YEREMIA 49 - Biblía Axweesantá Hhohho' ar Mungú 2004

Mungú múk Amoni gu sakwasleemuut

¹ Axweesantí an tidá' AAKOÓ MUNGÚ aa oó' daanduú múk Amoniwo. AAKOÓ MUNGÚ i kaahi, «Xáy, múk Israeli i daaqoó konkáhe? Xáy, múk Israeli i aaliitér konkáhe? Ahaá ala munguú ta bay Milkomu baré yaamaá Gadi gina aál, nee mukós gixsadá' kay tooín tleéhh?»

² Gawaá adoorihe, AAKOÓ MUNGÚ i kaahi, «Ga/aawaak, deelo ni hardát ar aníng slaqwara ngiwa tlees, /aa/e kiri axaas baraá Rabár Amoniro, inós tari ufuú xwaansláy, nee ayeemaá iisaapaywós kiri daa/ ar asla, aluuwo mukdá' múk Israeli gwaa aal, kuri aal nee múk Israeli.

³ «Múk Heshboni, tsuunqumisé', asma gixsár Ai ka hhaamiis. Ala kuungá' dasuú Raba, /aa/amiimé', guniyadu siinootaak. Tsuunqumisé' nee tii'iimé' amorqá' nee tiqae baraá afeenarhunge. Asma munguú dá' ta bay Milkomu ku huuw baraá loohaay dinkwa nee kaahamuuseerose nee sagadiyuuseerós.

⁴ Kuungaáká' haratlintaaór kooma'aaká mas daara/aandá' ar xatsoohúng, kuungaásingá' daqaari'iima aga harahhife', tawa kata', ‹Atén heé ti qiítl a heemá?›

⁵ AAKOÓ MUNGÚ Aleesleemusmo i kaahi, ‹Ga/aawaak, dae tlaqa ngu gawaahúng i huúw umuúqo barto baraá inslaawayhunge. Kuungá' tundun ar tláy, umuúqo heewo loohirós gan ar oh. Heé múk aa /akumiit gu burumbuúr i kaahh.

⁶ Ala alaá kaangwihe aníng diihhooár múk Amoni an ki/ís. Anuú AAKOÓ MUNGÚ tí ngina oó'.»

Mungú múk Edomu gu sakwasleemuut

⁷ Axweesantí an tidá' AAKOÓ MUNGÚ Aleesleemusmo aa oó' daanduú múk Edomuwo iwa kaahi, «Xáy, sagalooa i káhha baraá Temaniro? Xáy, kudá' daharuú koomá' hara'aya aa qwádi dir'ine? Sagaloa aa qwanaay hhe'ési?

⁸ Yaamuloouusér Dedani, kuungá' /akumiité', warqawé' hota awaak baraá nahhaata. Asma xwaylár Esau aníng a slahh'amií huúw, qoomár ngiwa muux bir naa xeér.

⁹ Barnaxes múk sabiíbuú bu'uúm naa dirhúng i hardáh, sabiíbu nguqo geexáy'a? Barnaxes fisuuse xweeraawo naa hardát, xáy aqo umuú gaaro ngin hhitiná'aáke ay dír nay hhe'eesiya'?

¹⁰ Ala aníng umuú gaaro dír Esauwo aga hayóh, una duúx didaádá' i hotaatina, nahhaata ga malé aleeslayká. Na/iiwós nee hhaeewós nee inslaawaywose kaa hhaamiís. Tam oo wák aa meet i kaahh.

¹¹ Na/iihúng awa panaay mawaak aníng ngi /aymiís, kwaeelihúng aníng i harahhifiye'.»

¹² Asma AAKOÓ MUNGÚ i kaahi, «Barnaxes mukdá' muxtaaro harimaaká kuna muúx, xáy, adór kuungá' muxtaaro tundur may? Aasla'áy, kuungá' muxtaaro tundu baloó mayká.

¹³ Asma aníng lo'o aga /aáy adór gixsár Bosra kar dír dae tlaaq tleehhi, nee a dír waaqaseengw, nee dír taa hhitín nee ar taa lu'ús. Gixsaduuwós awa hatlá' sleémeero ki hhitín.

¹⁴ Kángw amór AAKOÓ MUNGÚ daáhh ugwa axaás, ya/abusmo kwaa ya/aáw amór xoordu iwa kaahi, «Dinkwárí burumburité', haraatlawé' amór Moabu, slaqwé' amoorós.

¹⁵ Ga/aawaak, aníng kuungá' nu bariwasleés baraá xoorduwo, tunduri waaqaaqaa'.

¹⁶ Dae tlaqa nee daara/aangók kudá' ta tlehhit ugwa al/ayiyé', kuúdá' hotaatiím baraá mar'ór tla/uú wa alé nee gawaá sagér tlom'i. Tam do'ók ugwa adór gwareesír wa gáwtí tlehhi, aníng kuúng un gawaasíng wa /arara'aás. Anuú AAKOÓ MUNGÚ tí ngina oó'.

¹⁷ «Múk yaamaá Edomu i dír dae tlaqa tleehhitiyá', nee umuú hee oo aa bihhiidár oohi iri daanda feehhiit, gari niqimis, asma amotlakweedá' taa sláy.

¹⁸ Adoodá' gixsár Sodoma nee Gomora nee ayeemoodá inslaawaydá' kira hhitín, anuú AAKOÓ MUNGÚ tí ngina oó', hee tumu wák oo yaamuudá' wa hoót iri kaahh, laqaá tam oo baraadá' i deél i kaahh.

