YEREMIA 30 - Biblía Axweesantá Hhohho' ar Mungú 2004

Al'axweesantá Mungú dír mukós sleémeerowo

¹ Axweesantá AAKOÓ MUNGÚ Yeremia gana axaás, i kat

² «Anuú AAKOÓ MUNGÚ, Munguú Israeli a kah, axweesantí sleémeero ugwa báw gooimeek baraá kitaábu.

³ Asma ga/aaweek, deelo i hardát ar muk'eé' oo Israeli nee oo Yuda nguwa diihhooár i ki/is. Aníng inooín in ki/ís baraá yaamuudá' naa taati'ii'ín i haniís, nee inooín ngiri aaliyá'. Anuú AAKOÓ MUNGÚ tí ngina oó'.»

⁴ Kaangwí an kudá' AAKOÓ MUNGÚ daanduú múk Israeli nee oo Yudawo aa káh.

⁵ AAKOÓ MUNGÚ i kaahi, «Afór dae tlaaq aga axaasaán, /aa/aá dae awa wayda wasl.

⁶ Axáy ti yaahase' nee qaytsité', xáy, hhawaata iqo tsuwa adór /ameenír wa xwaylúya? Ahaá baré, hhawaate sleémeero tla/eeri'ín ngaa ohiné' adór /ameenír baraá slahh'amuú xwayla, nee gitsee/er'ín iri kalay warqeer?

⁷ Tsaxwa, deelór slahh'amaaye i hi'ít, deelór ta adór tír qoomeesi i káhh, an qoomár slahh'amuú yaariír dír muk'eé' oo Yakobowo. Tam adoorihe inooín baraadae ki ba/amis.

⁸ Baalaarí bál birna hardát, anuú AAKOÓ MUNGÚ Aleesleemusmo a kah, aníng taaqwantidár gawaá isaá muk'eé' a giqáw, piínguú kira tsegiít un tlaáq. Inooín dahaaye ngi sangw malé sagadiyuusiaaká.

⁹ Aqo AAKOÓ MUNGÚ, Munguúín ngun sagadiyuusiyá', nee waawutmoó tlahhoó Daudi kudá' ni tsawaar ngun sagadiyuusiyá'.»

¹⁰ AAKOÓ MUNGÚ i kaahi, «Kuungá' ma da'ayumitaara' kuungaásingá' tlahhoó Yakobo awa sagadiyuuser'eé', kuungá' Israeli, ma amoqwaqwadimara'. Asma aníng kuungá' nu amór saáwá ba/amís, nee na/iihúng ngi ba/amís baraá yaamaá ki loohatisi. Kuungá' múk Yakobo ni watlá' tari hotá' ar wayda. Heé kuungá' nu dae tsaát i kaahh tamu wák.»

¹¹ Anuú AAKOÓ MUNGÚ a kah, «Asma aníng nee kuungá' a dinkwa as nuwa ba/amis. Aníng xoordu sleémeero i hhaamiís, kudá' aníng kuungá' nuy diyaá/. Ala aníng kuungá' nu hhaamisaaká. Kuungá' nun tawó muúx ar qoomoó gan'amu, ala a tawo watla'aaká burna muxiiká'.»

¹² Anuú AAKOÓ MUNGÚ a kah, «Inkaahhi'iihúng ki baloó huungu/usiiká, gweehhinghúng i baloó huungu/iiká.

¹³ Heé kuungá' nu aleekalaá/ i kaahh, inkahhi'iihúng maasoó gi huungu/uús i kaahh. Harahhifór kuungá' tunduwa hungu/uusi i káh.

¹⁴ Sla'aaruuserhúng sleémeero kuungá' naa gunqaarés, kuungá' nu baloó gár i xuiiaaká. Aníng kuungá' naa slaáhh adór wakusmo, kuungá' tundu muux ar gurtleemu wasle, asma dakuúsarhúng ka ló'wa ur, tlakweemaahúng ki ló'wa yaariir.

¹⁵ Ahaá baré a /aa/amiindá' as inkahhi'iihúng, inkahhi'iihúng i baloó huungu/iiaaká. Aníng kuungá' nuna adoorí /iís, asma dakuúsarhúng ka ló'wa ur. Tlakweemaahúng ki ló'wa yaariir.

¹⁶ Ala kudá' sleémeero kuungá' nu hhaamiisár wa sla'á' ki hhaamiis. Wakuuserhúng sleémeero kar tláy baraá loohaay, kudá' kuungá' naa gaa wa hayohiye', muruuín ku hayoh sleeme. Kudá' kuungá' naa slakaatiyé' aníng in slakaát.

¹⁷ AAKOÓ MUNGÚ i kaahi, aníng kuungá' nu slaqwa hhooárí ki/ís nee inkahhi'iihúng i hungu/uús. Tam kuungá' tunda bayi, ‹Múk taa kwaáhh, gixsár Siyoni, tidá' ta amohhe'eemisiiká.› »

¹⁸ Anuú AAKOÓ MUNGÚ a kah, «Aníng diihhooár hotaá doó Yakobo a ki/ís. Nee hotaaín i gurtláw, nee gixsa ka tleehh gawaá taangoorós, doó waawutmo ku tleehh didá' aáng i dirii'i.

¹⁹ Muk'eé' oo didá' hoót daa'ángw sluufaay ku daa', nee afór qwal/amaaye i baraadá' wa ti'ít. Inooín nin tlahhiyá', ta baloó /aaruyká. Aníng inooín in xirfayeés, ki baloó waaqaiiká.

²⁰ Na/ii'ín aqo adoodá' aáng tay dirii'i, dinku'uumar'ín geeraaeene ka gawdes. Aníng mukdá' sleémeero inooín gi baramaanuusá' in muúx.

²¹ Geeraharusmooín kun baraá tla/angw'ín wa sláy, waawutmooín ku sláy baraaine, inós aníng u dir'eénií tseeweés, inós niri tseewúy. Asma heé dir'eénií tseewúw ar /uuruuwós tumu wák i kaahh. Anuú AAKOÓ MUNGÚ tí ngina oó'.

²² Daqaní kuungá' a muk'eé', nee aníng tari Munguúhúng.

²³ Qaytsité', bambaaór xaraasl i amór AAKOÓ MUNGÚ dáhh. Buhhta naa hardihiyé', bambaór ló'wa fukukuu'. Heé tlaákw gun saga naasuúr.

²⁴ Buhhtaá xaraaslá' AAKOÓ MUNGÚ i tawo ki/iaaká ay dír tidá' muunaáwose aa slaá' ngay boo/eesi. Deeloodá' birna hardát daqaní kuungá' kaangwí u tsahhá'.»