YEREMIA 25 - Biblía Axweesantá Hhohho' ar Mungú 2004

Wakuuse i /iikú dáhh

¹ Kurkú tsiyáhh oo waawuti'iimár Yehoyakimu garmoó Yosia, waawutmoó Yuda, AAKOÓ MUNGÚ afo gana haniís dír Yeremia as múk Yuda. Kurkudá' an kurkú geera oo waawuti'iimár Nebukadnesa, waawutmoó Babuloni.

² Yeremia kangwdaádá' guri oó' dír muu sleémeero oo Yuda nee yaamuloouusér Yerusalemu iwa kaahi,

³ «Iimír kurkú mibaá nee tám oo waawuti'iimár Yosia garmoó Amoni, waawutmoó Yuda, ay laarí, kureeri a mibeeri tsár nee tám, baraá kureeriikae aníng axweesantá AAKOÓ MUNGÚ ana axmaamiís nee umuúqo looár tlawa ngin dirhúngí aaiím ala kuungá' a axmaamisa'aaká.

⁴ Tam AAKOÓ MUNGÚ aaruuserós ngi amorhúngí ya/abaabiti umuú daqto, kuungá' axweesantadá' aga iiárií qasi'iiká, laqaá tam axaasaro aga slai'iiká.

⁵ Tunduna babáy, ‹Umuú heewo tlehhimi'iiwós kudá' slasla/aren nee kudá' tlakw ngi may, as daqaní kuungá' tawa hota' baraá yaamuudá' AAKOÓ MUNGÚ naa kuungií haniís, nee baabi'iihúng, iimír aáng wa alé, as kiwa ala' kureerisleém.

⁶ Kuungá' munguiidaá hatlá' mi eeharaharaara', laqaá mi sagadiyuusara', nee Mungú mu buhhtamisara' ar slaqsi'iihúng, kudá' taa dabaahúngár tlehhé' oo adór Mungú. Kuungá' AAKOÓ MUNGÚ bura ilaiwawa/é' daqaní kuungá' tundu muxiiká.

⁷ Ala AAKOÓ MUNGÚ i kaahi, ‹Kuungá' ana sié' aníng iwa iiárií qasa', kuungá' aníng ina buhhtisé' ar slaqsi'iidaá adór Mungú, kudá' kuungá' taa kiloohúng tlehhé'. Gawaá adoorihe, tiri kiloohúng amotlakweérí hubé'.›

⁸ «Gawaá adoorihe, anuú AAKOÓ MUNGÚ Aleesleemusmo a kah, ‹Kuungá' axweesante'eé' kawaqo si'ii'i iiárií qaasaro,

⁹ aníng daxta xoordu sleémeero awa /iikú dahhá', dinkwa nee sagadiyusmooeé' Nebukadnesa, waawutmoó Babuloni, ngin huúw as yaamuuká' ngiwa ii haraatlaya' nee múk baraakií dirií', dinkwa nee xoordaá inslaawaay sleémeero. Inooín aníng in hhaamiís ló'wa alé, nee ngiri gár dae tlaaq tleéhh, kiri waaniqín, nee kiri waaqaqaa' ay alhhe'eesay wasle.

¹⁰ Aníng afor'ín ar qwala/ nee ar bara/, nee ni/imár /ayla, nee afór xoosliingw a qwaareés dir'ine nee tsaa'asór oh a gaás dir'ine.

¹¹ Yaamuuká' sleémeero ni taangu tleehhitiyá' nari deewaaiyá', nee xoordaá inslaawaywí waawutmoó Babuloni ngun sagadiyuusiyá' kureeri mibeeri faanqwe.

¹² Ala qoomár kureeriiká' mibeeri faanqw birna waarahhiyé', waawutmoó Babuloni un slaáhh dinkwa nee xooroorose. Yaamuukaá múk Kaldayo i hhaamiís asma tlakweemaaín kudá', nee yaamuuká' ngay taangu tleéhh ay alhhe'eesay wasle.

¹³ Aníng muruudá' sleémeero naa axweés daanduú yaamuukae ngu huúw, nee tidá' sleémeero taa gooín baraá kitaábuuwí, tidá' Yeremia aa aarín daanduú xoordu sleémeerowo a boo/eés.

¹⁴ Múk Babuloni tari lawaalér xoordaá hatlá', nee kiri sawaawuti'ín nee waawitá. In buú' ar har qoomoó tlehhmi'ii'ín kudá' naa tlehhiitiyé'.› »

Mungú xoordu gi sakwasleemuut

¹⁵ AAKOÓ MUNGÚ, Munguú múk Israeli, aníng ina báy, «Areek, xooslmoowú gawaá dakw'eé' oo difaáír buhhtaeene haáts, huweek amór xoorduudá' kuúng uy ya/aaw, wahaaseek.

¹⁶ Xoorduudá' difaái ngi wahiyá', niri ta/amitiyá' adór múk aa oonimiit, nee tari slarhhamumuut as mukdá' yaariír ta tsu/i baraá tla/angw'ine.»

¹⁷ Naagáy xooslmoodá' nguri gawaá dabaá AAKOÓ MUNGÚ wa taataáhh, xoorduudá' AAKOÓ MUNGÚ aníng i ya/aáw sleémeero ngiri wahaás.

