YEREMIA 41 - Biblía Axweesantá Hhohho' ar Mungú 2004

¹ Qoomár slahhángw faanqwe Ishmaeli garmoó Netania garmoó Elishama, kuduú xwaylár doó waawutmo, heé wák baraá tla/ángw geeraharuusedár uren ar waawutmo, nee múk mibaangw tari altláy ay baraá yaamaá Mispa, tari hardáh dír Gedalia garmoó Ahikamu. Qoomár tawa al/ayin baraadaá Misparo,

² Ishmaeli garmoó Netania nee mukós kuduú mibaangw Gedalia garmoó Ahikamu garmoó Shafani nguri gaasiyé' ar paánga. Gedaliawí an kudá' taa tsawaár aáng nee waawutmoó Babuloni as tawa ga/aawusmoó yaamu.

³ Ishmaeli sleeme múk Yahudi nee slaqwaruusér múk Kaldayo, tidár dinkwa nee Gedalia, sleémeero gina tsuú/.

⁴ Bál tsár alaá Gedalia kuwa gaás, qoomár kaangwí dír muu nguwa axaasiiká,

⁵ múk mibeeraá dakaát ina hardáh oo yaamaá Shekemúr daáhh, nee Shilo nee Samaria, i ilahhooár mooyángw tsuú' koná' as ngiwa hanmiisiya' baraá Doó AAKOÓ MUNGÚ i aleeró. Daamoduuín nga deeqwiyé'. Inooín tlabaaín naa feehhamamitiyé' nee taa gwehhaahhiné'.

⁶ Ishmaeli garmoó Netania iri ti'iít as ngiwa al'ay, i hara /aa/amín giri báy, «Do' awaare' baraá doó Gedalia garmoó Ahikamu.»

⁷ Mukdá' tawa dáh baraá gixsa, Ishmaeli garmoó Netania nee mukós kuduú mibaangw mukdá' kuri tsuú/ nee tu'uuín kiri /aytimiís baraá hhalaangw.

⁸ Ala múk mibaangw baraá tla/angw'ine Ishmaeli nguri bayé', «Gám na'ás, miti tsu/aar, asma atén balángw yaariír oo angaáno, nee angaánoó shayiíri, nee di/i nee danuhe iga lu/aán baraá qaymo.» Naagáy mukdá' guri meetiís dinkwa nee mulqer'ine.

⁹ Hhalangwdá' Ishmaeli tuaá mukdá' ngay kwakwaáhh ku ló'wa úr. Hhalangwdá' kuna foól nee waawutmo as tiwa xun dír Ba'asha waawutmoó Israeliro. Ishmaeli garmoó Netania hhalangwdá' guri dalaá/ tuaá mukdá' aa tsu/i.

¹⁰ Aluuwo mukdá' sleémeero aa meet baraá Mispa nee dasuú waawutmowo, mukdá' aáng Nebusaradani, geeraharusmoó úr oo xuumuuse, aa qaás baraá Gedalia, Ishmaeli garmoó Netania guri ar waaraáhh baraá yaamaá Amoni.

¹¹ Ala Yohanani garmoó Karea nee geeraharuusér slaqwara sleémeero kaangwí tlákw Ishmaeli garmoó Netania aa tleéhh nguwa axaasiyé',

¹² muk'ín sleémeero kuna burumbuúr, tari slaqwarár áy amór Ishmaeli. Ishmaeli kuri dír tlahhsaadá' ur ar Gibeonírí áy.

¹³ Nee qoomár mukdá' sleémeero tara tláy nee Ishmaeli, Yohanani garmoó Karea dinkwa nee geeraharuusér slaqwaruuse kawa ár tari qwalaá/.

¹⁴ Naagáy mukdá' sleémeero Ishmaeli ira tlay baraá Mispa wa aleeró, tari warqáy tari kií/ amór Yohanani garmoó Karea.

¹⁵ Ala Ishmaeli garmoó Netania nee mukduú dakaát nari kotsqotiyé' dír Yohananiwo, tay /akumiít yaamaá Amoni.

¹⁶ Naagáy Yohanani garmoó Karea dinkwa nee geeraharuusér slaqwaruuse sleémeero, mukdá' sleémeero aa meet, kudá' Ishmaeli garmoó Netania nira tláy amór Mispa wa aleeró, alaá Gedalia garmoó Ahikamu nguwa gaás, slaqwaruuse nee nee /ameena, na/ii nee mukdá' taa karmuumuyi, Yohanani mukdá' sleémeero nguri Gibeonír wa watlís.

¹⁷ Naagáy nari hotaá ayé' Geruti Kimhamu isaapoó Betilehemu, as niwa dahmaá slaiya' yaamaá Misri,

¹⁸ asma tawa múk Kaldayo da'ayumiti. Asma Ishmaeli garmoó Netania, Gedalia garmoó Ahikamu, kudá' taa qaás ga/aawusmoó wa alé nee waawutmoó Babuloni nguwa gaás.