YEREMIA 28 - Biblía Axweesantá Hhohho' ar Mungú 2004

Yeremia nee aarusmo Hanania

¹ Kurkuduú kilae, slahhángw kooán oo kurkú tsiyáhh oo waawuti'iimár Sedekia waawutmoó Yuda, Hanania garmoó Asuri, aarusmoó gixsár Gibeonír daáhh, ina dir'eé' axweés baraá Doó AAKOÓ MUNGÚ wa alé. Ina i axweés dír geeraá kaahamuusér Mungú wa ale, nee geeraá muu sleémeero, iri báy,

² «AAKOÓ MUNGÚ Aleesleemusmo, Munguú Israeli i kaahi, ‹Taaqwantidár waawutmoó Babuloni aga geeqáw.

³ Har afiqoomár kureeraá tsár awa hi'iita'a, xoosla sleémeero ar Doó AAKOÓ MUNGÚ, tidá' Nebukadnesa waawutmoó Babuloni ira tláy, nee gari huúw ay Babuloni, ngin diirií ki/ís.

⁴ Sleeme Yekonia garmoó Yehoyakimu, waawutmoó Yuda, dinkwa nee muu sleémeero oo Yuda, kudá' taa loohatís ngu ki/ís. Kár eeít, taaqwantidár waawutmoó Babuloni a geqáw, Anuú AAKOÓ MUNGÚ tí ngina oó'.› »

⁵ Aluuwo aarusmo Yeremia aarusmo Hanania guri ii axweés dír geeraá kaahamuusér Mungú wa ale, nee dír geeraá muu sleémeero kudá' aa sihhiit baraá Doó AAKOÓ MUNGÚ.

⁶ Guri báy, «Masók an adoosíng, AAKOÓ MUNGÚ adoosíng ngi tleehhi, AAKOÓ MUNGÚ axweesantók tisíng ngi boo/eesi, xooslár Doó AAKOÓ MUNGÚ ngi baraá Babuloni wa ki/isi, dinkwa nee muu sleémeero kudá' taa amoodií loohatís.

⁷ Ala hám iia qaaseek, axweesantí kuúng u babaw nee muu sleémeero.

⁸ Aaruuseedá' dír aníng nee kuunge aa giiriin iimír aange, inooín tana aariirín tawa kaahi, ‹Slaqwara, nee giyeede nee tiqtír pu/ito ni ti'iitiyá' baraá yaamaá daanduú yaariire nee waawuti'iimár /uuruú kooma.›

⁹ Ala aarusmoó waydú aariiriím aqo kun tsaahh tawa aarusmoó tinda ya/aáw nee AAKOÓ MUNGÚ, barnaxes tidá' aa aarín aa tsuwa bó/.»

¹⁰ Naagáy, aarusmo Hanania taaqwantidá' taa tseék gawaá istá Yeremia gari taataáhh, gari geeqáy.

¹¹ Hanania iri dír geeraá muu sleémeeró wa oó', AAKOÓ MUNGÚ i kaahi, «Adoorí an adoodá' taaqwantidá' waawutmo Nebukadnesa xoordu sleémeero ngira tsegiít ngir geeqaw, adoorí an tleéhh afiqoomár kureeri tsár awa hi'iitá'.» Naagáy aarusmo Yeremia iri tláy.

¹² Alaá aarusmo Hanania taaqwantidár baraá istá Yeremia ngiwa geeqáy, axweesantá AAKOÓ MUNGÚ Yeremia gari axaás i kat,

¹³ «Tláw, Hanania ádbeemuú aweek ku beer, anuú AAKOÓ MUNGÚ an kah, ‹Kuúng gár taa geeqeér a taaqwantá xa'ano, ala aníng taaqwantá muqsli an tleéhh.›

¹⁴ Anuú AAKOÓ MUNGÚ Aleesleemusmo, Munguú Israeli an kah, ‹Aníng taaqwantá muqsli ar lawaali'iima aga qaás gawaá isaá xoordu sleémeero, inooín waawutmo Nebukadnesa oo Babuloni ngu sagadiyusiyá'. Slám ugwa makaá slá/tí haniís as ngiwa sawaawuti'in nee nguwa sagadiyuusiya'.› »

¹⁵ Aluuwo aarusmo Yeremia aarusmo Hanania guri báy, «Hananía iia qaaseek, AAKOÓ MUNGÚ kuúng ugwa ya/aawiiká, kuúng mukwí un harahhifór lámtí qamiín.

¹⁶ Gawaá adoorihe AAKOÓ MUNGÚ i kaahi, ‹Aníng kuúng u hingeés baraá daanduú yaamuwo. Kuúng kurkú kilae an gwá', asma muu ugwa al/ák, AAKOÓ MUNGÚ nguri si'iyé'.› »

¹⁷ Kurkuduú kilae, qoomár slahhángw faanqwe, aarusmo Hanania iri gwaá'.