YEREMIA 48 - Biblía Axweesantá Hhohho' ar Mungú 2004

Hhaamisár Moabu

¹ Axweesantí an tidá' AAKOÓ MUNGÚ Aleesleemusmo, Munguú Israeli aa oó' daanduú xoorór Moabuwo iwa kaahi, «Tsaxwaahúng múk Nebo, asma gixsa ka xaanxay tleehh. Gixsár Kiriataimu kari mureekees, kari hayoh, koo/irós tidá' gawit ka mureekees, kari yaamií daahh.

² Xirfuú múk Moabu aa faák! Baraá Heshboniro ta kangwkoó qoomeemees daanduuwoge, ta kaahi, ‹Gimsé' i hhaamiisaán mindiwa malé xooro tleehhitiyé'!› Kiíng gixsár Madmeni sleeme ti xasltis, paánga iri eehát.

³ Xaysé', iia qaasaak, tsuunqumis ii amór Horonaimu, tawa kaahi, ‹Deewa'ame nee hhitiri'uumár yaariir!›

⁴ Múk Moabu kwaa hhaamiís, /aa/e kaa amór saáwí axaás baraá Soari.

⁵ Asma tawa tsa/aa/an amór Luhiti ta hara /aa/amín, tawa /e/etin amór Horonaimu, /aa/aá hhituru'uuma kina axaás,

⁶ /Akumiité', hhintleemoohúng tu/aak, ta'aaimé' adór daqoó aa nariis oo baraá xaanxaay.

⁷ As koo/irhúng tidá' gawit nee daqaari'iimaro kiwa harahhifé', kuungá' sleeme tundu ar tláy. Mungú kudá' ta bay Kemoshi ku loohatis dinkwa nee kaahamuuseerós nee geeraharuuseerose.

⁸ Tsu/utusmo i waaraahh baraá umuú gixsaro, gixsár ta dakuusi i káhh. Umuú gaaro ar baraá xatsa kan qwaarees, nee yaamaá iintlaaxw kin hhitín, adoodá' AAKOÓ MUNGÚ ngira ooi.

⁹ Múk Moabu hhampe'eerií hanisaak, as niwa /akumiitiya'. Gixsaduuín nin deewaiyá', tam heé baraadá' wa hoót i kaahh.»

¹⁰ Heé gadiyér AAKOÓ MUNGÚ ga tleéhh ar sangareei i tsarere'eeti, heé paángarós ga ila/aám tseere ku'uusaro i tsarere'eeti.

Gixsadaá Moabu ki hhaamiis

¹¹ «Múk Moabu tana hoót ar yaandahhe'eesa iimír masoombi'iimar'ine. Inooín nina xasliitiyé' adór difaáír baraá hutlaay, ar taa warqeesiiká baraá xooslmoó hatlá'. Inooín kaa baloó ar tlayká baraá loohaay. Gawaá adoorihe inooín a adór difaáidá' tsuu', ar slurhhirós aa warqeeriiká.

¹² «Gawaá adoorihe, anuú AAKOÓ MUNGÚ a kah, ‹Ga/aawaak, baala ni hardát ar múk eemiís nguwa ya/aaw, kudá' difaáidá' ga yaamií eemiís, xooslaadá' iri tawo iwít, kari qambeesama' tleehh.

¹³ Qoomaarihe múk Moabu munguúín Kemoshi nguri murér wa ariyá' adoodá' múk Israeli Beteli munguúín kudá' i harahhifiya' ngura murér wa ariyé'.›

¹⁴ «Xáy, múk Moabu adór kuungá' tar oa', ‹Atén a miguuse nee pihhuusér slaqwarár baal›?

¹⁵ Kudá' Moabu aa hhaamiís nee gixsaduwose naa hardáh, masoombar'ín tidá' hhohho' kaa tsu/utár áy.» Tí Waawutmo gan kah, kudá' umuuwós ta bay AAKOÓ MUNGÚ Aleesleemusmo.

