YEREMIA 15 - Biblía Axweesantá Hhohho' ar Mungú 2004

Hhaamisár múk Yuda

¹ Naagáy AAKOÓ MUNGÚ aníng iri báy, «Tam geera Mose nee Samueli i sihhitiia dír geeraaeé' as iwa firina', tam adoorihe aníng mukwí u baloó gurtlawaaká. Dir'eene amór saaw tay hiinges, diirihe ni quutliye'.

² Burta báy, ‹Amór ti tlawaan a amá?› Ki beer, AAKOÓ MUNGÚ i kaahi, ‹Kudá' ta tsu/i ar tiqtír pu/i, ki tsuu/ ar tiqtír pu/i. Kudá' qatlá' ar kiwa tsu/i baraá slaqwara, ki tsuu/ baraá slaqwara, kudá' ta tsu/i ar qwari, ki hhaamiis ar qwari, kudá' tar tlay baraá loohaay, aqo kin ar tláy.›

³ Anuú AAKOÓ MUNGÚ aga tsabiím mukwí nguwa hhaamiis ar muruuwí tsiyáhh: Inooín kin tsuu/ baraá slaqwara, bahh'alé seeaawe gin karslamís, kookaariya' kin /aay nee tsir/o, nee makaá sla/a, sleémeero kiri hhaamiis.

⁴ Aníng inooín in gár dae tlaaq tleéhh dír waawuti'iima sleémeero ar daanduú yaamuwo, asma tlakweemaadá' Manase garmoó Hesekia aa tleéhh baraá Yerusalemuro, qoomár tawa waawutmoó Yuda.

⁵ Aá múk Yerusalemu, heé kuungá' nu gurtláw a heemá? Nee heé tsuunqumiís daanduuhunge a heemá? Nee heé kangwhúng yaahaás a heemá?»

⁶ Anuú AAKOÓ MUNGÚ a kah, «Kuungá' aníng iga sié', aníng iga geexeeré', tari alií ki/é'. Aníng kuungá' nay hhaamiís, asma aga slahhaá' kuungá' gurtlatlaango.

⁷ Aníng inooín ina haritleés ar iimpér haritleemis umuúqo afkú do'o baraá gixsaro, aníng muk'eé' una hhaamiís, na/ii'ín ngiri tsuú/, ala inooín tlehhmi'ii'ín kudá' tlakw nga may'iiká.

⁸ /Ameenár kwaeeli ka yaariir ta hhasángw afaá tlawto. Aníng masoomba ana tsuú/ baraá /uuruuine, nee xwaylitér'ín ngiri slahh'amaayérí huúw. Inooín ina gaanslár dae tsaát, tari slahhaá'.

⁹ Aayoodá' na/aá faanqw gi koom i gwagwa'aán, i slaraará/, looaarós aa tla/ángw doorí dát. Inós kaa mureekeés, kari alsi'imúy. Mukdá' aa meet aníng ugwa haniís kuwa geeraá wakuuser'ín wa tsu/i. Anuú AAKOÓ MUNGÚ tí ngina oó'.»

Yeremia i wa/aa/uus dír Mungú

¹⁰ Tsaxwaaeé', gár aayor'eé' isa laqwál baraakaá yaamií ale, asma aníng a heé ta niqin, nee oo ta tlampa'aamisi baraakaá yaamu sleémeerowo. Aníng hee ugwa kiriikiiká, laqaá aníng heé iga kiriik i kaahh, hamí ala umuú heewo in lu'umis.

¹¹ AAKOÓ MUNGÚ, axáy lo'or'ín án i /ak, barnaxes aníng kuúng ugwa sagadiyuusiiká ar muunuú /awaák, nee barnaxes aníng kuúng ugwa tsuwa firiimiiká as wakuuser'eé', qoomár kiwa baramaanuusi nee iwa baraá slahh'amií dirii'iya'.

¹² Xáy, heé muqsli geeqawto ga aleesláw i deéro, muqslidá' sirdaa/aat ar /iikú daahh?

¹³ Aníng daqaari'iimarhúng nee qaasirhunge an haasaáng wa haniís dír wakuuserhúng ar aldaafi wasl, as tlakweemaahúng kudá' taa tlehhaahhité' baraá yaamuhunge.

¹⁴ Aníng kuungá' nu lawaalér wakuuserhúng tleéhh baraá yaamaá kuungá' ta xua'aaká, asma buhhtaeé' naa daa/atuyé' adór gil'ór asla, tidá' baloó gwa'aaká daqisleém.

¹⁵ Aníng ana oó', «Ala AAKOÓ MUNGÚ, kuúng a xú', aníng inslawáng nee qwaláng /iisáng, wakuuser'eé' li/áy bueek daanduueé' wa ale. Kuúng qitla u xú', án mi qwaareesaar. Inslaweek adór aníng tir /oosliislín as kuúng.

¹⁶ Aníng axweesantók ana sláw nee ngiri /aáy, axweesantók aníng iri qwal/atís, nee muunaáeé' guri sla'atís, asma aníng tawa kók, aá AAKOÓ MUNGÚ Aleesleemusmo.

¹⁷ Aga iwiitiiká dír dinku'uumár múk aa yaanda hhe'ees laqaá aga alqwalala/aniiká, aníng ana kilooeé' iwiít as /uuruuwók iwa gawaaeé'. Asma iga hatsís buhhtaawoge.

¹⁸ Ahaá waáy, gár slahh'amueé' is kumaamiti, inkaahhay'eé' mis hungaagu/ká, baré maasáy ga hungu/umisiiká? Ahaá, mis diqay tláq adór duxuú ma'aywós kahaakaahá'?»

¹⁹ Gawaá adoorihe, AAKOÓ MUNGÚ i kaahi, «Barnaxés iga i kí/, aníng kuúng un adoodár aángií ki/ís, nee kuúng uri malé sagadiyusmooeé' tleéhh. Barnaxes axweesanoó lama ugwa meér, nee oo ganaá' bura axwés, daqaní kuúng an aarusmooeé' tleehhít. Muu nin amoorók i burumburiit, ala kuúng amor'ín a keeraaká.

²⁰ Dír mukwihe, aníng kuúng un koo/ír gawit tleéhh ar taa tleéhh ar muqslír sirdaa/aat. Inooín kuúng un mak i slaqwarárí ayá', ala u baaliaaká. Asma aníng nee kuúng a dinkwa as uwa /iis nee uwa ba/amis. Anuú AAKOÓ MUNGÚ tí ngina oó'.

²¹ Aníng kuúng un ba/amís baraá dabaá múk tlakwe nee un tuú/ dír múk xaraasla.»