YEREMIA 17 - Biblía Axweesantá Hhohho' ar Mungú 2004

Tlakweema nee muxtár Yuda

¹ Tlakweemaá múk Yuda kaa gooín ar kalaámuú muqsli, kaa gooín ar parhhamtá miisli ar afa ngwáts, baraá muner'íní ale, nee gawaá xareemaá kiteeri'ín kudá' ta ilahhooár wa hanmaamisi.

² Qoomár muk'ín bar kiteeri'ín kudaá ilahhooa gi inslasláy, nee munguúín kuduú /ameeni ta bay Ashera, kudá' taa qaás dír umuúqo xa'anoó naa/a, nee gawaá gongoama',

³ nee gawaá sagér tlom'iiwo, nee xatsoowo. Aníng daqaari'iimarhúng, nee umuúqo gár ta koonda'a an haasaáng wa haniís dír wakuuserhúng, as tawa bu'uutuú tlakweemaahúng kudá' taa tlehhaahhité' baraá yaamu sleémeero.

⁴ Yaamuuká' aníng naa kuungá' i haniís aqo in geexeerá', nee aníng kuungá' nun gawaá dabaá wakuuserhúng i haniís, as kiwa sagadiyuusa' baraá yaamaá kuungá' ta baloó xua'aaká, asma aníng an daa/atúw buhhtaawo adór asltá baloó gwa'aaká.

Axweesanoó dimbadimbé

⁵ AAKOÓ MUNGÚ i kaahi, «Heé hee gu harahhiíf i tsarere'eeti, kudá' handá' /uuruú hee gwaa harahhiif, kudá' baraá muunaáwose AAKOÓ MUNGÚ gwaa sii'.

⁶ Heewí a adór xwansliito'ór baraá xaanxaay, gár hhoo' ga baloó ariiká. Inós in hotaá áy baraá darmuú aa qor'oot, baraá yaamaá hharkí awa muu i hotaatinká.

⁷ Heé AAKOÓ MUNGÚ gwaa harahhiif kwaa tsuúq, kudá' AAKOÓ MUNGÚ gwaa harahhifoorós tleehh.

⁸ Heewí an adór xa'anoó taa haátl dír afaá kutltá ma'aay, kudá' dee/aruuwós gwaa siihh afaá yaae. Inós i kahiiká qoomár siire/iro, loo/oorós aqo in na/aa/át, sleeme tam kurkú slahheemasto i orooiiká, nee mamu gi mayká laqwaliingo.

⁹ Muunuú hee a ló'wa al/aymusmo ta umuú gaaro, hungu/uusaro ku aleeslayká. Heé tsaahharo gu aleesláw a heemá?

¹⁰ Anuú AAKOÓ MUNGÚ inslawoó muu un tsee/ariím, nee munér muu an iiaraa'ár, as kahhó' umuúqo heewo nguwa buu' ar adoodá' ir hotaatin, nee adoodá' tlehhmi'iiwós i dirii'iya'.»

¹¹ Heé daqaari'iima gaa slay ar loohír gana'aaká, a adór xooymoó qanhhár aa qanhhusiiká gaa umtór ay. Daqaari'iimarí gun afa bá/ qoomár tla/a tsara birnga áy, alhhe'eesaywo iri daktu'uut.

¹² Kitángw xirif iimír iimu/uungo i gáwtí dirii', an dír Doó Mungú i dirii'i.

¹³ AAKOÓ MUNGÚ kuúng a harahhifór múk Israeli, kudá' kuúng ugwa si'iye' sleémeero ki mureekees. Kudá' kuúng ugwa geexaye' a adór umér taa gooín baraá hhape. Asma kuúnguú AAKOÓ MUNGÚ una si'iyé', kuduú kutltá ma'aá slafiingw.

Firór Yeremia as alee/isaay

¹⁴ AAKOÓ MUNGÚ án hungu/uusáng, daqaní aníng a hunguú/. Ba/amisáng, daqaní aníng a ba/ám, asma kuúng an xirfuueé'.

¹⁵ Ga/aaweek, inooín aníng in babaya', «Axweesantadár AAKOÓ MUNGÚ aa oó' i amá? Gám ala i tleehharut.»

