YEREMIA 29 - Biblía Axweesantá Hhohho' ar Mungú 2004

Barwiito'ór Yeremia amór múk Yahudi oo baraá Babuloni

¹ Kaangwí an axweesanoó barwito'odá' Yeremia aa gooín amór Yerusalemúr wa alé dír bariise nee kaahamuusér Mungú, aaruuse nee dír muu sleémeero, kudá' waawutmo Nebukadnesa a yaamaá Yerusalemúr wa loohatís ay Babuloni.

² Yeremia barwito'o ngiwa gooín a alaá waawutmo Yekonia, nee waawuto'o aayoorós kiwa ar tláy Yerusalemúr wa ale, dinkwa nee mukdaádá' taa karmuumúy, nee mukdá' urén oo Yuda nee oo Yerusalemu, nee mukdá' mura' tlehhituwo gu xuú' nee kareerá.

³ Barwito'oorí kana huúw nee Elasa garmoó Shafani, nee Gemaria garmoó Hilkia, kudá' Sedekia waawutmoó Yuda aa ya/aáw amór Nebukadnesa waawutmoó Babuloni. Yeremia gár aa gooín a tí,

⁴ «Daanduú mukdá' taa ar tlayi baraá yaamaá Yerusalemúr wa alé ay Babuloni. AAKOÓ MUNGÚ Aleesleemusmo, Munguú Israeli, i kaahi,

⁵ ‹Marayhúng tleehhaak, hooté', qamu dooslaak, balangwhúng dahaasaak nee /ayiimé'.

⁶ Duxuuxumé', na/ii laqwalaak, daaqayhúng i duxuuxun nee dasuuhúng ku duxuuti, ta laqwaali. Doogigimé', ma baloó /aaruwaara'.

⁷ Gixsasíng kuungá' tunday loohatís diihhooárií leelehhaak, anuú AAKOÓ MUNGÚ firiirimaré' diihhooár yaamuukae, asma inooín diihhooa bar kaa sláy, kuungaásingá' baraasíng hootá' diihhooa aqo sleerá'.›

⁸ Anuú AAKOÓ MUNGÚ Aleesleemusmo, Munguú Israeli a káh, ‹Al/aymár aaruusedár lamuuse ma iiárií qamiimara', nee qwaslaareedá' tu/u/uum tam tlataaín kudá' mi ya/aamara'.

⁹ Asma inooín lama ngin tlaaqiyá' ar umuueé', ala aníng nga ya/aawiiká. Anuú AAKOÓ MUNGÚ tí ngina oó'.›

¹⁰ «Anuú AAKOÓ MUNGÚ an kah, ‹Alaá kureeraá mibeeraá faanqwe awa hotaahúng baraá yaamaá Babuloniro, aníng ni hardáh, qoomaarihe al'axweesante'eé' tidá' ngiri boo/eés ar nuwa ki/is baraá yaamuuká'.

¹¹ Asma anuú AAKOÓ MUNGÚ a xuú' gár ni kuungá' i qoomeemeés i deer. Gár nuy qoomeemeés a wayda, ala a amotlakweerooká, kuungá' masók harahhifo a sleerá' aluuwo.

¹² Qoomaarí an qoomaadá' aníng kuungá' iwa ateta' nee iwa firiinda', aníng kuungá' nuri iiárií qaás.

¹³ Bira leelehhité' i sleerá', qoomár bar iga leelehhité' ar munerhúng sleémeero.

¹⁴ Aníng kuungá' i sleerá'. Aníng diihhooarhúng ngi ki/ís, nee nuri burumbuúr baraá xoordu sleémeerowo, nee umuú diiro amoodá' nay diyaá/. Nuri ki/ís amoodá' nay diyaa/i, amoodár yaamaá nuy loohatís. Anuú AAKOÓ MUNGÚ tí ngina oó'.›

¹⁵ «Asma kuungá' a kata', ‹AAKOÓ MUNGÚ aaruuseerén ngaa yaamaá Babulonír wa sláy.›

¹⁶ Anuú AAKOÓ MUNGÚ gár ni kah iiárií qaasaak, daanduú heedaádá' iwiita gawaá kitangwduú waawuti'iima oo Daudi, nee daanduú muu sleémeero kudá' baraá gixsarí hoota, nee hhaeehúng kudá' taa alhuwiiká dinkwa nee kuungá' baraá loohaay.

¹⁷ Anuú AAKOÓ MUNGÚ Aleesleemusmo a kah, ‹Qaytsité', aníng slaqwara an huúw, nee qwari, nee tiqtír pu/i. Aníng i adór /aantsito'ór aa kufut tleéhh, tam /ayma ga ya/aandaaká.

