YEREMIA 19 - Biblía Axweesantá Hhohho' ar Mungú 2004

Sirwír aa gwa'

¹ AAKOÓ MUNGÚ aníng ina báy, «Tláw, sirwír hhekw tlaxweek dír heé tleeusmowo, daqaní bariise báhh'alé nee kaahamuusér uren ar Mungú ka léhh.

² Ti alkoonde' ay baraá xatstá garmoó Hinomu, nee ta waarahhá' ar dír afkú ta bay Qambeesama'. Bar aga didií hardát, axweesante'eé' tidá' ni oó' ka dir'íní ó'.

³ Ki beer, kuungaá waawituú Yuda nee yaamuloouusér Yerusalemu, iia qaasaak! AAKOÓ MUNGÚ Aleesleemusmo, Munguú múk Israeli, i kaahi, ‹Ar ló' amotlakwér tlakw ngi baraá yaamuukií huúw, umuú heé kaangwí gwaa axaasi i ló'wa da'ayuut.

⁴ Asma mukwí aníng iga geexáy, nee yaamuuká' nga meeta gaasiyé' ar da/aa/ángw mooyaangw dír munguaá hatlá', munguiidá' inooín nee baabi'ii'ín, laqaá waawitaáín ta baloó xuiiká. Nee sleeme yaamuuká' nga hatsiisiyé' tseerdaá múk dakuús wasle.

⁵ Kitángw ilahhooa oo mungú ta bay Ba'ali nguri tleehhiyé' as na/ii ngiwa da/aa/ana' adór ilahhooár da/a. Aníng adoorí aga hara'ayimiiká, laqaá iga kaangwí bawiiká, laqaá tam adoorí aga aldakwiiká.

⁶ Gawaá adoorihe, xuaak adór deelo nir hardát ar yaamuuká' kiwa malé bayká Tofeti, laqaá xatstá garmoó Hinomu, inós kan bay xatstá tsu/uta. Anuú AAKOÓ MUNGÚ tí ngina oó'.

⁷ Diirihe aníng múk Yuda nee oo Yerusalemu muruuín kudá' ta qoomeemesi un hhitiím. Aníng wakuuser'ín a baalírí haniís, nee inooín kiri tsuu/ baraá slaqwaraaro. Aníng tu'uuín in máw as tawa muruú /aymár tsir/o nee makaá sla/a.

⁸ Aníng gixsarí a dír de'e tlaaq tleéhh, nee gár ta waaqaseesen. Umuú heé waaraahha adoodá' birnga ár, iri da'ayuut nee gari waaqasén as slahh'amuudá' gaa slay.

⁹ Bál mukwí burkwa /amaatseék nee wakuuser'ín nee mukdá' gi baramaanuús nee kudá' gi tsu/utár wa slaá', mukwí tsaxwaá yaariir gi sláy, tam fu'unaá na/ii'ín awa daaqaay nee awa dasuwo kiri /aay, nee umuúqo heewo fu'unaá inslaawmoowós giri /aay.›

¹⁰ «Daqaní kuúng sirwidá' ka gás dír geraá mukdá' nee kuúng ti alkoomá'

¹¹ nee ki beer, anuú AAKOÓ MUNGÚ Aleesleemusmo a káh, ‹Adoorí an adór aníng mukwí ngur giqaw, nee gixsarí ngir hhaamiis, adór heé xooslmoó tleei ngwa gaas kudá' inki/isaro ta baloó aslayká. Tu'u kiri foliit baraá Tofeti, tam dír muu kway foliiti iri qwaát.

¹² Adoorí an adoodá' ni tleehhár wa slaa' dír yaamuuká' nee dír yaamuloouuser'ín, gixsarí ngiri adór Tofeti tleéhh.

¹³ Maraá Yerusalemu nee maraá waawituú Yuda, nee umuú do'o oo daárirós kawa mooyángw wa daá/ dír tsatse/ú doori, nee ilahhooadár tsipipi'iisa ar difaái kawa hanmiisi dír munguaá hatlá', marayká' sleémeero ki meetagaas adór didár Tofeti.› »

¹⁴ Naagáy Yeremia iri Tofetír wa tláy amoodá' AAKOÓ MUNGÚ ngway ya/aáw iri aariirín. Inós iri tláy iri sihhiít baraá Doó AAKOÓ MUNGÚ, muu sleémeero guri báy,

¹⁵ AAKOÓ MUNGÚ Aleesleemusmo, Munguú múk Israeli, i kaahi, «Qaytsiít aníng muruudá' tlákw naa axweemamiís daanduú gixsarihe nee ayeemaá inslaawaywós sleémeerowo ngu huúw, asma inooín sager'ín ngina gawdeesiyé' nee axweesante'eé' ngi axamisiiaaká.»