YEREMIA 3 - Biblía Axweesantá Hhohho' ar Mungú 2004

Haratlintaao waslér múk Israeli

¹ Barnaxes hee hareerós gaa talaákárií haniís, inós guri geexeér, hhawaatuú hatlá' gari duúx, iqo kí/a dír heedaaduú geera? Yaamu kiqo ló'wa meetagaasiikáhe nee tlehhmuusíng? Kuungá' tsaatu'uumár yaariir aga tlehhé' nee mulqér yaariir, hám daxta niqo tsuwá amor'eénií ki/á'a?

² Axáy ilaawoge sagér tlom'i xuxueek. Dii a diimá ar kuungá' nee inooín tawa alqati'iiká? Mulqeerók ana daamaraán bihhaá loohír wa aleeró adór Ma/araábuduú baraá xaanxaay. Yaamu iga meetagasé' ar tsaatu'uumarhúng tidá' slasla/aruuwo aa harwaarahh.

³ Gawaá adoorihe baafáy i taxatiiká, tam tluwoó saxi i tluwiiká. Tam adoorihe ilaahúng ki gawden adór kuqaá tsaatuso'o, mure tam ar niiná i káhh.

⁴ Aqo hamír kilá' iga atetkáhe tawa kat, «Kuúng a baabuúeé', ina slá' iimír tawa na/oó niiná.

⁵ Mungú i buhhaahhína ay alhhe'eesay wasle? I qa/iimaamíti ay alhhe'eesaay?» Adoorí an adór tara axwesé', ala kuungá' tlakweemaá taa qo alesleeri'i ina tlehhé'.

Múk Israeli nee oo Yudawo gár kuwa hariím a hhu'u'uungw

⁶ Qoomár waawuti'iimár waawutmo Yosia AAKOÓ MUNGÚ aníng ina báy, «Xáy aga aándi adoodá' múk Israeli kudá' inkihhimu wásl aa tleéhh? Ina geexayé' niri tsa/ané' gawaá umuúqo ságw tloomaro nee umuúqo dír gamuú xa'anoó loo/o naa/e as tsaatu'uuma ngiwa tleehhiya'.

⁷ Aníng ngi xuu' tí sleémeero tleehharo birnga hhe'eesiyé' ni amor'eé' ki/iyá'. Ala naa baloó amor'eénií ki/i'iiká. Nee hhaeeín awa Yuda sleémeero ngaa ariyé'.

⁸ Múk Yuda fuqtá múk Israeli kudá' inkihhimu wásl gana ga/aa/áy, inooínaadá' aníng naa sií'. Ala hhaeekaá lamuuse awa Yuda naa da'ayuti'iiká, nina tlayé' niri fuqtá ayé'.

⁹ Tsaatu'uuma dir'ine a gár ta hhasliitiiká, yaamu ngiri meetagaasiyé', tsaatu'uuma ngina tleehhiyé' tlaa/e nee xaai ngiwa haratlintati'iya'.

¹⁰ Tam adoorihe hhaeeín awa Yuda kudaá al/aymuuse naa amor'eénií ki/i'iiká ar muner'ín sleémeero, aqo har hhahhafiingw kilós. Anuú AAKOÓ MUNGÚ tí ngina oó'.»

¹¹ AAKOÓ MUNGÚ aníng iri báy, «Múk Israeli kudá' aa dee/anuut, a tsiní ta múk Yuda kuduú lamuuseero.

¹² Tláw múk Israeli axweesantí baweek: Ki/aaré' kuungaá múk Israeli, kudá' inkihhimu wasl! Aníng kuungá' nu ga/aawaaká ar iltá tlaakw, asma aníng a gurtleemuú koóm. Eeít aníng kuungá' nu i buhhaaká ay alhhe'eesay wasle.

¹³ Kuungá' tlakweésarhúng kilós na hhu'uu'umaak, tidá' anuú AAKOÓ MUNGÚ, Munguúhúng, iwa ahhé', nee munguaá hatlá' kiwa slaé' sluufmisuuwo dír umuúqo gamuú xa'anoó loo/o naa/e, nee afor'eé' kari iialooesi'iiká. Anuú AAKOÓ MUNGÚ tí ngina oó'.