¹⁸ Ana giiriím ar Yerusalemu, nee gixsadaá Yuda, nee waawitaáín nee geeraharuuser'ín, as kahhó' iwa xaanxay tleehhitiya', nari deewaaiyá', nee tawa gár ta waaqaqai nee ar ta lu'umisi. An adór i dirii'iya' ay laarí.

¹⁹ Aluuwo tari Farao, waawutmoó Misri nee sagadiyuuseerós, nee geeraharuusér mukós dinkwa nee mukós sleémeero,

²⁰ nee dahaaye sleémeero tidá' yaamaá Misrír wa hoot, nee waawitá sleémeero oo yaamaá Usi, nee waawitá sleémeero oo yaamaá Filisti, nee oo Ashkeloni, nee oo Gasa, nee oo Ekroni, nee yaamuudá' naa meetiye' awa Ashdodi.

²¹ Aluuwo muu sleémeero oo Edomu, nee Moabu, nee oo Amoni.

²² Waawitá sleémeero oo Tiro nee Sidoniro, nee waawitá sleémeero oo afaá Tlawtá Tla/aangw.

²³ Nee yaamuloouusér Dedani, nee ar Tema, nee ar Busi, nee muu sleémeero kudá' sagér deeqwaquút, nee soqoorír gixaaxáw tla/ángw saga.

²⁴ Waawitá sleémeero oo Arabia, nee waawitá sleémeero oo xoorduudaá sloohhaana baraá xaanxaywo.

²⁵ Waawitá sleémeero oo Simri, nee oo Elamu nee Media.

²⁶ Waawitá sleémeero oo /iya kudá' sawén nee oo tsewene, oo wák alaá kuqá', nee waawuti'iima sleémeero baraá yaamuwo xooslomoowí ku wah. Nee alaá kuká' sleémeerowo waawutmoó Babuloni gun wah.

²⁷ AAKOÓ MUNGÚ, aníng iri báy, inooín ki beer, «Anuú AAKOÓ MUNGÚ Aleesleemusmo, Munguú Israeli, a kah, ‹Wahaak, oonimité' nee ta wa/amiindá', ta huhu'uundá', ma baloó tlawaara' malé aleeró, asma tsu/utaadá' ni huuw tla/angwhúng i ale.›

²⁸ Barnaxes xooslmoosíng kwa sií' gawaá dabaawók i alé, kuúng ki beer, anuú AAKOÓ MUNGÚ Aleesleemusmo an kah, ‹Adór wahato kur meera' i káhh.

²⁹ Qaytsiít, aníng amotlakwe ngin huúw baraá gixsar'eé'. Xáy, ka xua' muxtaro a /uurá'a? Kuungá' muxtaaro tundu mayká, asma slaqwara ngaa tleés ar múk yaariír kuwa tsu/i gawaá daanduú yaamuwo.› Anuú AAKOÓ MUNGÚ Aleesleemusmo tí ngina oó'.»

³⁰ Kuúng Yeremia, daanduú kaangwí sleémeero dir'ín i aarimeek nee tawa o', «AAKOÓ MUNGÚ in /orootl iimír gáwtá wa alé, in tsee' iimír didá' hhoohhoo' ar hotaawós, in /orootl ar afór ur gawaá mukós, in tsee' adór heé sabiíbuú tsoo/iít, daanduú múk baraakaá yaamu sleémeero.

³¹ Tsimaahhirí iri hardát ay hhapeemo sleémeero. Asma AAKOÓ MUNGÚ daanduú xoorduwo i kwasleemár kón. Muu sleémeero gwaa sakwasleemuút, múk tlákw gu tsuu/ ar paánga. Anuú AAKOÓ MUNGÚ tí ngina oó'.»

³² AAKOÓ MUNGÚ Aleesleemusmo i kaahi, «Qaytsiité', amotlakwe i hardát dír xoorór wák, aluuwo ay dír xoorór hatlá', bambaao kingi tlees baraá ku/uyaá yaamuú wá ale.

³³ Baalaadae awa ta tsu/i nee AAKOÓ MUNGÚ i qaatiyá' bihhaá wák awa yaamu ay bihhiiqá'. Ki sa tsuunqumisiiká, sleeme ki burumburiiká, laqaá ki foliitiiká, aqo nin meetiyá' gawaá daanduú yaamu adór tsuunkoó hikwa.

³⁴ Tsuunqumisé', kuungaásingaá de'eemusér muk'eé', nee /aa/é'! Baraá da/arár wa gwaangwaraa'amiité', kuungaá de'eemusér bee/aangw! Deelór kuungá' tunduwa tsu/i, nee tunduwa diyaa/i naa hardát. An pahhá' adór xooslár hhohho'.

³⁵ De'eemuse dír i gop i káhh, laqaá geeraharuusér bee/aangw amór tay gowi i káhh.

³⁶ /Aa/aá de'eemuuse iiárií qaasaak, nee uuír geeraharuusér bee/aango. Asma AAKOÓ MUNGÚ qawtanti'ín gaa hhitín.

³⁷ Daqtidá' amohhoo' kaa hhitín, asma buhhtaadá' xaraaslá' awa AAKOÓ MUNGÚ.

³⁸ AAKOÓ MUNGÚ mukós gwa tawo geexáy, adór diraangw mar'irós ngir tawo gixaaxay. Yaamuuín naa deewaaiyé' asma slaqwarár mukdá' gi baramaanuús, nee as buhhtaá xaraaslá' awa AAKOÓ MUNGÚ.»