¹⁶ Aníng gadiyeédá' tawa de'eemusmo aga si'iiká, tam deeloodár slahh'amaaye aga ilatleerusiiká niwa hardat. Kuúng a xú' tidá' aníng naa oó' afkueene. Tidá' naa axweés kuúng a xú'.

¹⁷ Aníng mi dae tlaaqaar, asma kuúng an dír guway'eé' qoomár slahh'amaayeero.

¹⁸ Kudá' aníng i slahh'eemisá' ki mureekeesi, ala aníng mi mawaar tiwa mureekeesi. Kuká' ki alsi'imúy, ala aníng mi mawaar tiwa alsi'imuy. Amotlakwe ti hup. Hhaamiseek ni sagaawa tsár wa qororo'ootiye'.

Harmagaahhár deelór Sabaáto

¹⁹ AAKOÓ MUNGÚ ina báy, «Tláw, sihhiít dír afkuduú waawituú Yuda ir daraahi nee ir ti'imiiti baraá gixsaro, nee dír afe sleémeero ar gixsár Yerusalemu,

²⁰ ta o', ‹Kuungaá waawituú Yuda axweesantá AAKOÓ MUNGÚ iiárií qaasaak, nee kuungá' múk Yuda nee yaamuloouusér Yerusalemu sleémeero, kudá' daaraahá' ar afeerí.›

²¹ Anuú AAKOÓ MUNGÚ a kah, ‹Bar amohhooár slafingwhúng a sla'á', ti haramagahhe', hee huwa mingiwa gagaár deelór Sabaátoro, nee mingiwa dahaás ar afér gixsár Yerusalemu.

²² Nee deelór Sabaátoro huwa mar ti'iitaara' nee gadiyeé tam ar niiná ma kwatiitara'. Deelór Sabaáto boo/eesaak adór deelór hhoohhoo', adoodá' ngira qaroó oó' dír baabi'iihúng.

²³ Ala baabi'iihúng aníng iga iiárií qaasi'iiká nee iga hhasliti'iiká, ala inooín sager'ín ngina gawdeesiyé', tidá' naa oó' ngina si'iyé', nee intsaahhasar'eé' ilaooharo gina si'iyé'.› »

²⁴ AAKOÓ MUNGÚ i kaahi, «Ala barnaxes aníng iga iiárií qasé', nee huwa ngi dahmisa'aaká baraá gixsa baalaarír Sabaátoro, ala deelór Sabaáto kari hhohhoesé', nee gadiyeedu kiri meeré' baalaadae,

²⁵ daqaní waawitaádá' waawuti'iima gaa oh alaá waawutmo Daudiwo, nee geeraharuusér hatlae, dinkwa nee múk Yuda, nee yaamuloouusér Yerusalemu, i dahiyá' ar afkú gixsarí, qoomár bar farsuuín ngwa i tsa/ané', nee gaardaá faras. Gixsarí kari hotaatín ay alhhe'eesay wasle.

²⁶ Muu ni hardah amór gixsadaá Yuda wa alé, nee ayeemaá Yerusalemu ngaa harweeriye', múk yaamaá Benyaminír daáhh, nee oo yaamaá Shefela, nee oo yaamaá tlom'i gi daáhh, nee oo Negebu as ilahhooár da/a ngiwa huwiya', nee ilahhooár muruú ta tsu/i, nee ilahhooár bu'uungw, nee mooyángw tsuú' dinkwa nee ilahhooár sluufaay. Muruuwí sleémeero kungun huuw baraá doó AAKOÓ MUNGÚ.

²⁷ Ala barnaxes kuungá' aníng iga iiárií qasi'iiká, nee deelór hhoohhoo' ar Sabaáto bar aga harmagahhi'iiká, nee huwa loohisooro aga meeri'iiká, nee kawa ar darta ar afér gixsár Yerusalemu bál deelór Sabaátoro, naagáy, aníng afér gixsár Yerusalemu a ásltí oohiís, nee maraá waawitá sleémeero kudá' baraá Yerusalemu giri /ák, nee heé asltadá' gaasaro ga aleesláw i kaahh.»