¹⁹ Ga/aawaak, adoodá' diraangw nir baraá darmuú Yordanír wa /akuuti ay baraá tla/ángw daqtá bee/aangw, an adoodá' aníng múk Edomu ngur guus baraá yaamuuín wa alé. Aníng geeraharusmooeé' oo aníng i iialooeemiís un tsawaár, nee nguri qaás. Asma heé adór aníng a heemá? Heé aníng i sakwasleemuút a heemá? De'eemusmoó aníng i tlaampa'aás a gaalá?

²⁰ Gawaá adoorihe, adoodá' AAKOÓ MUNGÚ aa qoomeés dír múk Edomu iiárií qaasaak, nee adoodá' i tleehhamór wa slai dír yaamuloouusér Temaniwo. Tam deeláy'ín oo bee/aangw kun yaamúr duuruxún, nee kuri ar tláy, múk yaamuudá' hoót tari waa/oo'.

²¹ Afór huuamaaín yaamu giri diingís, afór /aa/eeín kari tlawtá Shamúr wa axaas.

²² Ga/aaweek, wakusmo i gáwtí /akuut adór gwareesi, nee ar hhampi'iiwose gixsár Bosra gari tuuntuuk. Baalaarihe munér pihhuusér Edomu dae gari hatsís adór /ameenír dír asltá xwayla.»

Mungú múk Damasko gu sakwasleemuut

²³ Axweesantí an tidá' aa oó' daanduú Damaskoro. Gixsár Hamati nee Arpadi bayta gaa óh, asma kángw tlákw kwaa axaás. Munér muk'ín aa weeqaawéq as dae, inooín taa amoqwaqwadín adór tlawtá aa /eeraagwa', tidá' xasliitaaká.

²⁴ Múk Damasko ta diqya' tsatmiit, ta alií /akumiit, daér yaariir gaa eér, ta baraá slahh'amu nee gurhaamír yaariir adór /ameenír dír asltá xwayla.

²⁵ Xáy, adór gixsár iiatleer kara geexáy, gixsár aáng qwal/uwo haats.

²⁶ Masoombarós i huuhu'uún baraá afeena, baalaarihe slaqwaruuseerós sleémeero ka hhaamiis. Anuú AAKOÓ MUNGÚ Aleesleemusmo tí ngina oó'.

²⁷ Aníng asla a oohiís, koo/ír Damasko gari /ák, ku/ér gawden awa waawutmo Ben-hadadi gari /ák.»

Mungú tlahhoó Kedari nee gixsár Hasori gin sakwasleemuut

²⁸ Axweesantí an tidá' AAKOÓ MUNGÚ aa oó' daanduú Kedari nee waawuti'iimár Hasoriro tidá' waawutmo Nebukadnesa oo Babuloni aa baál. AAKOÓ MUNGÚ i kaahi, «Sihhiít, tlahhoó Kedari i haraatlaweek múk bihhaá da/aáw hhaamiiseek!

²⁹ Heemaaduín nee bee/angw'ín ki ar tláy, dinkwa nee inqwaruín nee daqaari'iimar'ine, angaamíar'ín ka hayoh, muu iri amor'ín i tseeamín tawa kaahi, ‹Dae tlaqa i umuú bihhi.›

³⁰ Kuungaá yaamuloouusér Hasori, /akumiité' amoorqá' nee tiqae, nahhaaté' baraá boh'e. Asma Nebukadnesa, waawutmoó Babuloni, kaangwí gwa qoomeés daanduuhunge. Taa amohhe'eés kuungá' nuwa i haraatlay.

³¹ Tlawsé', haratlawé' amór xooroodá' diihhooár ar hoot nee ar saxareemár hoot. Anuú AAKOÓ MUNGÚ tí ngina oó'. Xooroorí i afér gixsadaá koondaaká, laqaá hhaftuú muqsla, inós a xoorór kilós hoot.

³² Angamíar'ín ka haasaáng wa ar tláy, hikwaaín kiri haasaáng wa ar tláy. Mukdaádá' suseemaá tlaqaaqatá' gun diyaa/ umuú bihheero. Slahh'amu un huúw umuú bihheero. Anuú AAKOÓ MUNGÚ tí ngina oó'.

³³ Gixsár Hasori i hotaá intsaawe tleehhít, tari xaanxaay kureerisleém. Heé baraaká' hoót i kaahh, tam heé baraadá' i deél i kaahh.»

Mungú múk Elamu gu sakwasleemuut

³⁴ Aarusmo Yeremia axweesantá AAKOÓ MUNGÚ gana axaás daanduú múk Elamuwo, qoomár Sedekia waawuti'iima ngiwa iimu/úngw baraá yaamaá Yudawo.

³⁵ AAKOÓ MUNGÚ Aleesleemusmo i kaahi, «Aníng ga/alér múk Elamu a geeqáw tidá' /uuruuín gu gáwtí koom.

³⁶ Aníng fur'a ngi tleés gawaá Elamu ar badu tsiyhhaawo ngi daahh, aníng inooín in diyaá/ baraá hhapeemo sleémeero, tam xoorór múk Elamu kway diya/iiká iri káhh.

³⁷ Múk Elamu aníng u dae tsaát dír geeraá wakuuser'ín wa ale, nee dír kudá' slafingw'ín gu leelehhiita. Aníng i amotlakweéri huúw ar buhhtaaeé' kudá' xaraaslá'. Anuú AAKOÓ MUNGÚ tí ngina oó'. Aníng paánga a huúw, ngiri eehár ay dír ngay ló'wa hhaamiis.

³⁸ Aníng kitangw'eé' oo waawuti'iima u qaás baraá Elamu, nee waawutmooín nee geeraharuuser'ine in hhaamiís. Anuú AAKOÓ MUNGÚ tí ngina oó'.

³⁹ Alaá kaangwihe. Aníng gixsár Elamu a diihhooarós i ki/ís. Anuú AAKOÓ MUNGÚ tí ngina oó'.»