¹⁶ Amotlakwér múk Moabu naa tseewuúr, hhaamisarós naa gaanslár hardát.

¹⁷ Kuungá' sleémeero awa inslaawaay, múk Moabu satsuunqumiisaak, nee kudá' sleémeero inós ngi xuá', ta oa', «Adór hhartá waawuti'iima kara giqáy, nee adór hhartá xirif kara giqáy!»

¹⁸ Kuungá' yaamuloouusér Diboni, aweeraré' gawaá xirfuuhúng kwisinge, nee ta iwitá' bará yaamaá kaahaar! Asma kudá' Moabu ga hhaamiís naa hardáh as ngiwa i haraatlay. Koo/irhúng tidá' gawit gaa hhitín.

¹⁹ Kuungá' yaamuloouusér Aroeri, sihhiité', afaá loohi sihhiitaak, xumiisé', umuú hhawaatuú naa ta'aain /ameenír naa kotsqot, yaahasaak ku beera', «Gár naa /awuur?»

²⁰ Múk Moabu kwaa mureekeés, asma kwaa hhitín, tsuunqumisé' nee /aa/amiimé'! Afo ilahanisaak bihhaá yaaér Arnoni adór múk Moabu kura hhaamiís.

²¹ Sakwasleema aa hardát dír gixsaduudaá ayaá gawa, awa alqoomá' kudá' Holoni nee Yasa, nee Mefa'ati,

²² nee Diboni, nee Nebo, nee Bet-diblataimu,

²³ nee Kiriataimu, nee Bet-gamuli, Bet-meoni,

²⁴ nee Kerioti nee Bosra, sakwasleema aa hardát baraá gixsadu sleémeero awa yaamaá Moabu, kudá' tsewen nee awa sawene.

²⁵ /Uuruú Moabu kwa yaamií kalaá/ nee aleesleemuuín kwaa hhitín. Anuú AAKOÓ MUNGÚ ngina oó'.

Múk Moabu ku tsatsa'arees

²⁶ AAKOÓ MUNGÚ i kaahi, «Múk Moabu xufitisaak, asma inooín tina xirfayeemisiyé' as aníng iwa si'iyé'. Gawaá adoorihe, múk Moabu ta gwaagwara'amiit baraá wa/arii'ín wa ale, nee inooín kiri waaqaseesén.

²⁷ Múk Moabu kuungá' inslawiimé' adoodá' múk Israeli kura waaqasaseendé'. Tam inooín kaa al'ohinkahe dinkwa nee fisuuse, ala qoomár bar daandeemaín axwesá' an hara sagerhúng mumukuumisá'.

²⁸ Kuungá' yaamuloouusér Moabu baraá gixsaduhunge ti'iité', hota awaak baraá tla/u. Adór hhooki tleehhité' tidá' do'ós gwaa tlehh dír afaá duxa.

²⁹ Daara/ángw múk Moabu ugwa axaasaán, inooín i ló'wa daara/aná', nee múk hatlá' ngu ara'ariaaká, i daara/aná' naa ihtuumitiyé', naa taqnaa/uumitiyé'.»

³⁰ AAKOÓ MUNGÚ i kaahi, «Aníng saga gawduín u xuú', xirfayemisuuín a lama, tlehhimi'ii'ín sleeme a lama.

³¹ Gawaá adoorihe, aníng a tsuunqumiís as múk Moabu. A /aa/amiím as múk Moabu sleémeero, sleeme a tsuunqumiís as múk Kir-heresi.

³² Aníng sabiíbuú Sibma un ak alee/aa/amiím ta múk Yaseriro. Asma haleemiiwós nina harwaaraahhiyé' tlawto gayuuqá', niri Yaserirí hardihiyé'. Ala mamuuwók awa qoomár fiiqit, nee sabiíbuwók hhitusmo gwaa hhitín.

