YEREMIA 22 - Biblía Axweesantá Hhohho' ar Mungú 2004

Ya/abtór daanduú doó waawuti'iimár Yuda

¹ AAKOÓ MUNGÚ i kaahi, «Tláw dír doó waawutmoó Yuda ku beer,

² ‹Kuúng waawutmoó Yuda kuúngudá' aga iwit gawaá kitángw waawuti'iimaár Daudi, dinkwa nee sagadiyuuserók nee mukók kwí daraahá' ar afeerí, axweesante'eé' iiárií qaasaak anuú AAKOÓ MUNGÚ.›

³ Anuú AAKOÓ MUNGÚ a kah, ‹Muruú ganaá' nee oo qoóm tlehhiitaak. Heé taa daqaari'iima hayóh /iisaak dabaá múk /aytuuseero. Muu mu slahh'eemisaara' nee dahaayeero, tam na/aá panaay nee kwaeeliwo. Tam tseerdaá múk dakuús wásl mi diirí ku'umiisara'.

⁴ Axweesante'eé' tí bar aga iialooesé' naagáy daqaní waawitaádá' waawuti'i'iím gawaá kitángw Daudi wa alé, i kumiit darhuú afkú doó waawutmoowo. Inooín dinkwa nee sagadiyuuser'ín nee muk'ine, tari tsa/aa/án gawaá daandemaá faras, nee gawaá gaardaá faras i uuruxun.

⁵ Ala barnaxes aga iialooeesi'iiká baraá axweesante'eé' tihe, anuú AAKOÓ MUNGÚ lo'o aga /aáy adór yaamuuká' ngir taangu tleéhh. Anuú AAKOÓ MUNGÚ tí ngina oó'.› »

⁶ AAKOÓ MUNGÚ i kaahi daanduú waawuti'iimár Yudawo, «Tam do'owí ku hhoohhooe adór yaamaá Gileadi, adór ságw tloomár Lebanoni, ala looeemaawo aníng diirí a xaanxay tleéhh, tari gixsár hotángw muko ya/aamaaká.

⁷ Múk kuúng u hhaamiís daa ngu amohhe'eés, umuú hee nee xooslmoowós baraá dakose. Xaaiiwók kudaá sahhta awa hhohho' kin tsaat kiri kwaahh baraá asla.

⁸ Naagáy múk yaariír oo xoordaá hatlá' barta waaraahh bihhaá gixsadae umuú heewo heé hatlá' gun yaahaas, in ooi, ‹Ahaá waáy, gár AAKOÓ MUNGÚ adoorí ngisa tleéhh dír gixsarí ur?›

⁹ Kiri mu/aywaats nee múk hatlá', ‹Asma inooín alqadór AAKOÓ MUNGÚ nga oohi'iiká, nee munguaá hatlá' ngiri haratlintaati'iyé', nee ngay sluufmiisiyé'.› »

Ya/abtór daanduú Shalumu

¹⁰ Heé aa gwaa' mu sa/aa/amiimara' laqaá ma tsuunqumisaara' as gwa'ararós, ala kudaádá' tar tlay amór saaw na sa/aa/amiimaak, asma inós i malé ki/iiká, yaamuuwós ngiwa malé ari.

¹¹ Asma daanduú Shalumu garmoó Yosiawo, waawutmoó Yuda, kudá' aa waawuti'in alaá baabuúwós Yosiawo, Shalumudá' aa diirí wa tlay, AAKOÓ MUNGÚ i kaahi, «Inós baloó diirí ki/iiká,

¹² ala in gwaa' amoodár kilá' kway huúw baraá lawaali'iima. Tam ado gaalá yaamuuká' gi baloó ariiká.»

Ya/abtór daanduú Yehoyakimu

¹³ A tsaxwaawós heedaádá' do' gwaa tleehh ar /ayta, yooraywós guri doók ar hara/uuntsa, kudaádá' muu gu tawó ar gadiyuús, ala gu bu'unká.

¹⁴ Inós i kaahi, «Aníng doó yangaariír un tleéhh, ngway qoroófár úr i tleéhh,» guri pa/eerií tleéhh, peehhoó sahhta guri koo/ír dó' ar tleéhh, guri qaalín ar kal'aá da/aten.

¹⁵ Xáy, kuúng kawa xu', tuna waawutmoó wa qaási as do' kuwa tlehh ar xaa'aá sahhta? Baabuúwók ina /ayín nee iri wahán, muruú ganaá' guri tlehhiít, iri hoót ar hotaá ganaa'á'. Umuú gaaro iri ya/aán dirose.

