YEREMIA 47 - Biblía Axweesantá Hhohho' ar Mungú 2004

Ya/abtór Mungú dír múk Filisti

¹ Kaangwí an axweesantá AAKOÓ MUNGÚ tidá' aarusmo Yeremia aa axaás daanduú múk Filistiwo, dír Farao gixsár Gasa ngiwa i haraatlayká.

² AAKOÓ MUNGÚ i kaahi, «Ga/aaweek, ma'aay naa bihhaá /iíkwá haratlayé', nee ma'ayká' tari yaaér aa tunqaywa/, inós yaamu sleémeero gi gú/ nee umuú gár baraadá' hoota, gixsa nee yaamuloouuse, tidá' baraadá' hoot. Muu iri /aa/amín, yaamuloouuse sleémeero tari tsuunqumiis.

³ Inooín kididiheelíngw faras ku axaas, nee tsimaahhír gaardaá slaqwara, nee kuduuduhár /angeegeuú gaardu kari axaas, baabi'i na/ii'ín kiri máy amohhe'eemisuuwo, asma dabaaín naa tsatiitiyé' ló'wa aleeró.

⁴ Asma baalár múk Filisti sleémeero kuwa hhaamisi naa hardát, kun hhaamiis iimír Tirór wa tleemu ay Sidoni, umuúqo alee/isusmoó aa meet sleeme. Asma AAKOÓ MUNGÚ múk Filisti gu hhaamimiis, mukdá' aa meet oo yaamaá Kaftori kudá' tla/ángw tlawi.

⁵ Múk Gasa se'engw'ín ku deeqw asma tawa tsuunqumisi. Gixsár Ashkeloni kaa qwaareés. Xáy kuungaásingá' aga mete' baraá xatstá ayaaín, ay xaylá ti kiloohúng siiqaaqita' as gurhaami?

⁶ Aá, paángár AAKOÓ MUNGÚ, ay xaylá ta kumaamit? Dír tara tsauuriká kií/ baraá tlakwaywók, ta hungu/ús, xasliít.

⁷ Ala adór tsauuwa ngir aleesleer, qoomár AAKOÓ MUNGÚ bar ngaa gadiyeédií sláy. Daanduú gixsár Ashkeloni, nee yaamaá afaá tlawi, amoodá' ngay tleesi.»