YEREMIA 32 - Biblía Axweesantá Hhohho' ar Mungú 2004

Yeremia i qaymór tlaxún

¹ Yeremia axweesantá AAKOÓ MUNGÚ gana axaás qoomár Sedekia waawutmoó Yuda kureeriiwós tawa mibaangw baraá waawuti'iimaro. Kurkudá' an kurkú mibaá nee dakaát oo waawuti'iimár Nebukadnesa.

² Qoomaarihe askaárír waawutmoó Babuloni gixsár Yerusalemu gana harwét, nee aarusmo Yeremia kwaa ilaá/ baraá matla/ángw doó xuuma, kuduú baraá doó waawuti'iimár Yuda.

³ Asma Sedekia waawutmoó Yuda Yeremia guna tseék iwa kaahi, «Ahaá waáy, kuúng mas aariiriín tawa kat, AAKOÓ MUNGÚ i kaahi, ‹Ga/aaweek, gixsarí a haniís gawaá dabaá waawutmoó Babuloni, inós gari hayoh.

⁴ Sedekia waawutmoó Yuda i /uyká kuwa haniisi gawaá dabaá múk Kaldayo, ku baloó mayká artleemuwo nee waawutmoó Babuloni, inós ti ariyá' nee waawutmoó Babuloni ila nee tiqá' nee tari dinkwár wa axwees.

⁵ Sedekia kun ar tláy ay yaamaá Babuloni, inós iri hoot amoodá' wa alé ay dír aníng ngway artá aw. Tam geeraawo Sedekia ti muxiia nee múk Kaldayo i baloó baalinká. Anuú AAKOÓ MUNGÚ tí ngina oó'.› »

⁶ Yeremia iri oó', AAKOÓ MUNGÚ ina axweés nee aníng iwa kaahi,

⁷ «Ga/aaweek, Hanameli garmoó Shalumu, maamáywók, ni amoorók i hardah i kaahi, ‹Qaymor'eé' tlaxweek, tidár baraá yaamaá Anatoti, asma kuúng an mar'afmooeé' ló'wa alé, nee a hariín kawa tu/.› »

⁸ Naagáy garmoó maamáy'eé' Hanameli niri hardáh didár matla/ángw xuumuuse, adoodár AAKOÓ MUNGÚ ngira oó', iri báy, «Qaymor'eé' tidár baraá Anatoti tlaxweek, tidár yaamaá Benyamini, asma kuúng a hariín kawa tu/. Tlaxweek as tawa slaasláwarók.» Aníng ngiri tsaáhh adór tar axweesantá AAKOÓ MUNGÚ.

⁹ Naagáy, qaymoodá' ngiri tlaáxw dír garmoó maamáy'eé' wa alé, shekeéli mibaá nee faanqw ar muqslár peésa ngiri buú'.

¹⁰ Aníng gooidár aali ngiri gooiím ngiri dugunií qaás, lamabu'uuse ngiri ateét as ilooeemaá shekeélidá' kiwa qoomeesi ar qoomaay.

¹¹ Aluuwo slaambaree/idá' naa dugunií qaás, tidár gooír aali, tidá' taa dabeérí gooín nee hara'aya, adór qaymoodá' tar te'eé'. Nee slambaree/ír hatlá' ar adór tidá' ar taa tseegiiká ngiri taataáhh.

¹² Gooidá' taa gooín as qaymoodá' tlaxwa ngay haniís dír Baruku garmoó Neria garmoó Ma'aseya, dír geeraá garmoó maamáy'eé' Hanameli nee lamabu'uuse, tidá' duguno gwa qas gawaá gooidá' taa gooín as qaymo tlaxwa. Adoorí kana tleéhh dír geeraá muu sleémeero oo Yahudi, kudá' aa iwiit dír matla/ángw xuumuuse.

¹³ Baruku una kaangwí báw dír geeraá mukwí sleémeero wa alé,

¹⁴ AAKOÓ MUNGÚ Aleesleemusmo, Munguú múk Israeli i kaahi, «Slambaré/uudá' tsaraawo taataahheek, tidá' taa dugunií qás as qaymo tawa tók, nee tidá' taa dugunií qaasiiká, batseek baraá kokoomi as miwa qwát.»

