YEREMIA 16 - Biblía Axweesantá Hhohho' ar Mungú 2004

Sla'aarír Mungú daanduú Yeremiawo

¹ Axweesantá AAKOÓ MUNGÚ aníng ana axaás, i kat,

² «Kuúng a baloó duuxundaaká, nee na/aá daaqaay laqaá awa dasu i laqwalká baraá yaamuukae.

³ AAKOÓ MUNGÚ daanduú na/aá daaqaay nee awa dasuuwo awa ta laqwaali yaamuká' i alé, nee xwayliitér'ine i kaahi,

⁴ ‹Mukwí i qaatl ar tiqtír pu/i nee heé tsuunqumiís i kaahh, laqaá heé gi foliít i kaahh. Tu'uuín nin tlufaafuiyá' adór tsuunkáy daanduú yaamuwo. Mukwí ku hhaamiis ar paánga nee qwari, nee tu'uuín a muruú /aymár tsir/o nee makaá sla/a.› »

⁵ Asma AAKOÓ MUNGÚ i kaahi, «Ma dahaar baraá doó hee iwa gwaá', laqaá ma tsuunqumisaar, laqaá mi alee/aa/amimaar. Aníng waydueé', nee sla'aarír warqawaaká, nee gurtleemueé' iga hingeés dir'ine.

⁶ Sleémeero múk urén nee oo ninakwe, i qatliyá' baraá yaamuukae, ki foliitiiká, laqaá heé gi satsuunqumiís i kaahh, laqaá oo ti yaamúr slaáhh, tam oo sagós gu deéqw as gwa'ara i kaahh.

⁷ Heé mukdá' tsuunqumiís as qatlór xwayliitér'ín gu muruú /ayma nee ma'aá wahaángwí hanmiís i kaahh as ngiwa gurkwa/asi.

⁸ Ma baloó dahaar baraá doó muruú /aymár yaariír kuwa qaás. Ma iwitaar dinkwa nee inooín as tawa /ayinda', laqaá tawa wahaanda'.»

⁹ Asma AAKOÓ MUNGÚ Aleesleemusmo, Munguú Israeli, i kaahi, «Ga/aawaak aníng afór qwala/ nee ar bara/ a qwaareés baraá yaamuukae, tam qwal/uú ni/imár /ayla. Tí kuungaákaá slafá' a aandá' ilaahunge.

¹⁰ Qoomár bár kuúng /aymi'iiká' sleémeero iga dír múkwí ó', inooín kuúng turi yaahaas tawa kaahi, ‹Ahaá waáy, gár AAKOÓ MUNGÚ atén tis i xaraasli? Dakumisuurén a milá? Ahaá tlakweemaá taa AAKOÓ MUNGÚ, Munguúrén i tleehhaán a milá?› »

¹¹ Daqaní kuúng ki beer, AAKOÓ MUNGÚ i kaahi, «Baabi'iihúng aníng ina geexayé', munguaá hatlá' ngiri eehariyé' ngiwa sagadiyuusiyá', nee ngiwa sluufmiisiya'. Aníng ina geexayé' tam daber'eé' ngaa oohi'iiká.

¹² Kuungá' tlakweema ina tlehhé' ta baabi'ihunge, asma ga/aawaak, umuú heewo dirhunge ku saga gawít, nee ku inslaway tlákw, tam aníng i iiárií qamiinda'aaká.

¹³ Gawaá adoorihe, aníng kuungá' baraá yaamuukae nun kwaáhh ay yaamaá kuungá' nee baabi'ihúng ta baloó xua'aaká. Nee amoodaádae munguaá hatlá' kiri sagadiyusá', xweera nee tlaatla/aango, aníng kuungá' nu baloó wa hhooawaaká.»

Watliingw

¹⁴ AAKOÓ MUNGÚ i kaahi, «Gawaá adoorihe, ga/aawaak, deelo ni hardát ar muu iwa ooiiká, ‹Adoodá' AAKOÓ MUNGÚ ir hotaatin kudá' múk Israeli ngwa duux baraá yaamaá Misriro.›

¹⁵ Ala inooín tan ooi, ‹Adoodá' AAKOÓ MUNGÚ ir hotaatina, kudá' múk Israeli ngwa baraá yaamaá /iíkwá watlis, nee baraá yaamu sleémeero kudá' ngi diyaá/.› Asma aníng ngin watlís baraá yaamuuín awa kilá', kudá' naa baabi'ii'ínií haniís. »

Slahhtá hi'iit

¹⁶ AAKOÓ MUNGÚ i kaahi, «Ga/aaweek, aníng múk yaariír oo siyoó ohiím ngu tleés as mukwí nguwa ohin. Aluuwo slakaatuusér yaariir ngiri tleés, ar mukwí gu slakaat gawaá umuú tloomaro, nee gawaá umuú gongoamaawo, nee baraá mar'ór tla/uuwo.

¹⁷ Asma aníng tlehhmi'ii'ín sleémeero i ga/áw. Gár aninge aa nahhat i káhh. Tlehhmi'ii'ín sleémeero dír geeraaeene ki geehhoo'.

¹⁸ Aníng li/oó dakumisuuín nee oo tlakweemaine un buú' sagaáwa tsár, asma yaamu nga meeta gaasiyé' ar tuaá munguii'ín kudá' naa aáhh, yaamuueé' ngaa dalaa/iyé' muruuín kudá' ni waka.»

Harahhifór Yeremia

¹⁹ Aá AAKOÓ MUNGÚ, kuúng an /uuruueé', nee koo/ir'eé' ar gawit, kuúng an dír guway'eé' qoomár slahh'amuwo! Xoordaá badu sleémeero awa yaamu nin amoorók i hardihiyá' tawa kaahi, «Baabi'iirén gár taa aál i káhh, aqo har munguaá lama, muruú tawo oo slaasláwár koomaaká.

²⁰ Xáy, hee tiwa munguúwós i tleehh gaqo aleesláya? Aasla'áy, ala barnaxes gwa tleéhh, a munguú loeeká.»

²¹ AAKOÓ MUNGÚ i kaahi, «Gawaá adoorihe ga/aaweek, aníng in intsaahhatís, qoomaarihe aníng inooín in /uuruueé' xu'utís, nee aleesleemueene, inooín ngiri tsaahhiyá' adór umuueé' tar AAKOÓ MUNGÚ.»