YEREMIA 27 - Biblía Axweesantá Hhohho' ar Mungú 2004

Yeremia taaqwani ngiwa gawaá istós i dahaás

¹ Qoomár iimu/úngw waawuti'iimár Sedekia garmoó Yosia, waawutmoó Yuda, Yeremia axweesantá AAKOÓ MUNGÚ gana axaás,

² iwa kat, «AAKOÓ MUNGÚ aníng ina báy, ‹Yeremía, hima nee taaqwani tleehheek ki dahás baraá istók.

³ Daqaní kaangwí huweek dír waawutmoó Edomu, nee dír waawutmoó Moabu nee dír waawutmoó Amoni, nee dír waawutmoó Tiro, nee dír waawutmoó Sidoni, ar loohír muk'ín kudá' hardah Yerusalemu, kudá' naa Sedekia waawutmoó Yuda gwa artá ay.

⁴ Mukwí geeraharuusér'ín tidá' uren ka kaangwí bay, Anuú AAKOÓ MUNGÚ Aleesleemusmo, Munguú múk Israeli, a kah,

⁵ «Aníng an kudá' yaamu iga tleehh, nee muu nee makaá sla/a kudá' dawá' ar aleesleemueé' nee ar dakw'eé' oo /uuruú koóm, aníng umuú hee un qáw ar adoodá' ngur slaa' iwa qon.

⁶ Hám daxta yaamuuká sleémeero iga haniís dír sagadiyusmoeé' Nebukadnesa, waawutmoó Babuloni, tam sleeme makaá sla/a iga haniís as nguwa sagadiyuusiya'.

⁷ Xoordu sleémeero inós ngun sagadiyuusiyá', nee na/iiwose nee nángw naangose, ay dír waawuti'iimarós baraá yaamuwo i fak. Aluuwo inós xoordaá yaariir nee waawituú yaariír ngun lawaalmooín tleehhiyá'.

⁸ Ala barnaxes xooro laqaá waawuti'iima dabaawós gaa haniská dír Nebukadnesa waawutmoó Babuloni, inooín aníng i tsuú/ ar slaqwara, nee qwari, nee tiqtír pu/i, ay dír aníng inooín ngay hhaamiis ar dákw Nebukadnesa. Anuú AAKOÓ MUNGÚ tí ngina oó'.

⁹ Naagáy kángw aaruuserhúng mu axamiisara', laqaá kángw mukdá' tlaa/aá xuaaiím, laqaá iigu'utuuserhúng tí aariiriim, laqaá kudá' giaá duxuumá', laqaá qwaslaarerhúng tidá' kuungá' nu babaw, ‹Waawutmoó Babuloni mu ilaiwawa/aara'.›

¹⁰ Mukwí kuungá' nun aaru'uumár lámtí kah, nee gawaá adoorihe kuungá' tundu loohatis yaamaá saawá'. Aníng kuungá' nun amór saáw i guús tunduri hhaamiis.

¹¹ Ala muu tumu xooro gaalá, barnaxes waawutmoó Babuloni ngwa ilaiwaa/iyé' nee ngwa sagadiyuusiyé', aníng mukwí u máw iwa hooti baraá yaamuuín wa alé, yaamuuín ngi doosliyá', ni baraadá' wa hootiyá'. Anuú AAKOÓ MUNGÚ tí ngina oó'.»

¹² Anuú Yeremia, waawutmo Sedekia oo Yuda una báw, «Waawutmoó Babuloni ilaiwawa/eek. Inós sagadiyuuseek nee mukose, daqaní kuúng a hót.

¹³ Ahaá waáy, kuúng nee mukoge gár tundus tsu/i ar slaqwara, nee qwari, nee tiqtír pu/i? Asma adoorí AAKOÓ MUNGÚ gaa oó' dír xoorodá' waawutmoó Babuloni gu sagadiyuusaaká.

¹⁴ Axweesantá aaruusedá' kuúng u babaw, ‹Waawutmoó Babuloni mu sagadiyuusaar,› ma iiárií qaasaar, asma inooín u aarír lámtí kaahiyá'.

¹⁵ AAKOÓ MUNGÚ i kaahi, «Aníng aaruuseerí nga ya/aawiiká, ala inooín aaru'uuma ngin kaahiyá' ar umuueé'. Gawaá adoorihe in amór saáwí guús, kuungá' a hhaandá' dinkwa nee aaruuserhúng tidá' nu lámtí aariirima.»

¹⁶ Aluuwo kaahamuusér Mungú nee muu sleémeero ina báw, AAKOÓ MUNGÚ i kaahi, «Aaruuserhúng ma iiárií qamiimara', tidá' aaririim tawa kaahi, ‹Qaytsiité', xooslár Doó AAKOÓ MUNGÚ kingi baraá Babulonír wa ki/is deeloorí tseewe. Asma inooín kuungá' nun al/aginá'.

¹⁷ Inooín mi iiárií qamiimara'. Waawutmoó Babuloni sagadiyuusaak daqaní kuungá' a hotá'. Ahaá waáy, gár gixsarí kas taangu tleehhi?

¹⁸ Barnaxes inooín an aaruuse, nee kinga ya/aáw nee AAKOÓ MUNGÚ, gimáy, inooín AAKOÓ MUNGÚ Aleesleemusmo ngu harhheehhe'eesiye', as xoslaadá' aa met baraá Doó AAKOÓ MUNGÚ, nee baraá doó waawutmoó Yuda, nee baraá gixsár Yerusalemu, makawa ar tláy ay yaamaá Babuloni.

¹⁹ Asma daanduú uheemiwo, nee impuudá' muqslár sirbo/e, nee kiteeridá' xoosla kay qamaamin, nee xoosla sleémeero tidá' taa geexáy baraá gixsarí aleeró,

²⁰ tidá' waawutmo Nebukadnesa oo Babuloni aa geexáy qoomár Yekonia garmoó Yehoyakimu, waawutmoó Yuda nee mukdá' ta ilaiwawa/i sleémeero oo Yuda nee oo Yerusalemu, kiwa Yerusalemúr wa loohatís.› Anuú AAKOÓ MUNGÚ tí ngina oó'.

²¹ «Iia qaasaak kángw anuú AAKOÓ MUNGÚ Aleesleemusmo, Munguú Israeli ni kah daanduú xoosladá' taa geexayi baraá Doó AAKOÓ MUNGÚ, nee baraá doó waawutmoó Yuda, nee baraá gixsár Yerusalemu.

²² Xooslasíng kan ar tláy ay yaamaá Babuloni nee iri amooqá' i mét ay dír ngay sa daawiit. Daqaní qoomaarí an qoomaadá' ngiwa ki/is nee ngay malé qaás diirí. Anuú AAKOÓ MUNGÚ tí ngina oó'.»