ilaiwawa/a'aaká? Ahaá mas daaraxa'aaká dír geeraeene? Aníng hhasaangw una qaás tawa harki/isoó tlawi, digmuú tlawi waarahhamko i baloó aleesleeraaká. Tam gwaanduú ma'aay digmuudá' ngu aya, ala gu waarahhiiká, tam i /orootli ala gu waa/akutiiká.

²³ Ala mukwí ku ló'wa mune gawdén nee aa dee/anuút. Aníng iga si'iyé' lohduuín ngiri eehariyé'.»

²⁴ Slám i baraá muner'ín i kaahiaaká, AAKOÓ MUNGÚ, Munguúrén un ilaiwa/aán, kudá' tluwoó hanmiís ar qoomaadá' hariim, tluwoó saxi, nee oo buhaareewo ngu hanmiis, nee umuúqo kurko bu'úngw hhó' ngun hanmiis ar qoomaadá' iwa harin.

²⁵ Dakuúsarhúng kuungá' naa tsuuqaá /ít, nee tlakweemaahúng nuna hhooeemaá /itiyé'.

²⁶ Baraá tla/ángw muk'eene tlakuuse i deer. Múk muruú múk hayoohiím ar /uuru, inooín an adór múk tsir/ór slakaát, tsaaxweeluín ngun qaminá' as muu kuwa ohin.

²⁷ Adoodá' slakaatusmo lakwaanti ngir dalaa/i tsir/ór aa ohini, an adoodá' maray'ín nira hatsiyé' muruú fisooro. An gár inooín is /uuruú kona' nee tas daqaare.

²⁸ An gár inooín tasa wahhadiít niri hhohhoaa'ayé'. Muruú tlákw tlehhtuuwo harqoomaay ngu xuiaaká. Sakwasleema ngi adór ganaá'ár tlehhitiaaká, na/aá panaay ki hariímar'ín i hanmisiiká, laqaá tam gan'amuú múk aa waasla'amuut ku aleekal/anká.

²⁹ Xáy, inqo máwa slahhto as muruuwí sleémeero naa tleehhi'i? Li/aay bu'uto uqo tsuwa máwa dír xoorór adór tihe? Anuú AAKOÓ MUNGÚ tí ngina oó'.

³⁰ Muruú waa/oo/amo nee oo buhhtamís naa ti'iít baraá yaamuukae.

³¹ Aaruuse i lamtá aariiriín, kaahamuusér Mungú muu gun geeraharaahát ar sager'ín, slám muk'eé' adoodá' ga slaa'. Ala alhhe'eesoó tí birna xáy, adór ta /isa' a adoomá?