YEREMIA 10 - Biblía Axweesantá Hhohho' ar Mungú 2004

Sluufmisuú ló' nee oo lama

¹ Kuungá' múk Israeli, axweesantá AAKOÓ MUNGÚ ni dirhúng i kaahi iiárií qaasaak.

² AAKOÓ MUNGÚ i kaahi, «Tlehhma'aá xoordaá hatlá' mi intsaatsahhaara', laqaá mutunduwa amoqwareemiís nee layaá gawaá doorí wa tleehharumiitá', asma layuudá' xoordaá hatlá' ngin amoqwareemisiyá'.

³ Asma alhotaarír xoordaá hatlá' a al/ayma, hee xa'ano gun tsaat baraá sla/atá wa aleeró, kuri daakw ar tsawo nee heé dakór xuú'.

⁴ Naagáy slaqsaydá' kuri parootuus ar peésa nee sahaábu, kuri kaka/aamií slaahh as miwa huú'.

⁵ Slaqsi'ii'ín a adór inqwaarír xooyaangw gusisiingw baraá qaymooro, i axweesiaaká, aqo kin loohiis asma i hi'iimitiaaká. Slaqsi'iiká' mi da'ayumitaara'. Inooín hee gár tlaakw ngway tleehhiya' i káhh, tam ar hhoo' ngway tleehhiya' i káhh.

⁶ Aá AAKOÓ MUNGÚ, oo adór kuúng i kaahh tumu wák, kuúng tu úr, umuuwók i /uuruú kón.

⁷ Aá waawutmoó xoordu, oo kuúng u ilaiwawa/aaká a heemá? Asma kuúng an hariín tuwa ilaiwawa/i, oo sagaloó' adór kuúng i kaahh baraá xoorduuwo, tam baraá waawuti'iima sleémeero.

⁸ Inooín sleémeero ki iimibo/ nee a daktana, asma slaqsi'iidá' a xaa'aá tawo.

⁹ Slaqsi'ii'ín kuká' kina parootuús ar peésár Tarshishír daahh, kina parootuús ar sahaábuú Ufasír daáhh. Gaarí an gadiyér kareeruú kwahho ga xuú', nee múk sahaábuú kwahhuút. Kaa tlabaá sirbó/ií dahaás nee awa sirda/aten, kudá' taa tleéhh ar daba'.

¹⁰ Ala AAKOÓ MUNGÚ an Munguú ló', a Munguú slaáf, waawutmoó alhhe'eesay wásl, bira buúhh yaamu in daaraxaatiyá', xooro buhhtaawós saqitluuwo gi aleesleeraaká.

¹¹ Naagáy ki beera', «Munguaá doori nee yaamu nga tlehhi'iiká i hhaná'. Inooín kin hhaamiis baraá yaamuwo.»

Daa'ángw xirfayemisuú Mungú

¹² AAKOÓ MUNGÚ yaamu gina tleéhh ar /uuruuwós, ar sagalooaarose yaamuuká' gina gawdeés, ar fuquraangose doori gina hhaáf.

¹³ Qoomár inós birna ilawaáts ma'aá gawaá doori in xuuru'utiyá'. Inós tlaangú gun duxún baraá ku/iyá yaamú wa alé. Inós mankari gan war'eemiis qoomár tluwaywo. Nee fur'a ni ti'imít baraá kuuntaywós wa aleeró.

¹⁴ Umuúqo heewo ku iimiboó/ nee i fuqurángw konká. Umuúqo kareeramoó sahaábuú kwahhuuta ku mureekees nee slaqsi'iiwós kudae, asma slaqsi'iidá' a lamtá tawo, i slafíngw kon'aaká.

¹⁵ Inooín an muruú tawo, gadiyer'ín a al/aymár tawo, qoomár birka slahhtá áy i hhaná'.

¹⁶ Ala Munguú Yakobo a adór slaqsi'iikaeeká, asma inós umuú gaaro gana tleéhh, nee múk Israeli guna tsawaár tawa xooroorós. Umuuwós an AAKOÓ MUNGÚ Aleesleemusmo.

Loohaay i hi'iit

¹⁷ Kuungásingá' taa harweér, xosluuhúng burumburaak.»

¹⁸ Asma AAKOÓ MUNGÚ i kaahi, «Ga/aawaak, qoomaarihe aníng yaamuloouusér yaamuuká' an tsee/áy kwaáhh ar kukumaayi. Aníng i slahh'amií huúw as inooín tawa slahhaahhai.

¹⁹ Múk Yerusalemu tari ooi, ‹Tsaxwaarén asma slahh'amuurén inkahhi'iirén i ló'wa gon'eeliná'.› Atén geeraawo ana mak ooaán, ‹Gaarí an slahh'amuú tawo oo ta saqiitlaan.

²⁰ Ala heemadurén kaa feé/, him'eedá' kira tsegiít kaa tlaáq. Na/iirén kira tláy sleémeero, oo taa geexáy tumu wák i kaahh, oo heemaduurén gi male tleéhh. Nee oo inqwaruuduú gawaá pa/eeri gu ki/ís i kaahh.› »

²¹ Anuú Yeremia niri oó', «De'eemuuse a daktu'uumít. Inooín AAKOÓ MUNGÚ ngu firirina'aaká. Gawaá adoorihe slaasláwár i slaya' i káhh. Bee/angw'ín sleémeero aa qaroó diyaaya/aát.

²² Iia qaasaak, afo taa i hardát, tsimaahhír xoorór yaamaá /iikú daahh ni hardát, gixsadaá Yuda giri xaanxay tléhh, tari dír hotángw intsaawe.

²³ Aá AAKOÓ MUNGÚ, aníng a xuú', heé slafiingós baaliro gu aleesláw i kaahh, tam heé hotaawós gi geerahaár i kaahh.

²⁴ Aá AAKOÓ MUNGÚ, aníng qwatsáng ar adór ganaa' ala ar buhhtawooká, as kahhó' mawa qwaár.

²⁵ Daa/atúw buhhtaawo daanduú xoordaá kuúng u xua'aaká, nee gawaá kudá' umuuwók ngu ateetima'aaká. Asma inooín múk Yakobo nguna tsu/iyé', nguna tsu/iyé' ngway hhaamiisiyé', yaamuuín ngiri taanguyé'.»