YEREMIA 2 - Biblía Axweesantá Hhohho' ar Mungú 2004

Mungú a xuumusmoó múk Israeli

¹ Axweesantá AAKOÓ MUNGÚ ana axaás i kat,

² «Tláw ay amór yaamuloouusér baraá Yerusalemu, ki beer, adoorí an tidá' AAKOÓ MUNGÚ i kaahi, ‹Aníng inkihhimuduú qoomár kuúng tawa masoomo un insláw, adoodá' ira slá' geerií aleeró adór múk ti duuxór wa slaá'. Ina eehát baraá xaanxaywo, baraá yaamuudá' taa dooslikahe.

³ Múk Israeli a múk hhohhó' dír AAKOÓ MUNGUHE, xwaylarós tidár baris. Heé gi gár tlaákw i tleéhh i hhitiruut, amotlakwe ga sláy.› Anuú AAKOÓ MUNGÚ tí ngina oó'.»

Tlakwemaá bariisér Israeli

⁴ Axweesantá AAKOÓ MUNGÚ iiárií qaasaak, kuungaá múk Yakobo nee xwaylár múk Israeli sleémeero.

⁵ AAKOÓ MUNGÚ i kaahi, «Xáy, gár tlaakw ar baabi'iihúng na ariyé' dir'eene a milá, tam tari puruúts dir'eene, tari eeharín alaá muruú tawór wa alé, nee inooín niri tawo tleehhitiyé'.

⁶ Inooín taa yaahasi'iiká, ‹AAKOÓ MUNGÚ kudá' atén taa baraá yaamaá Misrír wa duux i amá? Kudá' atén taa geeraharahaar baraá darmuuwo nee yaamaá xaanxaay nee boh'e, baraá yaamaá kaahaar nee awa ma/ami, yaamaá muu ira waaraahhiiká nee awa ta hootiiká.›

⁷ Aníng kuungá' nuri huúw baraá yaamaá hhooa, as mamaá yaamuudá' kiwa /aga' nee tawa hota' ar diihhooa. Ala tawa hardaté' yaamuudá' ina hhitiindé', nee aalir'eé' kari slasla/aresé'.

⁸ Kaahamuusér Mungú i katká, ‹AAKOÓ MUNGÚ i amoomá?› Kudá' dabér xuá' aníng i xuiiaaká, geeraharuuse aníng iga áhh, aaruuse i aaririín ar umuú Ba'ali, nee munguaá hatlá' ngiwa haratlintaati'iya' awa gaa wasl.»

Mungú mukós gu sakwasleemuut

⁹ Gawaá adoorihe AAKOÓ MUNGÚ i kaahi, «Aníng kuungá' nun lu'ús, nee tam na/aá nangwhúng in lu'ús.

¹⁰ Xáy, gimsé' tlawi waarahhaak ay Kipro ka aandá', laqaá muu ya/aawaak amór Kedari siitsawe ka ay, barnaxes gár adór tí aa tleehharút.

¹¹ Xáy, xooro tam ar wák iqo deéro ar munguiiwós gaa warqes, tam munguaá kilaeekahe. Ala muk'eé' aníng iga geexáy, anuúduú Munguú kilá', munguaá' hatlá' ngiri eehariyé'.

¹² Aá doóri, daanduú tihe waa/oo/é', nee ta amooqwaqwadiindá', anuú AAKOÓ MUNGÚ tí ngina oó'.

¹³ Muk'eé' tlakweemaá tsár gaa tleéhh. Aníduú kutltá ma'aá slafiingw iga geexayé', hhaleeri'ín ngiri kilooín fooliyé', kudá' ma'aay iwa /oomaa/ona'.

Gár tinda huúw nee haratlintao waslér múk Israeli

¹⁴ Xáy Israeli aqo lawaalmoówo? Kwa baraá lawali'iimár i laqwaáli? Ahaá waáy, inós daxta musku slakaat adór makiito'ór wa aleeró?

¹⁵ Inós kuna i /oroótl nee direeri, inooín naa /orootliyé' ar afór uren. Yaamuuwós nga deeli tleehhiyé', nee gixsaduuwós nga sluhhay tleehhiyé', múk baraadá' wa hoót i kaahh.

¹⁶ Slám tam adoorihe múk Memfisi nee Tahpanesi slamángw sagós kwaa hayóh.

¹⁷ Kuungá' múk Israeli tí ana kiloohúng leelehhité'. Aníng ina geexeeré', anuú AAKOÓ MUNGÚ, Munguúhúng kudá' naa geerahaar baraá loohiro.

¹⁸ Xáy hám daxta, gár ta sleera' a milá tawa /eté' baraá yaamaá Misri as ma'aá yaaér Nili kiwa wata', laqaá tawa Ashurúr keeré', gár ta sleera' a milá ma'aá yaaér Eufrate kiwa wata'.

¹⁹ Tlakweemahúng awa kilá' kuungá' nu muxiyá', nee kuungá' lo'o nu eér as aníng iwa geexeeré'. Gimsé' xuaak, ka ló'wa tlaakw nee a gár slahh'eemiis, anuú AAKOÓ MUNGÚ, Munguúhúng, bira geexeeré', nee ilaiwa/amer'eé' bara hingesé' baraá muunerhunge. Anuú Aakoó MUNGÚ Aleesleemusmo tí ngina oó'.

