YEREMIA 31 - Biblía Axweesantá Hhohho' ar Mungú 2004

Múk Israeli i ayaaíní waatl

¹ AAKOÓ MUNGÚ i kaahi, «Qooma i hardát ar aníng tawa Munguú tlahh'aá múk Israeli, nee inooín tari muk'eé'.»

² Anuú AAKOÓ MUNGÚ a kah, «Mukdá' naa dír tsu/utár wa /uy, qeemu ngwa slayé' baraá xaanxaywo, qoomaadá' múk Israeli dír huungu/uusa kawa leelehhiít.

³ AAKOÓ MUNGÚ tina amór saáwá laqán i kaahi, Aníng kuúng una ló'wa slaá' ar sla'aarír alhhe'eesay wasl. Gawaá adoorihe aníng an kumamiít tiwa inkihhím diroge.

⁴ Aníng kuúng un male tleéhh, nee kuúng adoodá' aáng tay diri' kay i kí/, aá Israeli, kuúnguudá' hhoohhoó'. Kuúng xoosladár ni/ima kari male taatáhh as tawa ni/iin ar qwal/uú úr oo bara/.

⁵ Kuúng sabiíbu u malé dahás gawaá ságw tloomár Samaria. Muu dahaasiingw gu dahaas nee mamu kiri saqwalalaa/.

⁶ Asma qooma i hi'ít ar xuumusmo iwa ateeti gawaá geetuú tlom'aá Efraimu, iri ooi, Gusé', a tsa/amán ay Siyoni amoodá' AAKOÓ MUNGÚ, Munguúrén, i dirii'i.»

⁷ Asma AAKOÓ MUNGÚ i kaahi, «Daaé' ar qwala/ as múk Yakobo, ururu'uumisé' asma xoorór ur, kaangwí ilahanisaak, baraa/é' tawa kata', ‹AAKOÓ MUNGÚ mukós gwa ba/amís, mukduú Israeli aa meet.›

⁸ Qaytsité', muk'eé' ngu yaamaá bihhaá /iikú wa ki/ís. Aníng inooín in burumbuúr baraá hhapeemo sleémeerowo, múk taampu nee oo taqooraay ta dinkwa nee inooín. /Ameenár tsiihaawe nee ar xwaylár sla'a. Boo/oó yaariír oo muu ni diirií kii/.

⁹ Muk'eé' ni kii/ ar hhirhheeri, ngi ki/ís as ngiwa gurkwa/as, aníng i geerahaár ay dír duxuú ma'aay, ar baraá loohír dukuutse ngiwa tuu'utká. Asma aníng a baabá dír múk Israeliwo, nee Efraimu a na/ay'eé' oo baris.

¹⁰ Kuungá' xoórdu, axweesantá AAKOÓ MUNGÚ iiárií qaasaak, ilahaniisaak dír ayeemaá sawene, kudaá iisaapoó tlawi, tawa kata', ‹Aníng muk'eé' oo Israeli una diyaá/, ala daxta un burumbuúr nee un geerahaár, adór de'eemusmo bee/aangós ngur geeraharhaahari.›

¹¹ Anuú AAKOÓ MUNGÚ múk Yakobo ngwa gweér baraá tseegamooro. Una ba/amís dír kudá' inós gu baá/ /uuruuwo.

¹² Nin hardihiyá' ar afór daa'aangw gawaá tloomár Siyoni. Nee hhooeemaaeé' kin saqwalalaa/, anuú AAKOÓ MUNGÚ. Hhooeemaaeé' kudaá balaangw nee difaái nee di/i, tidá' ni hanmaamiis, nee bee/aangw nee hikwa. Inooín an adór asalmoó taa eemamiís ar ma'aay, inooín gár kiwa /aár i káhh.

¹³ Daqaní dasuuín i ni/ín nee tari qwalalaa/, masoomba nee múk aa diimaadini ta qwalalaa/. Aníng tsuunqumisuuín un warqeés tawa qwala/, in gurkwa/ás nee in qwal/atís kitángw gurhaamiro.