¹⁵ Asma AAKOÓ MUNGÚ Aleesleemusmo, Munguú Israeli i kaahi, «Maraay nee qamu nee qamaá sabiíbu ki malé tlaxún baraá yaamuukae.»

Firór Yeremia

¹⁶ Alaá gooidá' taa gooín haniisaro ngiwa hhe'eés dír Baruku, garmoó Neria, gooidá' taa gooín as qaymo tawa te'eé'. AAKOÓ MUNGÚ una firiím, niri oó',

¹⁷ «Aá Aakoó MUNGÚ, kuúng doori nee yaamu ina tléhh ar aleesleemuú úr, nee ar /uuruuwók.

¹⁸ Kuúng gár ta harslaaqat i káhh, nee múk kumér yaariir ugwa sla'aarirók ar warqawaakií laqaán, ala sleeme kuúng muu un múx as tlakweemaá xwayliitér'ín. Kuúng an Munguú úr oo /uuruú koóm, nee umuuwók an AAKOÓ MUNGÚ Aleesleemusmo.

¹⁹ Kuúng an hara'ayusmoó úr nee aleesleemusmo baraá mura' tlehhtuuwo. Ilaawók lohdaá muu ngin ga/ayá', umuú heewo un bú' ar har qoomoó adoodá' hotaawós i dirii'iya', nee adoodá' tlehhmi'iiwós i dirii'iya'.

²⁰ Kuúng aange layu nee muruú waa/oo/amo una tléhh baraá yaamaá Misriro, tay laarí tlehhtuuwo a kumít baraá tla/ángw múk Israeliwo, nee baraá múk xoordaá hatlae, adoorí kuúng ugwa iia tleerés.

²¹ Kuúng múk Misri una dae tsát ar layuudá' nee waa/oo/amoodá' taa tléhh, nee mukók oo Israeli nguri dúx ar /uuruuwók, nee aleesleemuwók kudá' úr,

²² inooín kiri yaamuukií hanís, kuúng kiri diihhooár ilwa nee daneérí hanís, adoodá' aáng kara qaro alqadiín dír baabi'ii'ín.

²³ Inooín niri dahiyé', yaamu ngiri oohiyé', ala tidá' kuúng kaa beér nga iiárií qaasi'iiká, tam hara'ayarók nga oohi'iiká. Tidá' kuúng kaa beér ngaa tleehhi'iiká. Gawaá adoorihe, kuúng kiri amotlakweérí húp.

²⁴ «Ga/aaweek, múk Kaldayo gixsa gaa harweér ar ufér hhape, as kawa haraadahi nee kawa hayoohi, asma mukwí kuna baraá dabaá múk Kaldayo i qaás ar slaqwara nee giyeé nee tiqtír pu/i. Tidá' kuúng taa kát, ga/aaweek, naa hardát nee ilaawoge aga aán.

²⁵ Tam adoorihe Aakoó MUNGÚ kuúng aníng ina beér, ‹Qaymo tlaxweek ar peésa nee lamabu'uuse ka qás,› tam gixsa kaa hayoohi nee múk Kaldayo.»

²⁶ Yeremia axweesantá AAKOÓ MUNGÚ gana axaás i kat,

²⁷ «Ga/aaweek, aníng a AAKOÓ MUNGÚ, Munguú muu sleémeero, gár aníng ni harslaaqaat iqo deéro?

²⁸ Gawaá adoorihe anuú AAKOÓ MUNGÚ a kah: Gixsarí aníng an haniís baraá dabaá múk Kaldayo nee baraá dabaá Nebukadnesa, waawutmoó Babuloni, inós gari hayoh.

²⁹ Múk Kaldayo kwí gixsarí ga i slaáqw, nin hardah, gixsa kari ásltí qaas, dinkwa nee maraydá' gawaá daáriro tawa mooyángw da/aa/an dír munguúdá' ta bay Ba'ali, nee ilahhooár difaái kawa tsiririximisi dír munguaá hatlá', as aníng tiwa mune duuxi.

³⁰ Asma múk Israeli nee oo Yuda gár hatlá' dír ilaaeene ni tlehhaahhitiya' i káhh, aqo har tlakweema kilooín iimír masoombi'iimar'ine. Inooín gár naa tleehhiyé' i káhh, aqo har aníng ina buhhtamiisiyé' ar gadiyér dabaaín. Anuú AAKOÓ MUNGÚ tí ngina oó'.