³³ Qaseengw nee qwala/ kaa hingeés baraá yaamaá Moabuwo, kudá' mamuuwo hatsá'. Difaái aga /oomeés dír kiteeridá' kawa tsoo/iti. Heé mamaá sabiíbu gi tsoo/iít ar qwala/ i kaahh. Tsimaahhír ta axamisaan ar qwal/uwooká.

³⁴ «Múk Heshboni /aa/eeín naa hardihiyé' ay Eleale, nay kumitiyé' nay hardihiyé' iimír Yahasi. Niri dalaa/iyé' iimír Soari, ay Horonaimu, nee Eglat-shelishiya, tam ma'aá yaaér Nimrimu naa /oné'.

³⁵ Aníng heé munguú hatlá' baraá Moabuwo gwa ilahhooár muruú ta tsu/ií haniis, nee gwa mooyángw tsuú' i daa/ gawaá gongoamoowo un suqúw.

³⁶ «Gawaá adoorihe, muunaáeé' i tsuunqumiis daanduú múk Moabu nee oo Kir-heresiro, aníng an adór heé filiímbír ufhhaám dír doó hee iwa gwaá', asma tam daqaari'iimar'ín sleémeero ar taa sláy aa hhaán.

³⁷ Umuú heewo saga nee daamode gaa deéqw. Dabaaín sleémeero ka gwehhaahhín nee tlabaá guniyadu nga siinotiyé'.

³⁸ Gawaá daandeemaá maraá Moabuwo nee baraá lohdaá urene gár hatlá' i káhh aqo har tsuunqusmo kilós. Asma aníng múk Moabu ugwa kwaáhh adór xooslmoó hee aa sií'. Anuú AAKOÓ MUNGÚ tí ngina oó'.

³⁹ Ga/aawaak, adór tara qeqtín! Ga/aawaak adór tar tsuunqumisi! Múk Moabu aa alií kií/ ar mure. Múk Moabu aa gár waaqaseengw tleehhiít, nee gár dae tlaaq dír inslaawaay sleémeerowo.»

Baraá Moabuwo heé kotsqoót i kaahh

⁴⁰ AAKOÓ MUNGÚ i kaahi, «Qaytsiít, Moabu ku gaanslár i haraatláy nee xooro adór gwareesír hhampi'iiwós ga gwet.

⁴¹ Gixsaduín ki hayoh nee ku/er'ín tidá' gawden ka hhaaf. Baalaarihe munér pihhuusér Moabu tari adór muunuú /ameenír dír asltá xwayla.

⁴² Múk Moabu ku hhaamiis tari male xoororooká, asma inooín tina xirfayeemisiyé' as AAKOÓ MUNGÚ nguwa si'iyé'.

⁴³ Kuungaá múk Moabu, dae tlaqa, nee bohoongw nee tsaaxweeli i dír geeraahúng! Anuú AAKOÓ MUNGÚ tí ngina oó'.

⁴⁴ Heé dae tlaqa gwa ilagoow in /eet baraá bohoongw, heé naa baraá bohóngw wa ti'iit tsaaxweeli gun ót. Aníng muruuwí ngu huúw dír múk Moabu, kurkú muxtar'ín bira xeér. Anuú AAKOÓ MUNGÚ tí ngina oó'.

⁴⁵ Múk aa slaaqamiit i huungu/umaá waydú leelehhitiyá' dír gixsár Heshboni, asma asla aa ót baraá gixsár wa alé. Tsángw asla naa tláy amór doó waawutmo Sihoni wa alé. Yaamaá Moabu gaa hhaamiís, asla tlom'aá mukwí oo taamberuuse gaa /ák.

⁴⁶ Tsaxwaahúng kuungaá múk Moabu! Múk mungú Kemoshi daxta kwaa hhaamiís. Daaqayhúng kwaa loohatís nee dasuuhúng kura tláy baraá loohaay.

⁴⁷ Tam adoorihe aníng múk Moabu un diihhooárí ki/ís de'emaá hi'iita'a. Anuú AAKOÓ MUNGÚ tí ngina oó'. Kaangwí an sakwasleemár múk Moabu gu slaw.»