Múk Israeli Mungú gwaa sií' haratlintaooro

²⁰ Iimír aáng kuúng taqwantók aga geeqeér nee piíngu kuri kwáhh amór saaw, tari ó', «Aníng kuúng u sagadiyuusaaká.» Gawaá tlom'aá tlede nee umuú gamuú xa'anoó loo/o naa/e munguaá hatlá' ina ii xupaapú' adór tsaatuso'o.

²¹ Aníng kuúng una dahaás adór dahaasíngw sabiíbu oo taa tsawaár, dahaasíngw hhohhó' oo sabiíbu. Ahaá daxta baré aga hhiturút, aga warqeér aga sabiíbuú sla/a tleehhít?

²² Tam tu hamaátl ar na/dí nee saabuúnoó tsumtá tu/uuma, mulkoó tlakweemaawók in meet dír geeraaeé'. Anuú AAKOÓ MUNGÚ tí ngina oó'.

²³ Xáy, adór hám tar o', «Aníng ti slasla/areeká, munguaá Ba'ali iga eehariiká.» Qaytsiít, tlakweemadá' taa tléhh baraá xatstaqá' wa aleeró, ga/aaweek adoodá' taa amorqá' wa tléhh. Kuúng a adór damár ar angamía buka ar /akuutár slaa', tidá' ti'iim amooqá' nee tiqae,

²⁴ adór daqoó aa nariis oo baraá darma, kudá' fur'ár tsaa'amiín as iwa /akuutár slai. Heé ilatleerirós ila/aro ga aleesláw? Oo gu slaá' bir deer gu leelehhitiiká, asma iqo tawo deer.

²⁵ Múk Israeli, kuungá' ya/ataahúng hi'iitanoro mindiwa tawo faakiyé', laqaá hheehharók miwa tawo kát! Ala kuúng a kat, «Harahhifo i káhh tam ar niiná, asma munguaá múk hatlá' ina ló'wa slaá', aníng inooín in eehár.»

Muxta múk Israeli gu sahariín

²⁶ Adoodá' fisusmo burkwa óh ir murumaamiti, an adór múk Israeli tar muruuti. Inooín kilooín nee waawitaáine, nee geeraharuuser'ín, nee kaahamuuser'ín, nee aaruuser'ine.

²⁷ Kuká' an kudá' xa'anoó babaawá', «Kuúng a baabuúeé',» nee tlaa/anoó, babawá', «Kuúng atén tina laqwál.» Ala inooín intlerhhuuín ngwa amor'eé' xu'usiyé' nee gitsee/er'ín nga amor'eé' xu'usi'iiká. Ala qoomár slahh'amaayeero i kaahiya', «Tlawáng ti /is.»

²⁸ Ala munguiihúng kudá' taa tlehhé' as kuungá' i amoomá? A xáy gimsé', bundu aslayá' /iisaro nu alee/iisiyé' qoomár slahh'amuhunge. Kuúng Yúda, munguaá yaariir in koón adór gixsadaá ayaawók.

²⁹ Ahaá baré kuungá' aníng in i qununu/á'? Kuungá' aníng iga ahhé'. Anuú AAKOÓ MUNGÚ tí ngina oó'.

³⁰ Aníng mukók una muúx ala naa ya/ani'iiká, inooín dakuúsar'ín ngiri si'iyé', aaruuserhúng kana tsuú/ ar lawluuhúng adór dirángw slahhaá' kawriro.

³¹ Xaysé', múk Israéli, te'eé' tí ni kah iiárií qaasaak, aníng a AAKOÓ MUNGÚ. Xáy aníng aga darma tleehhíti dír Israeliwo, laqaá aga yaamaá giiwá' tleehhíti? Ahaá waáy, muk'eé' masta kaahi, «Atén a múk amohhoó', ni amoorógií daqawanaaká?»

³² Xáy, dasír /amatliito'o parootirós gaqo gunqaarésa, laqaá dasír ta duxuuti tlabaawós giqo gunqaarésa? Ala muk'eé' aníng iga gunqaareés har afiqoomár deelór yaariir.

³³ Kuúng tu ló'wa ilakaahaár mulqe leelehhtuuwo. Gawaá adoorihe tam /ameenár tlakw aga intsaahhatís loohirók tihe.

³⁴ Baraá tlabaawoge tseerér múk daba' hhohhó' aga ár, inooín tam do'ók ngwa fee/i'iikahe.

³⁵ Kuúng a kat, Aníng gár tlaakw naa tleéhh i káhh, looeemawo buhhtaawós i kumiitiaaká amor'eene. Ala aníng kuúng u sakwasleemuút asma a kat, Tlakweema iga tleehhiiká.

³⁶ Ahaá waáy, gár tisa adoorír inslaahhés, tleehhmi'iiwók kis adoosír warqeemis? Tu mureekees nee múk Misri adoodá' tura mureekeés nee múk Ashuru.

³⁷ Nee slám ni amoodá' wa kí/ daba' kiwa gawaá ságw i qás as mure. Anuú AAKOÓ MUNGÚ kudá' kuúng ta haraxu' aníng iga sií', slám alee/isay'ín gár uwa bui i káhh, ala kuúng alee/iisaro u aleeslayká.