³¹ Múk baraá gixsarí ina buhhtamaamís iimír kawa tleéhh ay laarí. Gawaá adoorihe gixsarí an hhaamiís dír geeraaeene.

³² Asma múk Israeli nee oo Yuda tlakweemaá yaariir ngina tleehhiyé', nee aníng iri buhhtisiyé', inooín nee waawitaáine, nee geeraharuuser'ine, nee aaruuser'ine, nee kaahamuuser'ine, nee múk Yuda nee yaamuloouusér Yerusalemuro.

³³ Inooín aníng ina alaá xu'usiyé' iga i qayti'iiká, tam aníng inooín iga intsaahhatimisi umuú daqto, ala axweesante'eé' nga iiárií qaasi'iiká, sleeme intsaahhasar'eé' ngaa ilaoohi'iiká.

³⁴ Inooín muruudá' ta waki nguna qaasiyé' baraá do'owí ta umuuér ateetin, nee nguri meetagaasiyé'.

³⁵ Kitángw ilahhooa oo munguú ta bay Ba'ali nguna tleehhiyé' baraá xatstá garmoó Hinomu, as ilahhooár na/aá dasu nee awa daaqaay kawa hanmiisi dír munguúdá' ta bay Moleki, tam inooín aníng iga ádbawiikahe, nee gaarí aga inslawiiká. Inooín muruuwí ta waki nguna tleehhiyé', tam múk Yuda nguri dahaasiyé' baraá tlakweema.»

Al'axweesantá harahhifo

³⁶ Hám daxta AAKOÓ MUNGÚ, Munguú múk Israeli, i kaahi, Yeremía, mukwí i kaahi, «Gixsarí ka haniis baraá dabaá waawutmoó Babuloni ar loohír slaqwara nee giyeé nee tiqtír pu/i, ala aníng a kah,

³⁷ ga/aaweek, aníng inooín in baraá yaamu sleémeeró wa burumbuúr, amoodá' ngay guús as buhhtaaeé' nee xarasleemaeé' as niwa qa/iít. Inooín in malé diirí ki/ís. Aníng inooín ngiri waydúr hootiís.

³⁸ Inooín tari muk'eé', nee aníng tari Munguúín.

³⁹ Aníng inooín in muunuú wák i haniís nee loohír wák, as kahhó' aníng iwa ilaiwawa/iya' umuú daqto, as kahhó' aníng inooín ngiwa hhooeemáy tleehh nee na/ii'ine.

⁴⁰ Aníng alqadór alhhe'eesay wasl an tleéhh nee inooín, as kahhó' inooín ngiwa baloó mawaaká hhooeemáy tlehhtuuwo, nee muunuú aníng iwa ilaiawawa/iya' un baraaíní qaás, as kahhó' aníng miwa malé si'iyé'.

⁴¹ Aníng in saqwalaá/ ngiwa hhooeemáy tlehhiit, nee aníng inooín in baraá yaamuukií qaás ar inkihhimu nee ar muunaáeé' sleémeero, nee ar qeeruueé' sleémeero.»

⁴² Asma AAKOÓ MUNGÚ i kaahi, «Adoodá' mukwí ngura amotlakweérí huúw, hhooeemadá' naa al'axweés sleeme in dir'íní huúw.

⁴³ Qamu kin tlaaxw baraá yaamuuká' kuúng tawa kat, ‹Yaamaá dewa'ame, múk gi hoót laqaá makaá ngi hootá' i kahhiyá', nee kaa haniís baraá dabaá múk Kaldayo.›

⁴⁴ Muu qamu gin tlaxún ar peésa, gooidá' qamu kir aali kan gooín nee kari dugenií qaas nee lamabu'uuseero. Adoorí kan tleehh baraá yaamaá Benyamini, nee iisaapoó Yerusalemu, nee baraá gixsadaá yaamaá Yuda, nee baraá gixsadaá yaamaá tlom'i, nee baraá gixsadaá Shefela, nee baraá gixsadaá xaanxoó Negebu. Asma aníng inooín i malé diihhooárí ki/ís. Anuú AAKOÓ MUNGÚ tí ngina oó'.»