YEREMIA 38 - Biblía Axweesantá Hhohho' ar Mungú 2004

Yeremia kuwa /aytiís baraá hhalaangw

¹ Shefatia garmoó Matani nee Gedalia garmoó Pashuri, nee Yukali garmoó Shelemia, nee Pashuri garmoó Malkia, axweesantadá' Yeremia aa oó' dír muu sleémeero ngina axaasiyé', iwa oó'.

² AAKOÓ MUNGÚ i kaahi, «Heé baraá gixsárí meét ku gaas ar paánga, nee ar giyeé nee ar tiqtír pu/i. Kudá' haragwaá' amór múk Kaldayo, slafiingós gu /iis. Tam lawaalmoowo ala slafiingós gwaa /iís.»

³ AAKOÓ MUNGÚ i kaahi, «Ar tsuwa ló' gixsarí ka dabaá slaqwaruusér waawutmoó Babuloni i haniis, nee gari hayoh.»

⁴ Geeraharuuse waawutmo guri beér, «Heewí gár kuwa hariím a gaasa, asma i slaqwaruusér diqiya' tlaaq nee mukdá' aa baraá gixsarí meeti. Baraá axweesanaywós kwihe inós mukwí gu hhooárí slaiiká, ala gár ngwi slai a amotlakwe.»

⁵ Waawutmo Sedekia iri oó', «Ga/aawaak, inós i gawaá dabaahúng, aníng kuungá' ila/aro nu aleeslawaaká.»

⁶ Naagáy Yeremia nguri /aytisiyé' baraá hhalángw Malkia garmoó waawutmo, hhalangwdú baraá doó xuumuuse, Yeremia kuri baraadá i /aytiís ar him'e. Baraá hhalangwdae ma'aay i kahhiyá', a har baa/í kilós. Yeremia iri /eét baraá baa/i.

⁷ Ebedmeleki kudaádá' taa karmúy oo Kushi kudá' gadiyuús baraá doó waawutmoó wa aleeró, inós gana axaás adór Yeremia kura /aytiís baraá hhalaangw. Qoomaarihe waawutmo aa iwiít dír afkú gixsa kudá' ta bay Benyamini.

⁸ Naagáy Ebedmeleki iri tláy ay dír waawutmo guri báy,

⁹ «Waawutámo, aakooeé', mukwí adór tlaakw gaa tleéhh, aarusmoodá' ta bay Yeremia ngwa /aytisiyé' baraá hhalaangw, heeqá' i gwaa' qwarko, asma muruú /aymár aa baraá gixsárí meet i kaahh.»

¹⁰ Naagáy waawutmo heeduú Kushi ta bay Ebedmeleki guri báy, «Tláw nee múk tám huweek, aarusmo Yeremia duuxaak baraá hhalaango dír ira gwaaiiká.»

¹¹ Naagáy Ebedmeleki nee mukdá' tari tláy amór doó waawutmo, tari dáh ay baraá meewér doó waawutmo, Ebedmeleki tlawuú aa gwaa' guri taataáhh guri /aytiís ar hima amór Yeremia.

¹² Ebedmeleki heedaádú Kushi Yeremia guri báy, «Inqwarirí qaaseek baraá slare'eeriwók, daqaní himuuwí daanduú inqwaari tir ohish.» Yeremia adoorí gari tleéhh.

¹³ Yeremia nguri uuruxiyé' ar him'e, nguri duuxiyé' baraá hhalángw wa alé. Alaá tihe Yeremia iri hoót dír afeenidár xuumuusér wa ale.

Sedekia i gurbu'utá Yeremia yaahamiis

¹⁴ Qoomarkaro waawutmo Sedekia gana slaá' tawa axweesi nee aarusmo Yeremia. Naagáy iri oó', «Yeremia huwaare' dír afkú tám oo Doó AAKOÓ MUNGÚ.» Tawa didá i dirii'i waawutmo Yeremia guri báy, «Yaahasarka a koóm, gaa tam gaalá ma duquumaar.»

¹⁵ Yeremia Sedekia guri mu/aywaáts, «Xáy, aníng kuúng bura looeemaá báw aqo in gáske? Bur hara'ayima, a iiárií qása?»

¹⁶ Waawutmo Sedekia lo'o gari geeraá Yeremia wa /aáy ar naaqo, iwa kaahi, «Adoodár AAKOÓ MUNGÚ ir hotaatina, aníng kuúng u gaasaaká, laqaá u dabaá múk u slahh'eemiís i qaasaaká.»

¹⁷ Yeremia Sedekia guri báy, AAKOÓ MUNGÚ Aleesleemusmo, Munguú Israeli i kaahi, «Kuúng bar aga ya/aán tiwa hanis baraá dabaá geeraharuusér waawutmoó Babuloni, daqaní slafiingók u tú/, nee gixsarí ka da/iiká ar asla, kuúng nee múk do'oge tundu tsu/iiká.

¹⁸ Ala kuúng bar aga ya/andiiká tiwa hanis gawaá dabaá geeraharuusér waawutmoó Babuloni, gixsarí kan haniis dír múk Kaldayo, ngiri da/iyá' ar asla nee kuúng ti /iská baraá dabaaine.»

¹⁹ Waawutmo Sedekia Yeremia guri báy, «Aníng mukduú Yahudi aa haragwaa' amór múk Kaldayo u daimiít, wané aluuwo aníng ti dir'ín i haniis, tiri slahh'eemiis.»

²⁰ Yeremia iri oó', «Kuúng tu dir'ín i hanisiiká. Kuúng afór AAKOÓ MUNGÚ iialooeeseek baraá tí u babaawa, daqaní adoorók i qoón nee slafiingók u tú/.

²¹ Ala barnaxes kuúng dabaawók i haniská dir'ín, iigu'utuú AAKOÓ MUNGÚ naa dir'eé' laqán a kwí,

²² ga/aaweek, /ameena sleémeero tidá' taa geexáy baraá doó waawutmoó Yuda, kana huúw ay amór geeraharuusér waawutmoó Babuloni, i kat, ‹Waawutmo kwa al/aáy nee mulqeerós ar kilá' nee kuri baál, hám daxta inós aa /eét baraá buunqa, mulqeerós gwa baraadá' i geexeér.

²³ Tlaawaywók sleémeero nee daaqaywoge ki huuw amór múk Kaldayo, nee kuúng sleeme a /uuraaká. Kuúng tun ar tláy nee waawutmoó Babuloni, nee gixsarí kari daa/ ar asla.› »

²⁴ Aluuwo Sedekia Yeremia guri báy, «Kaangwí taa axweesaán miwa ti'imiít amór muu, kuúng daqaní tu gaasiiká.

²⁵ Barnaxes geeraharuuse kaangwí nee kuúng taa axweesaán ngwaa axás, tawa kaahi, ‹Kaangwí kuúng nee waawutmo taa axwesé' dirén i ooang, ma gaa lu/aar, daqaní atén kuúng u gaasanaaká.›

²⁶ Daqaní kuúng ki beer, ‹Aníng waawutmo una fiririím as mitiwa ki/ís baraá tseegamo amoodár doó Yonatan as mawa amoodá' i gwaá'.› »

²⁷ Naagáy geeraharuuse sleémeero iri hardát dír Yeremia nguri yaahasiyé'. Inós giri mu/aywaáts ar adoodá' waawutmo ngwaa báy, inooín nguri mayé' asma heé axweesantadá' inós nee waawutmo taa axweés gaa axaas i kaahh.

²⁸ Yeremia iri hoót dír afeenidár xuumeesér wa alé ay baldá' gixsár Yerusalemu kawa hayóh.