YEREMIA 37 - Biblía Axweesantá Hhohho' ar Mungú 2004

Sedekia iwa Yeremia firiirin

¹ Waawutmo Nebukadnesa oo Babuloni, Sedekia garmoó Yosia guri waawutmoó múk Yuda wa qaás kitángw Konia garmoó Yehoyakimu.

² Ala Sedekia nee geeraharuusér hatlá' dinkwa nee yaamuuloouusér ayaá Yuda axweesantá AAKOÓ MUNGÚ tidá' Yeremia aa káh ngaa iiárií qaasi'iiká.

³ Waawutmo Sedekia Yehukali garmoó Shelemia dinkwa nee kaahamusmo Sefania garmoó Ma'aseya gina ya/aáw amór aarusmo Yeremia nguwa baya', «Atén ti aleefiriin dír AAKOÓ MUNGÚ, Munguúrene.»

⁴ Yeremia i amór múk kaakáy, asma qoomaadae kwaa tseegiiká.

⁵ Slám askaárír Misri ar Farao nina ayaaín wa tleér, nee slaqwaruusér Kaldayo tidá' gixsár Yerusalemu ga harwet, adoorí ngiwa axaás, tari quútl.

⁶ Naagáy axweesantá AAKOÓ MUNGÚ aarusmo Yeremia gari axaás i kat,

⁷ «Anuú AAKOÓ MUNGÚ, Munguú Israeli a kah, waawutmoó Yuda kudá' kuúng ugwa ya/aw as aníng iwa firiin, ku beer, ‹Ga/aaweek slaqwaruusér Farao tidá' naa hardat as kuúng uwa alee/is, i kí/ baraá yaamaá Misri, ayaaín kudá' ta dahhi.

⁸ Slaqwaruusér Kaldayo ni malé kí/ slaqwaraaro dír gixsarí. Gixsarí ngi hayoohiyá', nee ngiri da/iyá' ar asla.›

⁹ Anuú AAKOÓ MUNGÚ a kah, miti kiloohúng al/agiimara' tawa kata', ‹Slaqwaruuseedár Kaldayo aa tleér.› Asma i baloó tleeraaká.

¹⁰ Kuungá' slaqwaruuseedár Kaldayo sleémeero, tidá' nee kuungá' slaqwá' tam bala'a, nee múk taa hariaa'áy iri meet baraá slumooín, mukdá' taa hariaa'áy nin baraadá' wa sihhiitiyá', gixsarí kari daa/ ar asla.»

Yeremia kuwa óh

¹¹ Aluuwo qoomár slaqwaruusér Kaldayo gixsár Yerusalemu ngiwa geexeér, as slaqwaruusér Farao tidá' na tseewuur ngiwa ilaagop,

¹² Yeremia ina Yerusalemúr wa tláy ay yaamaá Benyamini as yaamuuwós ngiwa oohi.

¹³ Qoomár iwa dír Afkú dahma oo ta bay, «Benyamini» xuumusmoó wák oo ta bay Iriya garmoó Shelemia garmoó Hanania, Yeremia guri óh, guri báy, «Kuúng an /akumít as tawa haraagwa' amór slaqwaruusér Kaldayo.»

¹⁴ Yeremia iri oó', «Adoosíng a lama. Aníng a /akumitaaká as niwa haragwaa' amór slaqwaruusér Kaldayo.» Ala Iriya tidá' Yeremia i kaahi gaa axaasiiká. Naagáy Yeremia guri óh, guri huúw amór geeraharuuseedá' uren.

¹⁵ Geeraharuusedá' mune gari tsú/ dír Yeremia kuri muúx, nguri dahaasiyé' baraá doó tseegamo. Do'oduú goousmo Yonatan kudá' taa doó tseegamo tleéhh.

¹⁶ Yeremia kuwa tseék iri baraadií meét deelór yaariire,

¹⁷ waawutmo Sedekia guri ateét, guri do'ós i dah'ís. Qoomár iwa do'ós i dirii'i, guri yaahaás ar naaqo, «Gám axweesantá ta koon ar amór AAKOÓ MUNGÚ daahh i deéro? Yeremia guri báy, «Eeít i deer.» Yeremia iri oó', «Kuúng tu qaas baraá dabaá waawutmoó Babuloni.»

¹⁸ Aluuwo Yeremia waawutmo Sedekia guri yaahaás, «Gám gár naa tlakweés diroge a milá? Laqaá sagadiyuuserók gár tlaakw ngay tleéhh a milá? Laqaá mukók kwí gár nguwa sadakuús? Ahaá misa tsék?

¹⁹ Aaruuseerók tidá' ugwa i aaraariin i amá, tidá' ugwa baabeer, ‹Waawutmoó Babuloni kuúng u iharaatlayká laqaá yaamuuká'?›

²⁰ Hám daxta, aníng kuúng un firiím, iia qaaseek, aakooeé' waawutámo, aníng mi malé baraá tseegamór i ki/isar, baraá do'odú goousmo Yonatan asma aníng a baraadií gwaá.»

²¹ Waawutmo Sedekia hara'aya gari oó', Yeremia kuwa tseegi dír afeenidá xuumuuse i xumxaaxuun, nee kuwa mikaátér i hanimisi umuú deelooro nee mukdá' mikaátér tlehhahhiít ay dír mikaatedá' ii fak baraá gixsaadae. Naagáy Yeremia iri dír afeenidár xuumuusér wa hotaatín ay qoomár gixsár Yerusalemu kawa hayóh.