¹⁶ Múk liitlakwén nee narkuuteero giri hariímar'ín i haniís, umuú gaaro iri ya/aán. Adoorí an adoodá' anuú AAKOÓ MUNGÚ ira xuú'.

¹⁷ Ala kuúng ilaawók nee muunaáwoge in tlam/aán baraá slaasláwár hariimaaká. Múk dakuús wásl una tsú/, muu kuri baramaanús nee kuri /aytiín ar gurtleemu wasle.

¹⁸ Gawaá adoorihe daanduú Yehoyakimuwo garmoó Yosia, waawutmoó Yuda, AAKOÓ MUNGÚ i kaahi, «Qoomár bira gwaá', heé gu sa tsuunqumiís i kaahh, oo káh, ‹Uúw, laá hhiyaeé'!› Laqaá, ‹Uúw laá hho'or'eé'!› Heé gu sa /aá/ i kaahh oo káh, ‹Oóyéy laá aakooeé'!› Laqaá ‹Oóyéy laá waawutmooeé'!›

¹⁹ Inós kun fool ar ilaiwa/ame wasle adór daqwaay, kungun duuruux, kuri kwaahh amór saaw dír afkú gixsár Yerusalemuro.»

Amotlakwér Yerusalemu ga slaw

²⁰ Kuungá' múk Yerusaleému, tsa/amé' gawaá Lebanoni, /aa/é', aforhunge tsee'é' amór Bashanír wa alé, /aa/é' amór tloomár Abarimu wa alé, asma sla'aaruuseerhúng sleémeero kaa hhaamiís.

²¹ AAKOÓ MUNGÚ ina axweés nee kuungá' qoomár tawa baraá diihhooa, ala kuungá' tari oé', «U iiárií qaasanaaká.» Adoorí an adoodá' tar hotaatinda' iimír tawa masoomba. Kuungá' afór AAKOÓ MUNGÚ aga iialooesi'iiká.

²² Geeraharuuserhúng ka haritlees nee fur'a, mulqerhúng karir tláy baraá loohaay, daqaní kuungá' tari muruta', nee tari amoqwaqwadiindá', asma tlakweemaahúng kudá' taa tlehhé'.

²³ Kuungá' yaamuloouusér Lebanoni, handá' maraá hotaangw iga tlehhé' tla/eeraá xaa'aá sahhta, xáy adór tir tu/a' a adoomá dír slahh'amuudá' hi'iita, slahh'amuú adór kuquú /ameenír xwayla.

Sakwasleemár Mungú daanduú Konia

²⁴ Daanduú Koniawo, waawutmoó Yuda garmoó Yehoyakimu, AAKOÓ MUNGÚ i kaahi, «Aníng lo'o aga /aáy, tam geeraawo kuúng bar an mungay'eene, kuduú gawaá diitsár dakw'eé' oo doó /iyáy, kudá' ni layárár qamaamiim, aqo un duúx, nee uri amór saáwí kwaáhh,

²⁵ uri haniís dír mukdá' kuúng u gaasár wa slaá', nee dír kudá' kuúng ta ló'wa da'ayuumit, tam baraá dabaá Nebukadnesa, waawutmoó Babuloni, nee baraá dabaá múk Kaldayo.

²⁶ Aníng kuúng un guús baraá yaamaá ta xu'uká, kuúng dinkwa nee aayoorók tidár xwayliito'ó. Kuungá' tsaraawo tari lawaalér yaamaá kuungá' tunday laqwaaliiká, tari amoodá' i qatlá'.

²⁷ Kuungá' an ló'wa ilatleerusá' tawa ki/a' baraá yaamuuká', ala a baloó ki/a'aaká.

²⁸ Xáy, heewí ta bay Konia a adór hutloó aa gwaái kudá' ta waaqaaqai nee kuri kwaáhh tsee/ií alé? Ahaá waáy, inós nee na/iiwose gár kisa amór saáw i kwaáhh, baraá yaamaá i xuiiaaká?»

²⁹ Aá yaámu, yaámu, yaámu, axweesantá AAKOÓ MUNGÚ iiárií qaasaak!

³⁰ AAKOÓ MUNGÚ i kaahi, «Heewí kaangwí ti gooiin tawa adór heé na/aá koomaaká, a heé gaa tleehharo ga aleeslawaaká baraá hotaawose. Asma baraá xwaylarose hee i kaahh oo kitángw waawuti'iimár Daudi gu i iwiít, nee oo xoorór Yuda ga sawaawuti'iím.»