YEREMIA 23 - Biblía Axweesantá Hhohho' ar Mungú 2004

Harahhifór aluúwaá hi'iit

¹ Tsaxwaaín de'eemuusedá' bee/ángw hhaamimiis, nee gu baraá qawtantaeé' wa diya/aam.

² Gawaá adoorihe, anuú AAKOÓ MUNGÚ, Munguú múk Israeli a kah, daanduú de'eemusedá' muk'eé' de'ema. «Kuungá' bee/angw'eé' ugwa tlatlahhasé' nee kuri gusisiindé', ala ugwa amohhe'eemisi'iiká. Ga/aawaak, aníng kuungá' nun muúx asma tlehhmi'iihúng kudá' tlakw.

³ Naagáy aníng bee/angw'eé' kudá' aa meet un burumbuúr baraá yaamu sleémeerowo, amoodá' ngway diyaá/, ngiri ki/ís baraá qawtanti'ín. Inooín niri laqwaaliyá', niri dooginá'.

⁴ Aníng de'eemuusér hatlá' ar gi amohhe'eemiis an sláw, inooín niri malé da'ayumitiaaká, laqaá niri malé amoqwaqwadina'aaká, nee tam ar wák i qwatká.» Anuú AAKOÓ MUNGÚ tí ngina oó'.

⁵ AAKOÓ MUNGÚ i kaahi, «Ga/aawaak, baala ni hardát ar aníng harma/itá hota ganaa' ngiwa doó Daudi wa duux, inós iri waawuti'ín ar sagalooa, inós giri geerahaar ar sakwasleemár ganaa' nee ar hotaá ganaa'á' baraá yaamuwo.

⁶ Qoomár waawuti'iimarose múk Yuda ku ba/amis, nee múk Israeli i saxareemár hoot. Inós umuuwós ku bay, ‹AAKOÓ MUNGÚ an gan'amuurén.›

⁷ «Gawaá adoorihe, anuú AAKOÓ MUNGÚ a kah, baala ni hardát ar muu bir lo'ór /aay tawa ooiiká, ‹Adoodár AAKOÓ MUNGÚ ir hotaatin, kudá' múk Israeli gwa duux baraá yaamaá Misrír wa alé.›

⁸ Ala inooín bar lo'o ka /aay tan ooi, ‹Adoodár AAKOÓ MUNGÚ ir hotaatin, kudá' múk Israeli ngwa /iikú wá duux, nee gwa baraá yaamu sleémeeró wá geerahaar, amoodá' aáng ngay diyaá/. Aluuwo inooín tari baraá yaamuuín wa hoot.› »

Aaruusér lama

⁹ Daanduú aaruuseero aníng aga diqay tsatiít, slaqwtaeé' sleémeero ina daaraxát, aníng a adór heé aa ooniit, adór heé buura aa ló'wa ooniitís, asma AAKOÓ MUNGÚ nee as axweesantós tidá' hhoohhoo'.

¹⁰ Asma yaamu naa hatsiyé' fuquseero, yaamu i tsuunqumiisiyá' asma lo'o, qawtantaín ar baraá darma aa kát. Tlehhma'aá muu ki ló'wa tlakw, /uuruuín kun ar gadiyuus ar adór qoomaaká.

¹¹ AAKOÓ MUNGÚ i kaahi, «Aaruuse nee kaahamuusér Munguhe Mungú ngu ilaiwawa/iaaká. Tam ay baraá dooeene tlakweemaaín iga ár.

¹² Gawaá adoorihe, loohir'ín tí dir'ine a adór loohír tar ninkiriitsiti ay baraá giwti, tidá' inooín kiwa tliwii/i niri huuhu'uná'. Asma aníng i amotlakwérí huúw qoomár muxtar'ín birna xeér. Anuú AAKOÓ MUNGÚ tí ngina oó'.

¹³ Baraá tla/ángw aaruusér Samariaro gár ló'wa buhhtamis aga ár. Inooín nina aariiriné' ar umuú Ba'ali, muk'eé' oo Israeli nguri qwaareesiyé'.

