YEREMIA 20 - Biblía Axweesantá Hhohho' ar Mungú 2004

Gilaá Yeremia nee Pashuri

¹ Kaahamusmoó úr oo Doó AAKOÓ MUNGÚ kudá' ta bay Pashuri, garmoó Imeri, inós Yeremia iwa aariirin guna axaás.

² Naagáy Pashuri Yeremia guri muúx, nee guri tseék baraá peehhoó iló' dír afkuduú bihhaá gawa oo Benyamini baraá Doó AAKOÓ MUNGUHE.

³ Matlaatlér looa niwa tleér Pashuri Yeremia guri gweér baraá peehháydá' iloe. Yeremia Pashuri guri báy, «AAKOÓ MUNGÚ kuúng daxta u ateetiiká ar umuú Pashuri, kuúng daxta tun bay, ‹Dae tlaqa umuú bihhiiwo.›

⁴ Asma AAKOÓ MUNGÚ i kaahi, ‹Qaytsiít aníng kuúnguú kilá' u de'eérí tleés, mulqeerók kari dae tláq. Inooín kin tsuu/ ar paánga, nee wakuuser'ín dír ilaawók wa alé. Múk Yuda sleémeero un haniís baraá dabaá waawutmoó Babuloni, inós bahh'ale gin loohatis ay Babuloni, nee bahh'ale gin tsuu/ ar paánga.

⁵ Slám daqaari'iima sleémeero baraá gixsarihe, nee slaasláwarós sleémeero, nee muruudá' sleémeero oo afhhamít, dinkwa nee qaasidár waawituú Yuda taa tatsi, aníng an haniís dír wakuuser'ín, nee umuú gaaro kari ar tláy ay Babuloni.

⁶ Nee bartoge kuúng Pashuri, nee múk do'oge, tundu loohatis ay Babuloni. Tari qatlá', tunday amoodií foliit dinkwa nee mulqeerók tidá' taa aaru'uumár lámtií aaiín.› »

Yeremia i dír Mungú i wa/aa/uus

⁷ Aá AAKOÓ MUNGÚ, aníng iga al/ák, aníng al/aymaadá' ngiri ya/aám. Kuúng /uuru un koón ta ak aninge, kuúng aga baaliín. Tlaatla/aangw sleémeero aníng a heé ta waaqaseesen, umuú heewo in niqín.

⁸ Umuú daqto bar axweés an wa/aá/ niwa kah, «Gaa a /ayta nee hhitiru'uuma.» Asma axweesantá AAKOÓ MUNGÚ bar alki/iít, aqo tin tli/imis nee tin niqín tlaatla/aangw sleémeerowo.

⁹ Ala aníng bara oó', «Aníng umuú AAKOÓ MUNGÚ daxta un baloó ooaaká, sleeme a ilaawatsaaká ar umuuwós,» muunaaeé' in da/aa/anuut baré kwaáo adór asla in baraá faduueé' wa ót, an mak qiítl as mawa ilawaáts, ala ila/aro tin harslaaqaát.

¹⁰ A axamiís muu iwa saasahhan daanduueene, aníng taa umií tsaát i babaya', «Dae tlaqa umuú bihhiwo.» Bahh'alé ta kaahi, «Tlawsé', sakwasleemutaak! Qwalaas, u sakwasleemutaán!» Mulqer'eé' sleémeero i daamaraán iwa kat, «Doóqa i tapiis, atén daqaní li/aay un buaán.»

¹¹ Ala kuúng AAKOÓ MUNGÚ a dinkwa nee aníng. Dir'eene kuúng a adór migusmoó dae tlaáq. Gawaá adoorihe kuká' aníng i baramaanuusá' i dukuutsiyá', baaliro i aleeslay'aaká. Ki ló'wa mureekees, asma i baalina'aaká. Murér alhhe'eesay wasle ngin slayá', ar taqo baloó gunqareesiiká.

¹² Aá AAKOÓ MUNGÚ Aleesleemusámo, kuúng múk gan'amuú koóm un iiaraa'át, kuúng muruú baraá munér muu nee oo baraá inslawaywo u ga/eér. Aníng masók an ár wakuuser'eé' kawa li/áy bu'. Asma tí aníng nga máw gawaá dabaawók i aleeró.

¹³ AAKOÓ MUNGÚ i daa'aak, AAKOÓ MUNGÚ xirfayemisaak, asma inós heé liitlakusmo gwaa ba/amís dír dabaá múk tlakwe.

¹⁴ Baalaadá' aníng tiwa laqwaál i tsareree'et, baalaadá' aayor'eé' aníng iwa laqwál tsuuqa mingiwa sleér.

¹⁵ I tsarere'eeti, heedaádá' baabuúeé' gwaa beemuú ay, «Na/oó garma kwa laqwaál.» Baabá guri qwal/aás.

¹⁶ Heewí masók in adór gixsár taa daáhh tleehhiit, tidá' AAKOÓ MUNGÚ aa daáhh ar gurtleemu wasle. Heewí masók tsuunqumis gun axaas matlaatleero, nee tlaatla/aango masók tsimaahhír slaqwara gan axaas.

¹⁷ Asma heewí aníng iga gaasiiká baraá guruú aayor'eé'. Aayor'eé' geeraawo an /aantar'eé', guruuwós iri yangareemadá' wa iwaawiít daqisleém.

¹⁸ Ahaá waáy, aayor'eé' gár isa laqwál? Xáy, tina xwaylúyi, as slahh'amu nee gurhaami ngiwa slaw? Nee niwa hoot ar hotaá mure?