¹⁴ Aníng kaahamuuser'eé' an aaxiís muruú wahhaara, muk'eé' nguri aaxiís hhooeemaaeene. Anuú AAKOÓ MUNGÚ tí ngina oó'.»

Gurtleemuú Mungú dír múk Israeli

¹⁵ AAKOÓ MUNGÚ i kaahi, «Afo kaa axaás baraá gixsár Rama, /aa/aá tsuunqusmoó gurhaami, Raheli i /aa/amiín as na/iiwós, asma iwa kahhiya', Raheli qawisa gari sí'.»

¹⁶ AAKOÓ MUNGÚ i kaahi, «Daxta /aa/e maweek, hhirhheeriiwók fiitseek, asma bu'utu u sleér daanduú gadiyeéroge. Na/iihúng ni watliyá' baraá yaamuudá' saaw awa wakuuserhunge.

¹⁷ Harahhifo a sleerá' baraá deelór hi'iita, nee na/iihúng nin watliyá' baraá yaamuuín awa kilá'. Anuú AAKOÓ MUNGÚ tí ngina oó'.

¹⁸ Aníng aga axaás múk Israeli i wa/aa/uus, tawa kaahi, ‹Atén tina múx adór awér aa intsaahhaandiiká dooslaro, ala kuúng tiri intsaahhatís as uwa ilaiwa/aan. Atén ti ki/is, atén aga ya/aamaán ki/imaá amooroge, asma kuúng an AAKOÓ MUNGÚ, Munguúrén.

¹⁹ Asma alaá atén tawa dee/aanuutaán ana hhu'uu'umaán, alaá tiwa intsaahhatís ana gurhamuutaán, tari mureekesuutaán tari amoqwaaraán, mureekesoó iimír masoombi'iimarén tin alkomkaakón.›

²⁰ Israeli an garmaaeé' kuduú sla'aarusmoówóke? Inós an na/ay'eé' kudá' ni ló'wa slá'aáke? Umuú daqto bur iigahhaatár wa slaá', aqo gurtleemu un insláw, guruueé' in tlatláy as inós, nee looeemaawo nguri gurtláw. Anuú AAKOÓ MUNGÚ tí ngina oó'.

²¹ Loohirók tí alhooreseek, kikiár u geerahaar slahheek, ma sagaqwaaraar loohidá' ur ooharo, tidá' taa ót qoomár tawa tlatleer. Aá Israeli, kií/, amór do' ii ki/eek baraá gixsaduuwók.

²² Ta baabaqaamamisa' ay xaylá, kuungaákaá inkihhimu wasl? Asma aníng gár dimbé, ar /aben daanduú yaamuwo aga tleéhh, ‹/Ameeni hhawaata gu xuún.› »

Diihhooár múk Mungú i hardát

²³ AAKOÓ MUNGÚ Aleesleemusmo, Munguú Israeli i kaahi, «Qoomár múk Yuda bura diihhooárí ki/ís, inooín baraá yaamaá Yudawo nee gixsadaá Yudawo tari malé ooi, ‹AAKOÓ MUNGÚ nu tsuuqi, aá yaamuloouusér hota ganaa', i tsuuqi kiíng tloomár hhoohhoo'.›

²⁴ Nee múk Yuda nee gixsadu sleémeero, nin dinkwár wa hootiyá' nee doosluuse nee de'eemuuse nee daqooroó hikwaaine.

²⁵ Kudá' naa slaaqamiitiye' slaaqamayer'ín aa fák, kudá' naa diqay tsatmiitiye' i /uurií haniís.

²⁶ An gár hee adoorí ngis ooi, ‹Ana qaát ngiri tsaáhh adór gu'utér tsuu' ngira sláw.›

²⁷ Anuú AAKOÓ MUNGÚ a kah, ga/aaweek, deelo ni hardát ar aníng yaamaá Israeli nee awa Yuda ngiwa hatsiis muu nee makaywo ar adoodá' dahaasusmo ir dahaasaasin.

