YEREMIA 12 - Biblía Axweesantá Hhohho' ar Mungú 2004

Yeremia i Mungú yaahamiis

¹ Aá AAKOÓ MUNGÚ, kuúng an ganá' aníng tam ui qununu/a. Aníng yaahasarka a koóm diroge. Ahaá múk tlákw baré gadiyeduuín i ya/aa/á'? Ahaá baré múk al/aymuuse aa diihhe'eés?

² Kuúng inooín ina hátl, dee/ár nguri sihhiyé', nina urarayé' mamu ngiri laqwaaliyá'. Kuúng afer'ine burtu kah kwaáo tu tseéw, ala baraá muner'ine tu saáw.

³ Ala aá AAKOÓ MUNGÚ, kuúng aníng i xú', nee in ga/eér, inslaway'eé' un amoorók i qwatsiín. Múk tlákw hhimbiritleek adór bee/ángw ta tsu/utár ay. Ki parátl as qoomár sakwasleemar'ín ar tsu/uta.

⁴ Ay xaylá yaamu i tsuunqumaamisiya', nee gitsór umuú diiro i /otsaatsit? Makaay nee tsir/o kina hhaamiís as tlakweemaá yaamuloouuse. Asma muu i kaahi, Mungú alhhe'eesoó slafingwrén gu ariiká.

⁵ AAKOÓ MUNGÚ i kaahi, «Yeremía, kuúng qwaatlór nee muu ana harslaaqát, adór kuúng nee faras tar qwatla'? Kuúng bar an huuhu'uún dír yaamaá hhoohhooe, adór kuúng qwaatlo kar aleesleer baraá darmuú Yordaniro?

⁶ Asma tam hhaeewók, múk doohúnguú kilá', kuúng una geewaqaát. Inooín kuúng un iigahhamitiyá'. Kuúng inooín mi haratlintatiaar tam i axweesanoó tsuúár axweesiia.»

Mungú i gurhamuut as mukós

⁷ AAKOÓ MUNGÚ i kaahi, «Aníng múk dooeé' ugwa sií', aníng mukduú aalir'eé' ugwa geexáw. Mukduú sla'aaruser'eé' ar muuná ugwa haniís baraá dabaá wakuuser'ín.

⁸ Muk'eé' kudá' naa tsawaár ugwa sakií/. Adór dirángw baraá sla/a aníng iga i /orootliyé'. Gawaá adoorihe aníng iga aáhh.

⁹ Muk'eé' kwí naa tsawaár a adór tsir/ór taa harweér bihhe sleémeero nee geenaangw, makaá sla/a ateetang ta burumburiiti as kiwa /ayi.

¹⁰ De'eemuusér yaariir qaymor'eé' ar sabiíbu gaa hhitiín. Daqaari'iimar'eé' nga yaamií kalaa/iyé', qaymor'eé' tidá' hhoohhoo' nga xaanxay tleehhiyé'.

¹¹ Ngina darma tleehhiyé', gár i koon i káhh geeraaeene. Yaamu sleémeero a xaanxaay, slám heé ga gaárií xuú' i kaahh.

¹² Gawaá tlom'aá kwankwaari sleémeero awa baraá xaanxaywo, mukdá' gi hhaamiís naa hardáh, paángár AAKOÓ MUNGÚ i hardát as yaamu ngiwa hhaamis, bartaqá' wa aleeró ay tiqá' hee tumu wák oo waydúr hoót i kaahh.

¹³ Muk'eé' angaáno nguna dahaasiyé', ala gár naa buiyé' a slaamboqáy. Inooín ilakaaharu nguna mak tleehhiyé', ala aqo tawo. Asma buhhtaeé' kudá' xaraasla'a bu'úngw taa sláy a mure.»

Al'axweesantá Mungú dír inslaawoó múk Israeli

¹⁴ AAKOÓ MUNGÚ i kaahi, «Aníng gár ni oo' i deer dír inslaawoó múk Israeli, kudá' yaamaá naa muk'eé' haniís nga hhitine'. Ga/aaweek, Mukwí tlákw aníng un hingeés baraá yaamuuine. Tam múk Yuda un hingeés baraá yaamuuine.

¹⁵ Alaá ngiwa hingemiís in malé gurtláw, umuú xoorooro an ki/ís dirós nee baraá yaamuuwós.

¹⁶ Alaá kaangwí bira waaraáhh, inooín barnaxes alhotaarír muk'eé' kaa intsatsaáhh ar muunuú ló', nee bar lo'o ngaa umuueér /ayiyé' tawa kaahi, ‹Ar adoodá' AAKOÓ MUNGÚ ir hotaatina.› Adoodá' aáng muk'eé' ngura intsaahhatisiyé' lo'o ngiwa /ayiya' ar mungú Ba'ali, daqaní inooín tari hoot baraá tla/ángw muk'eene.

¹⁷ Ala umuúqo xoorór aníng i iiárií qamimaaká, aníng an hingeés nee ngari hhaamiís. Anuú AAKOÓ MUNGÚ tí ngina oó'.»