YEREMIA 18 - Biblía Axweesantá Hhohho' ar Mungú 2004

Yeremia i dír doó tleeusmo

¹ Axweesantá AAKOÓ MUNGÚ Yeremia gana axaás i kat,

² «Yeremía, tláw ay dír doó tleeusmo, nee didaádae aníng axweesantá ni oo' i deer.»

³ Naagáy niri /eét ay amór doó tleeusmo, niwa hardáh tleeusmo i gawaá /angeegeamo.

⁴ Qoomár xooslmoodá' i tlehhiiti bira hhitiruút gawaá dabaawós i alé, inós tleeidá' gan /abees, gari xooslmoó hatlá' ar tleehh ar adoodá' inós ngur slai.

⁵ Aluuwo axweesantá AAKOÓ MUNGÚ án ngiri axaás i kat,

⁶ «Kuungá' múk Israeli, xáy, anuú AAKOÓ MUNGÚ adoodá' tleeusmoowí aa tleéhh, dirhúng i tleehhamooro a aleeslawaakáhe? Gimsé' xuaak, adoodá' hhape i diri' gawaá dabaá tleeusmowo an adór kuungaá múk Israeli tay dir'a' gawaá dabaaeene.

⁷ Barnaxes qoomarkaaro aga oó', xooro laqaá waawuti'iima a hingeés, nee an giqáw ngiri hhaamiís,

⁸ ala xooroodá' naa daanda oó', bar muruú tlákw gwaa meér tlehhtuwo, aníng tidá' naa ístí tsaát daanduuine aqo an máw tleehharo.

⁹ Tam qooma gaalahe, sleeme barnaxes aga oó', xooroorí a tleéhh, laqaá niwa kah waawuti'iima a qaás,

¹⁰ ala barnaxes xooroodá' tlakweema gaa tléhh dír geeraaeene nee afor'eé' iialooeesaro ngiri si'iyé', aníng an warqáw hhooeemaadá' nira tsabiím tleehhamoro i sangw tleehhaaká.»

¹¹ Hám daxta múk Yuda nee múk Yerusalemu ku beer, «AAKOÓ MUNGÚ i kaahi, ‹Aníng a muruú tlákw qoomeemeés nee taa amohhe'eés daanduuhunge. Ki/aaré', umuú heewo loohirós tidá' tlaakw ngi may, nee tlehhmi'iihúng gan'asaak.›

¹² Ala inooín i kaahiya', ‹Tisíng a tawo. Adoorén tidá' ta sla'aan an eeharaán, nee umuú heewo in hoot ar adór aa ár baraá muunaáwós kudá' tlaakwe.› »

Muu Mungú gwaa sií'

¹³ AAKOÓ MUNGÚ i kaahi, «Gawaá adoorihe, axáy xoordu sleémeero yaahasaak, kángw adór kwí heé gwa axaas iqo deéro? Múk Israeli adór ló'wa slasla/aar gaa tleéhh.

¹⁴ Xáy, tlaa/aá Lebanoni sager'ín ka /awkekáhe adór tlaa/aá tluwaay? Xáy, duxér ma'aá tloomarós iqo kahaakáta?

¹⁵ Ala muk'eé' iga gunqareés, inooín mooyángw tsuú' ngwa munguaá hatlá' i da/aa/ané'. Inooín naa dukuutsiyé' baraá lohuuine, baraá lohdaá aange. Baraá lohdaá irakw kinar uhín kitángw lohdaá hhaytantá urene.

¹⁶ Yaamuuín nga yaamaá dae tlaaqá' tleehhiyé', ki niqín daqisleém. Umuúqo heewo oo aa baraadár waaraahhi in waa/oo/, saga guri muumukuus.

¹⁷ Aníng muk'eé' un diyaá/ dír geeraá wakuuser'ine, adór teerír tar tlatlay nee fur'ár da/aá daahh. Aníng baalaadár slahh'amuuine in daanduú xu'ús, kitángw guruueé' nguwa amor'ín xu'us.»

Wakuusér aarusmo

¹⁸ Naagáy muu iri oó', «Qwalaasé', Yeremia u garkaárí tleehhaán, asma atén kaahamuusér Mungú ar ti intsaahhatimis a dakuusanaaká, nee múk sageloén oo ti gurbuú', nee aaruusér axweesantá Mungú alki/iita. Qwalaasé', u sakwasleemutaán ar axweesantós ar kilá', axweesantós tidá' i kaahi mawa iiárií qaasaán.»

¹⁹ Ala aníng niri firiím, niri oó', «AAKOÓ MUNGÚ te'eé' tí ni kah iiárií qaaseek. Nee gár wakuuser'eé' daanduueene i kat iiárií qaaseek.

²⁰ Xáy, hhooeema kin búi ar tlakweema? Ala iga bohóngwí fooliyé'. Inslaweek adoodá' aníng kuúng uwa firiím, as kiwa gár hhoó' i tlehh, mikiwa sláy nee buhhtaawók.

²¹ Gawaá adoorihe, hám daxta na/ii'ín maweek ki tsu/i nee qwari, inooín ki tsu/i ar paánga baraá slaqwaraaro, nee /ameenar'ín i kampeerut, nee i kwaali'iimit. Maweek hhawaate ki tsu/i nee tiqtír pu/i, nee masoombar'ín ka iso tlaaqi ar paánga baraá slaqwaraaro.

²² Masók /aa/e ki axaas baraá maray'ine, qoomár daqtá malguuse bara dir'íní gaanslár húp. Asma inooín bohoongw ngwa fooliyé' as aníng iwa oohiya'. Tsaaxwel ngwa qaasiyé' as ya'aaeé' kiwa ohin.

²³ Ala AAKOÓ MUNGÚ, kuúng adoodá' ta qoomeemesi as iwa gaasár wa slaya' a xú'. Tlakweemaaín mi gurtlawaar, laqaá tlakweemaaín mi hingeesaar dír geeraawoge, inooín ki arba/i dír geeraawoge. Qoomár bara búhh inooín haraganaaeek.»