²⁸ Adoodá' aníng tir inkihhím ngiwa tu/uúm, ngiwa fe/iít, ngiwa daraáhh, ngiwa hhititiím nee ngiwa slahh'eemiís, nee ti inkihhím ngiwa malé dahaas nee ngiwa malé tleehh.

²⁹ Deeloodá' birna xeér muu ta ooiiká malé alé, ‹Baabi'i na/aá sabiíbuú qarqaár ngina /ayiyé', sihhnaá na/ii'ín tur/i giri ót.

³⁰ Ala umuú heewo in gwaa' as tlakweemaawós kilós, umuúqo heé mamaá sabiíbuú /eétl gaa /aay, sihhinaawós tur/i gin ót.› »

³¹ AAKOÓ MUNGÚ i kaahi, «Deelo ni hardát ar aníng alqadór /aben ngiwa oo' dír múk Israeli nee oo Yuda.

³² Alqadoorí nee tidá' naa oó' dír baabi'ii'ín qoomár ngiwa duúx baraá yaamaá Misriro ti slay'aaká. Alqadoodá' ngina si'iyé', tam aníng dir'ine a adór aakooine. Anuú AAKOÓ MUNGÚ tí ngina oó'.

³³ Alaá deeloorihe alqadoorí an oó' dír múk Israeli, aníng daber'eé' an baraaínií qaás, nee an gooiím baraá muner'ín, aníng tari Munguúín nee inooín tari muk'eé'. Anuú AAKOÓ MUNGÚ tí ngina káh.

³⁴ Hee i kaahh tumu wák oo inslaawmoowós laqaá hhiyaawós gu intsaahhatís, iwa kaahi, ‹AAKOÓ MUNGÚ xueek.› Asma inooín sleémeero aníng i xuiyá' iimír na/aá ninakw ay múk urén. Aníng dakuúsar'ín an gurtláw nee tlakweemaaín aníng i baloó inslawaaká.»

³⁵ Adoorí an adoodá' AAKOÓ MUNGÚ i kaahi. «Anuú AAKOÓ MUNGÚ Aleesleemusmo, aníng an kudá' gaa qoomees tsee/amá iwa gwa/aati tlaatla/ango, xweeraawo slahhaangw nee tsatse/ iwa gwa/aatiya', kudá' tlawi gaa gwaanduú ma'áy tleehh.

³⁶ Aníng a kah, ‹Ala barnaxés hara'ayar'eé' tí naa oó' aa hhitirút dír geeraaeene, daqaní i ya/aán sleeme múk Israeli tawa xooror'eeneeká kureerisleém.› »

³⁷ AAKOÓ MUNGÚ i kaahi, «Barnaxés doori qoomeesaro ki aleesláy, nee bar iihhafiirír yaamu xuuxuuaro ka aleesláy, daqaní aníng sleeme múk Israeli u kwaáhh amór saaw, asma muruudá' inooín sleémeero taa tleéhh.» Anuú AAKOÓ MUNGÚ tí ngina oó'.

³⁸ AAKOÓ MUNGÚ i kaahi, «Deelo i hardát ar gixsár Yerusalemu kawa malé /abeesi tleehharo as AAKOÓ MUNGÚ, iimír /Aampár Hananeli ay dír Afkuduú dír Koo/i niwa warqeér.

³⁹ Hhutlmoó digima qoomeemes kun gan'aas iimír tloomár Garebu, iri harweerín ay dír Goa.

⁴⁰ Xatstidá' /aantaá múk koom, nee didá' xwaansláy kway kwaakwahhi, qamu sleémeero ay duxuú Kidroni ay bihhaá Afkú doó Faras, iri kumiit bihhaá da/aáw. Diirí an didá' taa paraátl as AAKOÓ MUNGÚ. Gár ta baloó hhitin i káhh baraakae, nee gixsarí ka baloó fee/iiká ay kureeraá kureér.»