¹⁴ Ala baraá aaruusér Yerusalemuro xisluú dae tlaáq ugwa ár. Inooín in fuquusiyá' nee i /aysenaá tlaaqiyá', mukdaádá' tlakweemaá tlehhiít ngun muunií qaminá', as adoorí heé tlakweemaá mamáw i kaahh. Inooín sleémeero dir'eene an adór múk Sodoma, yaamuloouuser'ín a múk tlákw adór múk Gomora.»

¹⁵ Gawaá adoorihe, anuú AAKOÓ MUNGÚ Aleesleemusmo daanduú aaruusér Yerusalemuro a kah, «Ga/aawaak, aníng in /aymiís ar xa'anoó qarqaár, ngiri wahaás ar ma'aá qarkú koomá'. Asma aaruusér Yerusalemu Mungú ilaiwa/ameero nguna geerií mayé', tleehhmuuwí iri tsiyaayaxaát baraá yaamuwo.»

¹⁶ AAKOÓ MUNGÚ Aleesleemusmo i kaahi, «Axweesantá aaruusedá' kuungá' ma iiárií qamimara'. Inooín harahhifór lama ngi kaahiyá', gár i kaahiya' a tlataaín awa tawo, ala kangwdá' i amor'eé' dahhiiká.»

¹⁷ AAKOÓ MUNGÚ i kaahi, «Inooín i lakiitiaaká mukdá' axweesante'eé' ga waaqaqaá' nguwa babaya', ‹Gár tlaakw ar nu slaw i káhh.› Nee umuúqo heewo oo sagagawduuwós gu eeharaahár ngun babaya', ‹Gár tlaakw ar u slaw i káhh.› »

¹⁸ Dír aaruuseerihe aarusmoó aa daqay dír kwasleemár Mungú gaálaay? Oo axweesantós gaa axaas nee gari tsaáhh? Laqaá oo axweesantós gaa iiárií qaas?

¹⁹ Ga/aawaak, buhhtaá Aakoó Mungú naa hardihiyé', kudaá adór bambaao. Múk tlákw ngu sage slahhiyá'.

²⁰ AAKOÓ MUNGÚ buhhtaawo i baloó alií ki/iiká, ay dír tidá' aa slaá' tleehharo baraá muunaáwose ngay boo/eesi. Deelór ni hi'iita tí kuungá' a tsaahha hhe'eesá'.

²¹ AAKOÓ MUNGÚ i kaahi, «Aníng aaruuseerí ngaa ya/aawiiká, inooín nina sager'ín ar daqayé'. Aníng kángw naa dir'íní oó' i kaahh, ala inooín nina aariiriné'.

²² Inooín geeraawo bar kwasleemar'eé' ngaa aye', inooín geeraawo axweesante'eé' ngaa dahareemisiyé' dír muk'eé'. Geeraawo muk'eé' kunga ki/ís baraá loohidá' tlaakwe, nee geeraawo kunga duúx baraá tlehhmi'iidá' tlakwe.»

²³ AAKOÓ MUNGÚ i kaahi, «Aníng an Mungú dirhúng i tseéw, a Munguú saweeká.

²⁴ Xáy, hee nahhaata gaqo aleesláya ngway qo tsuwa araaká? Ahaá, anuú AAKOÓ MUNGÚ a kudá' dawaakáhe umuú diiro, gawaá doori nee baraá yaamuwo? Anuú AAKOÓ MUNGÚ tí ngina oó'.

²⁵ Aníng axweesantá aaruuseedá' lamtá aaririim ar umuueé' aga axaás tidá' tawa kaahi, ‹Aníng aga tlatitiím, aníng aga tlatitiím.›

²⁶ Xáy, adoorí i kumaamit ay xaylá? Aaruuseerí qwanoó muner'ín ngu alkomkakoon ay xaylá? Aaru'uumarí ar lama nee al/aymár muner'ín ngi alkomkakoon ay xaylá?