¹⁴ «Ki/aaré', kuungásingá' na/aá inkihhimu wasl, asma aníng an Aakoohúng. Aníng umuú heewo u leéhh dír umuú gixsaro, nee múk tsár baraá umuú tlahhaywo, ngiri huúw ay tloomár Siyoni. Anuú AAKOÓ MUNGÚ tí ngina oó'.

¹⁵ «De'eemuusér aníng i iialooeemiis ngi kuungá' i sláw, múk kuungá' nu /aymiís ar xu'uti nee tsaahha.

¹⁶ Nee qoomár bar aga tlahhé' tay doogiindé' baraá yaamuwo, de'emadae muu sandakmoó alqadór AAKOÓ MUNGÚ ku daanda ooiiká. Ngu baloó inslay'aaká, laqaá ngu baloó yaahasiaaká, tam sleeme oo hatlá' ngu tleehhiaaká.

¹⁷ Nee qoomaadae gixsár Yerusalemu ka bay, ‹Kitángw aleesleemu oo AAKOÓ MUNGÚ.› Nee xoordu sleémeero niri burumburitiyá' dír geeraaeé'. Adoodá' tlaakw muner'ine ta slai ngi eehariaaká.

¹⁸ De'emaadae múk Yuda nee oo Israeli ti haragwaa', sleémeero niri yaamuudaá bihhaá /iíkwí tlayá', niri hardihiyá' baraá yaamuudá' aníng naa aalír wa haniís dír baabi'ii'ín.»

Múk Mungú ta murslaaqatuú haratlintatii'

¹⁹ Aníng ngiwa xuu' geeraawo, kuúng un adór na/ay'eé' tleéhh, yaamaá sla'atimiisá' ngiri kuúngií haniís, aalír ló'wa hhoohhoo' baraá xoorduuwo, ngiwa xuu' geeraawo kuúng in baabuúwógár atét, nee kuúng in baloó meeraaká eeharto.

²⁰ Ala daanduú tihe, kuungá' xoorór Israeli ana inkihhimu waslesé' dir'eene, adór harér inkihhimu wasl i tlehhaahhit dír hhawaatuuwose. Anuú AAKOÓ MUNGÚ tí ngina oó'

²¹ Tsimaahhi an gawaá sagér tlom'i axamisaán, tsuunqusmo nee /aa/aá na/aá Israeliwo. Asma loohír ganaa' ngina dakuusiyé', AAKOÓ MUNGÚ, Munguúín, nguna gunqaaresiyé'.

²² Ki/aaré' kuungá' na/aá inkihhimu wasl, aníng inkihhimu waslerhúng a huungu/uús. Kuungá' a kata', «Ga/aaweek atén naa ki/aán amoorók asma kuúng an AAKOÓ MUNGÚ, Munguúrén.

²³ Looeemaawo taa kiloorén al/ayaán tawa munguaá hatlá' sluufmisuú awaán gawaá sagér tlom'i. Looeemaawo ba/amár múk Israeli amór ni dahh a amór AAKOÓ MUNGÚ, Munguúrén.

²⁴ Iimír masoombi'iimarene tlehhmuuwí oo mureekesaay umuú gaaro gana hhaamiís nee daqooray'ín oo bee/aangw nee oo hikwaawo nee daaqay'ine nee dasuuwo, muruudá' xwayliteérén aa hamér wa xínts.

²⁵ Gimsé' atén gár tiwa hariím an yaamií qaataán as mureerén, nee masók mureekesayrén ti tuuntuuk, asma tlakweema iga tleehhaán dír AAKOÓ MUNGÚ, Munguúrene, atén nee xwayliteérene. Iimír masoombi'iimarén wa tleemu ay laarí atén afór AAKOÓ MUNGÚ, Munguúrén, aga iialooeesaniiká.»