¹⁸ Aníng in aldáh ar slaqwara, nee giyeé nee tiqtír pu/i. Inooín ngiri adór gár ta waki tleéhh baraá waawuti'iima sleémeero ar yaamuwo. Inooín tari gár ta lu'umisi, nee gár waa/oo/amór huwahuuw nee gár ta waaqaaqai baraá xoordu sleémeero kudá' ngay guusi.

¹⁹ Adoorí an tleéhh asma kuungá' axweesante'eé' tidá' naa aaiím ar loohír sagadiyuuser'eé', tidár aaruuse aga axasi'iiká, kuungá' ana ló'wa sié'.› Anuú AAKOÓ MUNGÚ tí ngina oó'.

²⁰ Ala hamí kuungá' sleémeero awa na baraá Yerusalemúr wa duúx, nuri loohatís ay Babuloni, axweesante'eé' iiárií qaasaak, anuú AAKOÓ MUNGÚ.

²¹ «Daanduú Ahabu garmoó Kolayawo, nee daanduú Sedekia garmoó Ma'aseya, kudá' kuungá' nu aaru'uumár lamtí kaahá' ar umuueé'. Anuú AAKOÓ MUNGÚ Aleesleemusmo, Munguú Israeli, inooín i haniís gawaá dabaá waawutmo Nebukadnesa oo Babuloni. Inós inooín gin tsuu/ dír ilaahúng wa alé.

²² Mukdá' taa loohatís baraá yaamaá Babuloni Yerusalemúr wá alé, barta lo'ór huwahuuw tari kaahi, ‹AAKOÓ MUNGÚ masók un adór Sedekia nee Ahabu tleehh, kudá' waawutmoó Babuloni a baraá ásltí daá/.›

²³ Inooín adoorí gin sleér, asma alsi'imu nguna tleehhiyé' baraá yaamaá Israeliro. Inooín fuqi kana tleéhh nee tlaawoó muu, nee lama kana tlaáq ar umuú AAKOÓ MUNGÚ, gár anuú AAKOÓ MUNGÚ ngaa bawiiká kana tlehhiít. Aníng tí a xuú', aníng a lamabu'usmo. Anuú AAKOÓ MUNGÚ tí ngina oó'.»

Barwiito'ór Shemaya

²⁴ AAKOÓ MUNGÚ ina báy, Shemaya oo Nehelamu kaangwí ti beer,

²⁵ AAKOÓ MUNGÚ Aleesleemusmo, Munguú Israeli, i kaahi, «Barwiito'o aga ya/áp ar umuuwók amór yaamuloousér Yerusalemu, nee dír kaahamusmo Sefania garmoó Ma'aseya, nee dír kaahamuusér Mungú sleémeero. Baraá barwiito'ooro gár ta gooín dír Sefania a tí,

²⁶ ‹AAKOÓ MUNGÚ kuúng Sefania ugwa kaahamusmo wa qaás, kitángw kaahamusmo Yehoyada, kuúng an heé úr oo Doó AAKOÓ MUNGÚ. Gimáy daxta a gadiyeérók, slarhhamuú ti aarusmoó ila qamiím kuwa tsek ar píngu nee peehhoo iló'.

²⁷ Ahaá waáy, Yeremia kuduú Anatoti, kudá' ti aarusmoó ila qamiím, gár kusa iigahhati'iiká a milá?›

²⁸ Asma inós afo gana ilahaniís baraá Babuloni iwa kaahi, ‹Loohayhúng oo har afiqoomár niinaweeká,› iri oó', ‹Marayhúng tleehhaak, hooté', qamu dooslaak, balanghúng dahaasak nee /ayimé'.› »

²⁹ Kaahamusmo Sefania barwito'oodá' gana dír geeraá aarusmo Yeremia wa soomuús.

³⁰ Aluuwo Yeremia axweesantá AAKOÓ MUNGÚ gari axaás i kat,

³¹ «Ya/abtoorí huweek dír muu sleémeero kuduú baraá looháy dirií', Anuú AAKOÓ MUNGÚ daanduú Shemaya oo Nehelamuwo a kah, ‹Shemaya ina kilós aariirín aníng ngwa ya/aawiiká, nee kuungá' lamtós kari haratlintié'.›

³² Gawaá adoorihe, anuú AAKOÓ MUNGÚ a kah, ‹Shemaya oo Nehelamu u slaáhh dinkwa nee xwaylarose. Dír xwaylarose oo slafíngwí meét i kaahh tam oo wák oo diihhooadá' ni muk'eé' tleehh ga ár.› Asma muk'eé' nguna dukiyé', anuú AAKOÓ MUNGÚ iwa si'iya', anuú AAKOÓ MUNGÚ tí ngina oó'.»