²⁷ Ar tlataaín kukae gár ta tlehhiiti a muk'eé' ngun sage qwaareemisiyá', aníng iwa gunqareesiya', ar adoodá' baabi'ii'ín aníng ira gunqareesiyé', nee Ba'ali nguri haratlinti'iyé'.

²⁸ Aarusmo kudá' tlataawós káh, tlataawós ngi oin, ala kudá' axweesante'eé' ga koóm ngi dahareemisi ar inkihhimu. Muundáy nee aangano iqo tsuwa alqoná'a? Aanuú AAKOÓ MUNGÚ tí ngina oó'.›

²⁹ Anuú AAKOÓ MUNGÚ a kah, ‹Axweesante'eé' a adór asla, a adór yuúnduú tlaa/e tsu/uta.›

³⁰ Gawaá adoorihe, anuú AAKOÓ MUNGÚ a haraatláw dír aaruuseedá' axweesante'eé' fisisiim.

³¹ Ar looeemawo anuú AAKOÓ MUNGÚ a haraatláw dír aaruseedá' tlororoo' ar kah, AAKOÓ MUNGÚ i kaahi, laatí aníng nga ya/aawiiká.

³² Eeít, anuú AAKOÓ MUNGÚ a kah, ‹Aaruuseedá' a i haraatláw, tidá' tlataaín awa lamtá aaririim dír muk'eé', nee muk'eé', ngwa qwaareesiyé' ar lamtaín, nee tlooraaín. Ala aníng iga ya/aawiiká, nee sleeme gár ngaa báw i káhh.› Gawaá adoorihe, gár mukwí nguwa gaa buiya' i káhh, Anuú AAKOÓ MUNGÚ tí ngina oó'.»

Xáy, axweesantá AAKOÓ MUNGÚ ka iiloóe?

³³ AAKOÓ MUNGÚ aníng ina báy, «Hee tam gaalá laqaá aarusmo laqaá kaahamusmoó Mungú bir yaahamiis huwaadá' AAKOÓ MUNGÚ nuy tsa/amiís gawaarén i amoomá? Kuúng daqaní ki beer, ‹Kuungaá kilá' an huwa dír AAKOÓ MUNGUHE, nee inós nun amór saáw i kwaahh.›

³⁴ Slám aarusmo laqaá kaahamusmoó Mungú, laqaá tam hee gaalá bira oó', ‹Huwár AAKOÓ MUNGÚ,› aníng heewí un muúx dinkwa nee múk do'ós sleémeero.

³⁵ Kuungá' gár yaahasaro tunduwa hariím dír hee nee inslaawmoowose, nee dír hee nee hhiyaawose, a tí, ‹AAKOÓ MUNGÚ gár aa mu/aywaáts a milá? AAKOÓ MUNGÚ mii kaáhi?›

³⁶ Ala daanduú huwár AAKOÓ MUNGÚ mukuwa malé oó', asma tidá' hee i axweesi an huwaarós ar kilá'. Nee muu axweesantá Munguúdá' slaáf gan paslmis. Inós an AAKOÓ MUNGÚ Aleesleemusmo Munguúín.

³⁷ Daqaní aarusmo ku yaahasá', ‹AAKOÓ MUNGÚ uwa mu/aywaáts mii kaáhi?› Laqaá, ‹AAKOÓ MUNGÚ mii kaáhi?›

³⁸ Ala inooín bar hara'ayar'eé' ngaa geexaayé' nee tawa kaahi', ‹Huwár AAKOÓ MUNGÚ,› haandá' aníng inooín iga báw, ma kaahara', ‹Huwár AAKOÓ MUNGÚ,› naagáy ki beer,

³⁹ ‹Aníng kuungá' nu amór saáw i kwaáhh dinkwa nee gixsadá' naa dír baabi'iihúng i haniís nee kuungae.

⁴⁰ Aníng kuungá' nu mureekeés ay kureeraá kureér nee murér ta baloó gunqaresa'aaká a sleerá'.› »