YEREMIA 33 - Biblía Axweesantá Hhohho' ar Mungú 2004

Al'axweesantá hatlá' ar harahhifo

¹ Axweesantá AAKOÓ MUNGÚ Yeremia gana malé axaás, qoomár iwa dír afeenír xuumuuseérí kahhi.

² AAKOÓ MUNGÚ kudá' yaamu gaa tleehh, nee kudá' iihhafirír yaamu ga kumiitiís, kudá' umuuwós ta bay AAKOÓ MUNGÚ, inós aníng iri báy,

³ «Aníng ateetáng, aníng kuúng un mu/aywaáts, nee muruú urén ngu kuúng báw, kudá' taa luú/ oo kuúng ta baloó xu'uká.

⁴ Asma anuú AAKOÓ MUNGÚ, Munguú Israeli, a kah daanduú maraá gixsár Yerusalemuro nee maraá waawituú Yudawo, marayká' kina feé/ as kahhó' kiwa ufér hhapérár tlehha', as tiwa xuunda' nee mukdá' slaáqw oo gixsa ngaa harweer.

⁵ Muu slaqwarár nee múk Kaldayo ga iiar ala aqo tawo, tuaá múk taa tsuú/ as buhhtaaeé' boheedá' taa foól ngin dalaa/iyá'. Asma inooín sleémeero tlakweema ngina tleehhiyé', aníng gixsarí ngiri sií'.

⁶ Tam adoorihe aníng gixsarí a hungu/uús, nee mukós nguri slaqwa hhooár i ki/ís, aníng gixsarí ngiri wayduú yaariírií haniís nee saxareemawo.

⁷ Múk Yuda nee oo Israeliro u malé diihhooárí haniís. Aníng inooín in gawdeés, ngiri adoodár aáng i ki/ís.

⁸ Aníng tlakweemaaín kudá' naa aníngií tlehhaahhitiyé' in hheehhe'eés dir'ine, aníng tlakweemaaín kudá' sleémeero aníng iwa aahhiyé' in gurtláw.

⁹ Gixsarí dir'eene tari gixsár qwal/uú huwahuuw nee ilaiwa/ame nee xirif dír geeraá xoordu sleémeero awa yaamuwo, kudá' kaangwí ngu axaasá' oo hhooeemaadá' naa dír múk Yerusalemúr i haniís. Inooín tari da'ayuut nee tari daaraax as kaangwí.»

¹⁰ AAKOÓ MUNGÚ i kaahi, «Baraá gixsarí kuungá' tawa kata'a, muu i kaahh laqaá makaay, eeít gixsár Yuda nee baraá lohdaá gixsár Yerusalemu, tidá' múk koomaaká laqaá makaay, baraakae

¹¹ afór qaseengw nee ar bara/ a malé axasá', nee afór ni/imár /ayla, nee afór daa'ángw múk ilahhooár sluufoó huwahuúw dír doó AAKOÓ MUNGÚ ar kah, ‹AAKOÓ MUNGÚ Aleesleemusmo sluufmiisaak, asma AAKOÓ MUNGÚ ku hhoó'. Sla'aarirós ar warqawaaká in kumaamít ay alhhe'eesay wasle.› Aníng yaamuuká' i diihhooar'ín tidár aángií ki/ís. Anuú AAKOÓ MUNGÚ tí ngina oó'.»

¹² AAKOÓ MUNGÚ Aleesleemusmo i kaahi, «Diirír xaanxaay ar múk koomaaká laqaá makaay nee baraá gixsaduín sleémeerowo, diirí an qawtantá de'eemuuse daqooray'ín oo bee/aangw nguwa de'een.

¹³ Baraá gixsadaá yaamaá tlom'i, nee gixsadaá Shefela, nee baraá gixsadaá xaanxoó Negebu, nee baraá yaamaá Benyaminiwo, nee baraá yaamaá iisaapoó Yerusalemuro, nee baraá gixsadaá Yudawo, muu bee/angw'ín gu malé fadiit. Anuú AAKOÓ MUNGÚ tí ngina oó'.»

¹⁴ AAKOÓ MUNGÚ i kaahi, «Baala i hardát ar aníng al'axweesante'eé' tidá' naa oó' dír múk Israeliwo nee múk Yuda ngiwa boo/ees.

¹⁵ Deeloodae nee qoomaadae aníng halmír hota ganaa' an baraá xwaylár Daudi wá harma/atís. Inós giri geerahaar ar sakwasleemár ganaa' nee ar hotaá ganaa'á' baraá yaamuwo.

¹⁶ Deeloodae yaamaá Yuda ki ba/amis, nee awa Yerusalemu i hootiyá' ar saxareema. Gixsarí umuuwós kuri bay, ‹AAKOÓ MUNGÚ an gan'amuurén.›

¹⁷ Asma anuú AAKOÓ MUNGÚ a kah, ‹Heé múk Israeli gu sawaawuti'iím baraá xwaylár Daudiwo i qwaariiká.

¹⁸ Kaahamuusér tlahhoó Laáwi heé ilahhooár hanmís ngu baloó dakuusiaaká as ilahhooár da/a ngiwa hanmiisi daqisleém, nee ilahhooár balaango, nee ilahhooár muruú ta tsu/i ngin hanmiisiyá' ay alhhe'eesay wasle.› »

¹⁹ Axweesantá AAKOÓ MUNGÚ Yeremia gari axaás i kat,

²⁰ AAKOÓ MUNGÚ i kaahi, «Barnaxes alqador'eé' tidá' naa tleéhh dír tlaatla/aangw nee xweera hhitiimaro bara aleesleér, tam tlaatla/aangw nee xweera qom'ii'ín kudá' taa qaás ngay dakuusiyé',

²¹ daqaní alqadoodá' aníng naa tleéhh dír sagadiyusmooeé' Daudi sleeme hhitiimaro a aleesleér, tam na/oó kitaangós gu sawaawuti'iím iri qwaar, nee sleeme alqadoodá' naa tleéhh nee sagadiyuuser'eé' tidár kaahamuusér tlahhoó Laáwi.

²² Aníng faarór xwaylár sagadiyusmooeé' Daudi a doók, nee faarór kaahamuusér Mungú tidár tlahhoó Laáwiwo, tari adór tsatse/uú gawaá doori kudá' faarooro ta aslayká, nee adór hhasángw afaá tlawi.»

²³ Axweesantá AAKOÓ MUNGÚ Yeremia gari axaás i kat,

²⁴ «Xáy kuúng aga axaskáhe mukwí iwa kaahi, ‹AAKOÓ MUNGÚ marayká' tsár aa tsawaár gaa sií'.› Inooín muk'eé' nguna waaqaaiyé', dir'ine tari xoororooká.

²⁵ Ala aníng AAKOÓ MUNGÚ a kah, ‹Barnaxes aníng alqadoodár tlaatla/aangw nee xweera aga gawdeesiiká, nee dabér yaamu nee dooriwo gi geeraharahaar aga qaasiiká,

²⁶ daqaní aníng xwaylár Yakobo nee Daudi sagadiyusmooeé' aga sií', nee heé wák u tsawaaraaká oo xwaylár Abrahamu, nee Isaka nee Yakobo ga sawaawuti'iím. Asma aníng muk'eé' un diihhooárí ki/ís nee nguri gurtláw.› »