YEREMIA 35 - Biblía Axweesantá Hhohho' ar Mungú 2004

Yeremia nee múk Rekabu

¹ De'emaá waawutmo Yehoyakimu garmoó Yosia, waawutmoó Yuda, Yeremia axweesantá AAKOÓ MUNGÚ gana axaás, i kat,

² «Tláw dír múk gurú doó Rekabu, axweés nee múk do'odá'. Daqaní mukdá' ngu húp baraá doó AAKOÓ MUNGÚ, baraá kutuwír wák, ki difaáír i hanís, ka wahi.»

³ Ya'asania garmoó Yeremia, garmoó Habasinia nee hhaeewose ngiri ar tláw, dinkwa nee daaqaywós sleémeero, nee muu sleémeero oo guruú doó Rekabu.

⁴ Inooín sleémeero ngiri huúw ay baraá doó AAKOÓ MUNGÚ, dír kutuwír garmoó Hanani, garmoó Igdalia heé Mungú. Kutuwidá' ka tseew dír kutuwír geeraharuuse, i gáwtí dirí' dír kutuwír Ma'aseya garmoó Shalumu, xuumusmoó do'odá'.

⁵ Aluuwo búkloó haáts difaáiro, nee slooqi'iiwo ngiri qaás dír geeraá múk guruú doó Rekabu ngiri báw, «Difaái wahaak.»

⁶ Ala inooín aníng iri bayé', «Aasla'áy, atén difaái a wahaanaaká, asma Yonadabu garmoó Rekabu, baabuúrén, atén tina adoorír hara'ayín, iwa kaahi, ‹Difaái ma wahaara'. Kuungá' ma wahaara' laqaá tam na/iihúng ay kureeri sleém.

⁷ Nee maraay mi tleehhara', qamu mi dooslara' laqaá tam qamaá sabiíbu mi koomara'. Ala kuungá' aqo an hotá' baraá heemadú wa alé deelo sleémeero ar hotangwhunge, as tawa hota' deelór yaariir baraá yaamuwo adór dahaaye.›

⁸ Atén afór Yonadabu baabuúrén, ana ilaiwawa/aán, tidá' sleémeero atén tiwa hara'ayín, ar difaái ngiwa wahaanaaká baraá slafingwrén sleémeero, ateénaá kilá', nee tlaawayrene, nee daaqayrene, laqaá tam dasuurén.

⁹ Atén maraá hota i tlehhitanaaká, laqaá qamaá sabiíbu i koomanaaká, tam qamaá ta balaángwí dahamisaan i kahhiyá'.

¹⁰ Ala atén aqo ana hootatimaán baraá heemadú wa ale, nee tidá' baabuúrén Yonadabu naa hara'ayín ana iialooeesaán, nee an tlehhitaán.

¹¹ Ala qoomár Nebukadnesa waawutmoó Babuloni, yaamuuká' ngiwa i haraatláy, atén tay ooaán, ‹Qwalaasé', a tlawaán Yerusalemu, as slaqwaruusér múk Kaldayo nee ar Aramuwo kawa ilaguwaan. Hám daxta an hootaán baraá yaamaá Yerusalemúr wa aleeró.› »

¹² Aluuwo Yeremia axweesantá AAKOÓ MUNGÚ gari axaás, i kat,

¹³ «Anuú AAKOÓ MUNGÚ Aleesleemusmo, Munguú Israeli a kah, tláw múk Yuda nee yaamuloouusér Yerusalemu ka beer, ‹Xáy, kuungá' intsaahhasar'eé' nee axweesante'eé' iiárií qaasaro gár kas aleesleera'aaká?

¹⁴ Hara'ayaadá' Yonadabu garmoó Rekabu, aa na/iiwós i hara'ayín ar difaái ngiwa wahiaaká nga boo/eesiyé'. Inooín difaái ka wahanká tám ay laarí, asma hara'ayadár baabuúín ngina iialooeesiyé'.› Ala tidá' aníng ni kuungá' i axweemamiís umuú daqto, kuungá' iga iiárií qasi'iiká.

¹⁵ Umuú daqto nuna sagadiyuuser'eé' ya/abiít ar aaruuse, umuú daqto ngina ya/abiít, niwa káh, ‹Umuú heewo tlehhmi'iiwós kudá' tlakw ngi may, tlehhmi'iiwós ngi qwatsi, nee slaqsa'aá hatlá' munguaá eeharto nee sluufmisuuwo ngi may. Adoorí bara tlehhé', a hotá' baraá yaamuudá' naa baabi'iihúng i haniís.› Kár ala kuungá' iia aga qasi'iiká, laqaá tidá' naa káh aga iialooeesi'iiká.

¹⁶ Na/aá Yonadabu garmoó Rekabu, hara'ayadár baabuúín ngaa oohiyé', ala mukwí aníng iga iialooeesi'iiká.

¹⁷ Gawaá adoorihe, anuú AAKOÓ MUNGÚ Aleesleemusmo, Munguú Israeli a kah, ‹Aníng múk Yuda nee yaamuloouuse sleémeero ar Yerusalemu a amotlakwérí huúw, tidá' naa oiím dir'ín i alé, asma aníng ana axweés, ala inooín iga iiárií qaasi'iiká, ina ateét, ala naa ooin'iiká.› »

¹⁸ Ala Yeremia múk doo Rekabu guri báy, AAKOÓ MUNGÚ Aleesleemusmo, Munguú Israeli i kaahi, «Asma kuungá' hara'ayár baabuúhúng Yonadabu kawa iialooeesé', nee intsaahhasarós kawa eehadá', nee tidá' sleémeero na kuungá' báy kay oté',

¹⁹ gawaá adoorihe, anuú AAKOÓ MUNGÚ Aleesleemusmo a kah, Yonadabu garmoó Rekabu dirose heé aníng i sagadiyuús i baloó qwaariiká.»