YEREMIA 34 - Biblía Axweesantá Hhohho' ar Mungú 2004

Ya/abtór taa amór Sedekiáwí huúw

¹ Qoomár waawutmo Nebukadnesa oo Babuloni nee slaqwaruuseerós, nee slaqwaruusér xoordaá hatlá', kudá' inós aa baál, tawa slaqwi nee Yerusalemu nee gixsadaá iisaapaydá'. Axweesantá AAKOÓ MUNGÚ Yeremia gana axaás, i kat,

² Anuú AAKOÓ MUNGÚ, Munguú Israeli, a kah, «Tláw, waawutmo Sedekia oo Yuda ku beer, ‹Anuú AAKOÓ MUNGÚ gixsarí a qaás baraá dabaá waawutmoó Babuloni, nee gari daa/ ar asla.

³ Kuúng a baloó kotsoqotká dirose, ala looeemaawo, kuúng tu oh, turi baraá dabaawós i qaas. Iltók nee tós ti doogiyá', nee tari axwesá' nee inós, aluuwo kuúng turi ar tláy ay Babuloni.›

⁴ Tam adoorihe, kuúng Sedekia, waawutmoó Yuda, axweesantá AAKOÓ MUNGÚ daanduuwoge iiárií qaaseek, kuúng tu gaasiiká ar slaqwara.

⁵ Ala kuúng a gwá' ar wayda, adoodá' baabi'iiwók kira mooyángw tsuú' i da/aa/án, nee adoodá' waawitaádá' diroge aa giirin kura mooyángw tsuú' i da/aa/án, kuúng sleeme tu adoodá' /iis. Kuúng tu sa tsuunqumiis, nee tawa kaahi, ‹Ooyeey, waawutmoorén aa gwaá'!› Asma anuú AAKOÓ MUNGÚ kangwí nguna oó'.»

⁶ Naagáy Yeremia kangwdá' guri dír waawutmo Sedekia i oó' baraá Yerusalemúr wa aleeró.

⁷ Qoomaarihe slaqwaruusér waawutmoó Babuloni ta slaaqw nee gixsár Yerusalemu, nee gixsadaá hatlá' awa Yuda, kudá' naa meetiye' adór gixsár Lakishi nee Aseka, asma an gixsadaá koo/i gawden baraá yaamaá Yudawo.

Gweermór al/ayma ar lawaale

⁸ Kaangwí an axweesantadár AAKOÓ MUNGÚ Yeremia aa axaás, alaá waawutmo Sedekia nee muu sleémeero oo Yerusalemu al'axweesani ngiwa qaasiyé', ar muu kuwa gweeri baraá tseegamooro.

⁹ Muk'ín oo Yahudi kudá' aa lawaale tleehhiit, hhawaate nee /ameenaaro, as kahhó' hee tumu wák heé Israeli munguwa lawaalmo tleéhh.

¹⁰ Muu sleémeero nee geeraharuuser'ín, kudá' alqadoodá' ngaa ya/ane' tari kaahi slayé', as lawaale kawa gweeri ar hhawaate nee /ameenaaro, nee tawa kumiitiiká muu lawaalér wa ohiingo. Inooín muu kuri gweér.

¹¹ Aluuwo inslaway'ín kuri warqeés, tari kumiít muu kuwa lawaalér wa ohin, hhawaate nee /ameenaaro, kudá' aáng taa gweér.

¹² Aluuwo axweesantá AAKOÓ MUNGÚ Yeremia gari axaás, i kat,

¹³ «AAKOÓ MUNGÚ, Munguú Israeli i kaahi, ‹Alqado ana qaás nee baabi'iihúng, qoomár ngiwa baraá yaamaá Misrír wa duúx, qoomár inooín tawa lawaale, ngiri báw,

¹⁴ umuú kurkú faanqwe, umuú heewo dirhunge, hhiyaawós oo Yahudi kudá' ta dirósí weeriís, aqo gun gweer alaá lawaali'iimár kureeraá lahhooe. Kár ala baabi'iihúng tidá' aníng ngaa báw, ngaa axasi'iiká, nee ngaa iiárií qaasi'iiká.

¹⁵ Ala deelór niina aa waarahhi, kuungá' inslawayhúng kuwa warqesé', aníng ina qwal/asé'. Kuungá' mukhúng oo Israeli kuwa gwedé', nee alqado kari qasé' dír geeraaeé' wa alé, dír Do'odá' taa umuueénár ateetin.

¹⁶ Aluuwo kuungá' tari daambaraatsité', umuueé' kuri meetagasé', qoomár lawaale sleémeero tidá' taa gwedité', ar hhawaate nee /ameenaaro, kawa malé ohiindé', kari ki/isé' ar /uuru baraá lawaali'iima.›

¹⁷ Hám daxta, anuú AAKOÓ MUNGÚ a kah, As kuungá' aníng iwa iialooeesi'iiká, as lawaaleedá' kawa gwedi'iiká. Ar ló', aluuwo aníng kuungá' nu gweér, aníng kuungá' nu gweér as tunduwa tsu/i ar paánga, nee giyeé nee tiqtír pu/i. Aníng xoordu sleémeero i dae tsaát, qoomár birnga axaasiyé' tidá' ni tleehh.

¹⁸ Nee múk alqador'eé' gaa geexay, nee hara'ayar'eé' eeharto ga sii', tidá' taa tleéhh geeraaeé' wa alé, inooín in slaqás nee damár taa gaás, kari tla/a feehhiís amorqá' nee tiqá', nee muu iri baraá tla/angwdár waaraáhh.

¹⁹ Mukwí a geeraharuusér múk Yuda, nee geeraharuusér múk Yerusalemu, nee mukdaádá' taa karmuumúy, nee kaahamuuseero dinkwa nee muu sleémeero kudá' damaadá' gaa waa waraahh.

²⁰ Aníng inooín i baraá dabaá wakuuser'ínií qaás, nee baraá dabaá mukdá' inooín gi tsu/utár wa slaá'. Tu'uuín tari /aymár tsir/ór gawaá doori nee makaá sla/a.

²¹ Sedekia waawutmoó Yuda dinkwa nee geeraharuuseerós, aníng in qaás baraá dabaá wakuuser'ín, nee baraá dabaá mukdá' inooín tsu/utár wa slaá', nee baraá dabaá slaqwaruusér waawutmoó Babuloni, kudá' slaqwara ngaa maye', nu i haratlatlawa'aaká.

²² Anuú AAKOÓ MUNGÚ a kah, ga/aaweek, aníng inooín i ádbáw as gixsarí ngiwa malé inki/iya' slaqwaraaro, nee gixsarí ngiri hayoohiyá', nee ngiri da/iyá' ar asla. Aníng gixsadaá Yuda i xaanxay tleéhh, tam múk gi hoót iri qwaar.»