YEREMIA 24 - Biblía Axweesantá Hhohho' ar Mungú 2004

Lakwantoó tsár oo mamaá /aantsí

¹ Nebukadnesa waawutmoó Babuloni, Yekonia garmoó Yehoyakimu waawutmoó Yuda guna Yerusalemúr wa loohatís ay yaamaá Babuloni, dinkwa nee geeraharuusér Yuda, nee mukdá' maray tlehhtuwo gi xua, nee kareerahe. Aluudae AAKOÓ MUNGÚ aníng ina iigu'uútuwí laqán. Aníng lakwaantoó tsár oo /aantsír aa hamat una ár kwa qaás dír geeraá Doó AAKOÓ MUNGÚ.

² Lakwaantír geera /aantsír ló'wa hhohho' ga koón, inós an adór /aantsír bu'úngw geera. Ala lakwaantír tsár gár i koon a /aantsír aa hhiturut ar aa kufut, tidá' /aymaaro ya/aamaaká.

³ Naagáy AAKOÓ MUNGÚ aníng iri báy, «Yeremía, gár taa aán?» Aníng nguri, mu/aywaáts, «Mamaá /aantsí ina ár, tidá' hhohho' ka ló'wa hhohho', tidá' tlakw ka ló'wa tlakw, tam /ayma ga ya/aandaaká.»

⁴ Axweesantá AAKOÓ MUNGÚ ngiri malé axaás, i kat,

⁵ «Anuú AAKOÓ MUNGÚ, Munguú Israeli, a kah, ‹Adór /aantsírí kar hhohhó', an adór múk Yuda, kudá' taa loohatís baraá yaamaá Kaldayo aníng ngur ar tawa múk hhohhó'.

⁶ Aníng i ló'wa de'eém daqisleeme, nee ngiri ki/ís baraá yaamuuká'. Aníng inooín i malé tleéhh, i baloó fee/aaká. Aníng inooín i dahaás adór balaangw, ala i tu/umaaká.

⁷ Aníng in tsaahhárí haniís adór aníng tar AAKOÓ MUNGÚ. Inooín tari muk'eé', aníng tari Munguúín, asma inooín nin amor'eéní ki/iyá' ar muner'ín sleémeero.›

⁸ «Anuú AAKOÓ MUNGÚ a kah, ‹Adoodá' /aantsír aa hhiturut /ayma ngir ya/aandaaká, an adoodá' ni tleehh dír waawutmo Sedekia oo Yuda, nee geeraharuusedár hatlá' dinkwa nee mukdá' sleémeero aa meet baraá yaamaá Yerusalemu, tam nee kudá' taa loohatisi baraá yaamaá Misri.

⁹ Aníng inooín in gár dae tlaaq tleéhh baraá waawuti'iima sleémeero ar daanduú yaamuwo, inooín kiri niqín nee kiri waaqaqaa', nee kiri waaqaseesén nee kiri lu'umis umuúqo dír ngi loohatisi baraá yaamuwo.

¹⁰ Aníng inooín in hhaamiís ar slaqwara, nee qwari nee tiqtír pu/i ay dír nay hhana' baraá yaamuudá' aníng naa haniís dir'ín nee dír baabi'ii'ín.› »