YEREMIA 40 - Biblía Axweesantá Hhohho' ar Mungú 2004

Yeremia nee Gedalia i hootiyá'

¹ Axweesantá AAKOÓ MUNGÚ Yeremia gana axaás qoomár Nebusaradani geeraharuusmoó xuumuusér waawutmo, Yeremia nguwa ya/aamár i haniís iwa tlay baraá Ramaro. Geeraharusmoowí Yeremia guri ar tláy, qoomaarihe Yeremia dabaawós kaa tseék ar piíngu dinkwa nee múk hatlá' oo Yerusalemu sleémeero nee oo Yuda kudá' taa huúw baraá loohaay.

² Geeraharusmooduú xuumuuse Yeremia guri ar tláy guri báy, «AAKOÓ MUNGÚ, Munguúwók yaamuuká' gina amotlakweérí káh.

³ Hám daxta AAKOÓ MUNGÚ tidá' sleémeero aa káh gaa boo/eés, asma kuungá' inós una sadakusé', nee afoorós aga iialooeesi'iiká, an gár muruuwí nusa sláy.

⁴ Ga/aaweek, aníng kuúng ugwa gweér, daxta kuúng bara aán i qoón tawa tlawaan ay Babuloni, gimáy daxta ti alkoomaán, aníng kuúng un amohhe'eemiís. Barnaxes kuúng a sla'aká tiwa alkoomaan ay Babuloni, ala ma daqawaar. Ga/aaweek, yaamu sleémeero i dír geeraawók, amór ta keemuúwa sla' kaweek.

⁵ Bar meetángw slá', tláw amór Gedalia garmoó Ahikamu garmoó Shafani, kudá' taa ga/aawusmoó gixsadaá Yuda wa qaás nee waawutmoó Babuloni, hoót tla/ángw múk wa alé. Bar adooriheeká tláw amoodá' kuúng ta sla'.» Naagáy geeraharusmoduú xuumuuse Yeremia guri muruú /aymár i haniís nee qeemuuwo, guri geemáy iwa tlay.

⁶ Aluuwo Yeremia iri tláy amór Gedalia, garmoó Ahikamu baraá Mispa, inós nee mukdá' aa baraadií meet tari alhoót.

Gedalia ga/aawusmoó Yuda

⁷ Qoomár geeraharuuse sleémeero ar slaqwaruuse tidá' baraá aya dinkwa nee muu sleémeero ngiwa axaasiyé' adór Gedalia garmoó Ahikamu kura ga/aawusmoó wa qaás nee waawutmoó Babuloni, daanduú muu sleémeero kudá' aa meet oo hhawaate, nee /ameena nee na/iiwo, nee mukduú narkuute oo baraá yaamudá' taa huwiiká baraá loohó Babuloni,

⁸ inooín niri tlayé' ay dír Gedalia baraá Mispa. Mukwí inooín an xwaylár Ishmaeli garmoó Netania, nee Yohanani nee Yonatan daaqoó Karea, nee Seraya garmoó Tanhumeti, nee garmoó Efai kuduú Netofa, nee Yesania garmoó Ma'akati, inooín nee muk'ine tina alkoné'.

⁹ Gedalia garmoó Ahikamu, garmoó Shafani lo'o gari /aáy dír geeraaín nee dír geeraá muu, iwa kaahi, «Múk Kaldayo kuwa sagadiyuusa' ma da'ayumitaara'. Baraá yaamuuká' wa hooté' nee waawutmoó Babuloni kuwa sagadiyuusa', daqaní umuú gaaro dirhunge i qoón.

¹⁰ Aníng a hoót baraá gixsár Mispa wa alé, an daanduhúng wa sihhiít dír geeraá múk Kaldayo kudá' amoorén káw, ala kuungá' difaái na burumburaak nee mamaá qoomár age, nee di/to, hooté' baraá gixsaduudaá aalirhunge.»

¹¹ Nee qoomár múk Yuda kudá' baraá yaamaá Moabu hoót nee yaamaá Amoni nee awa Edomu, nee yaamaá hatlá' kawa axaás adór waawutmoó Babuloni Gedalia garmoó Ahikamu, garmoó Shafani gura ga/aawusmooín wa qaás.

¹² Aluuwo múk Yuda sleémeero niri waatliyé' baraá ayeemoodá' sleémeero aáng ki diyaa/i, tari daqáy amór Gedalia baraá Mispa. Inooín difaái nee mamaá xaai kudá' qoomár age ngina ló'wa burumburiné'.

Gaasár Gedalia

¹³ Naagáy Yohanani garmoó Karea dinkwa nee geeraharuuse sleémeero ar slaqwaruuse nina hardihiyé' dír Gedalia baraá Mispa, kuri báy,

¹⁴ «Xáy, kuúng hám a xúa adór waawutmo Ba'alisi oo Amoni Ishmaeli garmoó Netania ngura ya/aáw as kuúng uwa gaasi?» Ala Gedalia garmoó Ahikamu axweesantí gaa looeesiiká.

¹⁵ Naagáy Yohanani garmoó Karea iri axweés nee Gedalia ar naaqo amór Mispa wa alé, guri báy, «Xaa ya/aám, án Ishmaeli garmoó Netania ngu gaás, nee tí hee tumu wák mingiwa xuú'. Ahaá waáy, inós kuúng gár us gaasi a milá, nee múk yaariír kwí oo Yahudi aa burumburiit gár is diya/aati nee paanaywí oo Yuda kus hhaamisi?»

¹⁶ Ala Gedalia garmoó Ahikamu Yohanani garmoó Karea guri báy, «Gám adoosíng ma tleehhaar kuúng Ishmaeli un lámtí tláq.»