YEREMIA 11 - Biblía Axweesantá Hhohho' ar Mungú 2004

Yeremia nee alqado

¹ Yeremia axweesantá AAKOÓ MUNGÚ gana axaás i kat,

² «Iia qaaseek daanduú kángw alqadoorihe, múk Yuda nee yaamuloouusér Yerusalemu i axweeseek.

³ Inooín ki beer, AAKOÓ MUNGÚ, Munguú múk Israeli i kaahi, ‹Umuúqo heé axweesantá alqadoorí ga axamisaaká i tsarere'eeti.

⁴ Tidá' naa hara'ayiím dír baabi'iihúng qoomár ngiwa duúx baraá yaamaá Misrír wa alé, baraá asltá muqsla weeqatamiis. Inooín ina báw, afor'eé' iiárií qamimaak, nee tidá' sleémeero naa hara'ayiím tleehhaak. Kuungá' daqaní tari muk'eé', aníng tari Munguúhúng.› »

⁵ Múk Israeli bar adoorí ngaa tleéhh, aníng al'axweesantadá' naa baabi'ii'ín báw an boo/eés, tidá' niwa káh, «Yaamaá diihhooár ilwa nee dane i inooín i haniís adór hám laarí i dirii'iya! Aníng niri oó', ‹Masók an adoosíng, AAKOÓ MUNGÚ.› »

⁶ AAKOÓ MUNGÚ iri báy, kaangwí alki/iteek baraá gixsadaá Yuda sleémeero nee baraá lohdaá Yerusalemuro. Inooín ki beer, «Axweesantír alqado iiárií qaasaak nee ka boo/esá'.

⁷ Asma baabi'iihúng ina ló'wa gurbuú' qoomár ngiwa duúx baraá yaamaá Misrír wa aleeró, nee ana kumamiít nanaqaango ay laarí niwa kah, ‹Afór'eé' iialooeesaak.›

⁸ Tam adoorihe inooín aníng iga iialooeesi'iiká, laqaá iga iiárií qaasi'iiká, ala nina ak buhhiyé' niwa sagagawdúr hootiya'. Gawaá adoorihe aníng inooín in slaáhh ar adór axweesanayduú alqado naa dir'ín i hara'ayiím, kudá' inooín naa si'iyé'.»

⁹ AAKOÓ MUNGÚ iri malé báy, «Múk Yuda nee yaamuloouusér Yerusalemu ta adór warqeemiis ar aníng ir si'iya'.

¹⁰ Inooín tlehhmi'idá' tlakw awa baabi'ii'ín ngina i ki/iyé' tlehhtuuwo, kudá' axweesante'eé' nga si'iye' eeharto. Inooín munguaá hatlá' ngina harahhifiyé' nee ngina sagadiyusiyé'. Múk Israeli nee oo Yuda alqadoodá' aníng naa oó' dír baabi'ii'ín ngaa geexayé'.»

¹¹ Gawaá adoorihe AAKOÓ MUNGÚ i kaahi, «Ga/aawaak, aníng i amotlakweérií huúw ar i baloó kwirhhitiiaaká, tam ni amor'eé' /aa/iia i baloó iiárií qaasaaká.

¹² Naagáy múk gixsadaá Yuda nee yaamuloouusér Yerusalemu tari tláy dír munguiidá' naa ilahhooár mooyángw tsuú' i da/aa/ané', ala munguiidá' inooín ngi ba/amisiaaká baraá slahh'amuine.

¹³ Múk Yuda, munguiihúng ki yaariir adór gixsaduhúng. Nee kiteeraá ilahhooarhúng ki yaariir adór lohdaá Yerusalemu, kudá' taa tlehhé' as mureekesayduú Ba'ali kuwa ilahhooár mooyángw tsuúií da/a/aanda'.

¹⁴ Gawaá adoorihe, kuúng Yeremía, mukwí mu aleefiriirimaar, nee mi alee/aa/amimaar, mi aleefiriimaar, asma aníng i iiárií qaasaaká, tam i ateetia qoomár slahh'amuuine.»

¹⁵ AAKOÓ MUNGÚ i kaahi, «Muk'eé' kudá' naa tsawaár i harína tawa dahi baraá dooeé' bar inooín tlakweema nga tleehhiyé'. Xáy, ngiwa xuiya' al'axweesani nee fu'unaá ilahhooár muruú ta tsu/i slahh'amu ngu hingeesía? Xáy, kaangwí giqo qwal/atísi?

¹⁶ Qoomarkaaro aníng ana oó'. Inooín an xa'anoó seituúnír loo/o naa/, seituúnír hhohho' nee ar mamaá hhohhó' koom. Ala hám daxta ar afór adór kwarara/ár ur xa'anoowí un daá/ ar asla nee haleemiiwós in hhaamiís.

¹⁷ «Anuú AAKOÓ MUNGÚ Aleesleemusmo, kudá' kuugá' naa qaas baraá yaamuuká', amotlakwe ngi gawaahúng i huúw, kuungá' múk Israeli, nee oo Yuda asma tlakweemaadá' taa tlehhé'. Aníng iga buhhtisiyé' as mooyángw tsuú' nguwa da/iyé' dír munguúdá' ta bay Ba'ali.»

Ta adór qoomeemees ar Yeremia kur gaasi

¹⁸ AAKOÓ MUNGÚ aníng ina xu'utís, nee geewaqatuuín kudá' nguri laqán.

¹⁹ Ala aníng an adór deelmoó bee/i kudá' tsatsa'aár oo ta gaasár ay. Aga xuiiká adór aníng tir gaasár wa slaá', tawa kaahi, «Xa'anoowí u hhitiimaán dinkwa nee mamuuwose. Un amór saáwií kwahhaán baraakaá yaamaá múk slafa. Umuuwós mukuwa baloó insláy malé alé.»

²⁰ Ala aá AAKOÓ MUNGÚ Aleesleemusmo, kudá' sakwasleema ga adór ganaá'ár tleéhh. Kuúng munér muu nee fuqureeri'ine in tsee/aariín. Aníng masók an ár adór kuúng li/aywí ugwa bú', asma aníng umuú gaaro ngaa gawaá dabaawógií qaás.

²¹ Gawaá adoorihe AAKOÓ MUNGÚ i kaahi daanduú múk Anatotiro, kudá' slafiingók ngu leelehhiitá', nee kaahá', Ma aaririmaar ar umuú AAKOÓ MUNGÚ, bar adooriheeká u gaasaán ar dabaarén.

²² Gawaá adoorihe AAKOÓ MUNGÚ Aleesleemusmo i kaahi, «Ga/aaweek, aníng inooín i muúx, masoombar'ín ka hhaamiis ar paánga, daaqay'ín nee dasuuwo giyeé gi tsú/.

²³ Kurkú inooín ngiwa hhaamiis birna hardáh, aníng amotlakwe an huúw gawaá múk Anatoti, hee tumu wák oo meét i kaahh.»