YEREMIA 14 - Biblía Axweesantá Hhohho' ar Mungú 2004

Slahheemastá hhamhhám

¹ Axweesantá AAKOÓ MUNGÚ Yeremia gari axaás daanduú slahheemastá hhamhhám.

² Múk Yuda i tsuunqumiis, afér gixsaduuín aa sololo'ót, mukós aa yaamií huuhu'ún ta tsuunqumiis, nee múk Yerusalemu ta gáwtí tsee' /aa/eewo.

³ Múk urén ta sagadiyuuser'ín ya/abiit as tawa ma'aá hheeki, ala ma'aay kaa slayká. Inooín tana waátl ar dahhaaroó kaaharén, sage ngiri tuuntukuné' as mure nee amoqwaqwadiingw.

⁴ Doosluuse i gurhamút baraá muner'ine, sager'ín gari tuuntúk mureero, asma tluwaay iwa kahhi nee yaamu kiwa kaahaár.

⁵ Tam baraá sla/ato tlaaqati na/aywós oo aa laqwál gun sí'. Asma gitsór i /ak i káhh.

⁶ Daqwaayér aa narís i gawaá gongooamaá kaaharén wa sihhimiít, i adór intsawér wa sluuqún, asma hiinsla gwa dakús, ilaaine i xumisiaaká, asma gár i /ayiya' i káhh.

⁷ Muk'eé' iga i /aá/ tawa kaahi, «Tam tlakweemaarén i lamaabu'uná' daandeemorene, AAKOÓ MUNGÚ atén kuúng ti alee/is as kuúng kilók, dee/aanurén ku úr, atén kuúng ugwa tlakweemáy tleehhaán.

⁸ Kuúng kilók an harahhifór múk Israeli, kuúng an ba/amusmoorén qoomár slahh'amaayero, ahaá, kuúng baré a adór dahaaymo baraá yaamuurene, a adór heé waaraáhh oo aa qaat xweeraá wake.

⁹ Ahaá waáy, kuúng misti ilaqaamís tawa adór heé aa sagaqwaar, adór pihhusmoó hee alee/isaro gu aleeslawaaká. Ala tam adoorihe, kuúng, AAKOÓ MUNGÚ, a dinkwa nee atén, nee atén tina ateét ar umuuwók, atén a mukók. Miti mawaar.»

¹⁰ AAKOÓ MUNGÚ daanduú mukwihe i kaahi, «Ar ló' inooín leehaád nguna intsaahhiyé', ala inooín ta hintiqisiiká tlakweema tlehhtuuwo. Gawaá adoorihe anuú AAKOÓ MUNGÚ inooín i ilaohaaká. Tlakweemaín i gunqaresaaká, nee in sakwasleemuút as tlakweemaaín.»

¹¹ AAKOÓ MUNGÚ aníng ina báy, «Mukwí mu hhooeemá i aleefirimaar.

¹² Tam ta gwaawin, firor'ín a baloó iiárií qaasaaká, tam barnaxés iga ilahhooár dá/tí haniisiyé', nee tam ilahhooár balaango, aníng ilahhooar'ín a ya/aamaaká. Inooín aqo in hhaamiís ar paánga nee giyeé nee pu/i.»

¹³ Naagáy, aníng niri oó', «Aá Aakoó MUNGÚ, ga/aaweek, aaruuse i múk babeer, kuungá' slaqwara nu sleeraaká, laqaá qwari, asma kuúng al'axweesani aga ó' tawa kat, ‹Wayda i kumamiit baraá yaamuukae.› »

¹⁴ AAKOÓ MUNGÚ iri báy, «Aaruuseesíng i lamtá aaririín ar umuueé', ala aníng nga ya/aawiiká, aníng iga bawiiká adoosíng tleehhaak, laqaá aga axweesaniiká nee inooín. Iigu'utuudá' naa ariyé' i amor'eé' dahhiiká. Muruú naa aariné' a muruú tawo oo inslaway'ín.

¹⁵ Gawaá adoorihe, anuú AAKOÓ MUNGÚ kuúng un babaw, ‹Aaruuseedá' aníng naa ya/aawiiká, tidá' aa tawó axwes ar umuueé', ar kah, slaqwara nee giyeé ni baloó baraá yaamuukií hardihiaaká. Aníng inooín in hhaamiís ar slaqwara nee giyeé.

¹⁶ Tuaá kudaádá' taa i aariirín, kin kwakwaahh baraá lohudaá Yerusalemu, kudá' taa tsuú/ nee qwari nee slaqwara, slám heé gi foliít i kaahh tumu wák. Tí sleémeero inooín gin sleér, nee tlaaway'ín nee na/ii'ín awa dasu nee awa daaqaywo, asma aníng tlakweemaaín awa kilá' tini ku'uús.› »

¹⁷ AAKOÓ MUNGÚ aníng ina báy, as muu nguwa kángw baw daanduú gurhaamir'eene nee nay oó', «Masók hhirhheeraá ilaaeé' nin wa/aminá' tlaatla/aangw nee xweeraawo, masók an kumaamiít /aa/eewo, asma muk'eé' kwa ló'wa hariiáy, nee kwa ló'wa slahh'eés.

¹⁸ Aníng bara ti'iít baraá qamu, tuaá múk taa tsuú/ baraá slaqwaraaro in ár! Bara dáh baraá gixsa, tuaá múk aa qaatl as qwari in ár. Aaruuse nee kaahamuusér Munguhe gadiyér'ín ar baraakaá yaamu ngi tlehhiitiyá', slám gár i tlehhiitiya' ngi tsatsahhan'aaká.»

Muu i Munguú harhheehhe'eemiis

¹⁹ Aá AAKOÓ MUNGÚ, múk Yuda una tsuwa si'ima hhe'ési? Kuúng múk Siyoni una ló'wa áhhi? Ahaá, asma mista adoorír sláhh, tam hungu/uusaro ti aleeslayká. Atén wayda una harahhifaán, ala gár hhoo' ar taa slawaán i káhh. Harahhifo ana qaasaán as tawa hunguu/aan, kitaangose tina dae tsaát.

²⁰ Aá AAKOÓ MUNGÚ, tlakweemaarén nga ooaán, nee tlakweemaá baabi'iirén ngina ooaán, asma atén kuúng ugwa tlakweemií tleehhaán.

²¹ Atén miti aahhaar as daanduú kuúng kilók. Kitaangók kuduú xirif mu mureekeesaar, inslaweek alqadoodá' taa qás dirén i aleeró.

²² Xáy, munguaá lama awa xoordaá hatlá' tluwaay ngu huwiía? Laqaá tlaangú duuxaro ngu aleesláy'a? Xáy, aqo kuungeekáhe AAKOÓ MUNGÚ, Munguúrén? Atén kuúng un harahhifaán, asma kuúng tí sleémeero ana tléhh.