Yakobo 3 - Biblía Axweesantá Hhohho' ar Mungú 2004

Tsifraangw

¹ Hhaee'eé', múk yaariír baraahunge matawa intsaahhatuuse tleehhimiít, asma a xuá' adór ateéká' intsaahhatuuse sakwasleemarén kar ló'wa úr ta tidár múk hatlae.

² Asma atén sleémeero a dakumaamisaán baraá muruú yaariire. Heé dakumiisaaká baraá axweesanto, inós a heé ganaá', a heé slaqwtós sleémeero ila/aro ga aleesláw, nee geeraharto.

³ Atén taqeesamaá faras in tsegiitaán ar him'e kahhó' geeraharu'uumarén ngiwa iialooeesiya', as adoorí atén slaqooín sleémeero warqeesaro i aleeslawaán.

⁴ Slám malé alé miringamoó úr ga/aawaak, ala tam ku ure, nee tam ku huwahuwi nee fur'ár xaraasla, ala ku aleesláy warqeesaro nee xooslmoodá' niiná oo madit amoodár geeraharusmo ngur slai huwto.

⁵ Tsifraangw sleeme an adoorí. Inós tam xooslmoó niinawe, ala muruú inós tir xirfeemisi ku ló'wa urén. Qaytsité' tsitiito'ór niina ar asla adór gartá ló'wa ur ngir ohaahiin.

⁶ Nee tsifraangw a adór asla. Inós a adór yaamaá naa hatsiye' tlakweemaawo. Inós i baraá slaqoorén i dirii', an kudá' slaqwa sleémeero ga tlakweemár a'áw, slafiingw sleémeero guri asltí oohiis, nee inósuú kilá' asltós amór i dahh a baraá asltá daqisleém.

⁷ Asma umuúqo makaá dimbadimbehe, nee tsir/o, nee ya'aawasle nee makaá baraá tlawtí diriiá', de'eengo ki aleesláy, slám kaa qaroó de'én nee muu.

⁸ Ala heé tsifraangw de'eengo gu aleesláw i kaahh. Inós a adór tlakweemaá lakiita'aaká, inós aa haáts qarkwá gwa'arár huwahuwa.

⁹ Atén Mungú, kudaáduú Aako nee Baabá, un diidi'iimisaán ar tsifraangwí. Slám ar tsifraangwí oo kilae mukdá' taa tleéhh ar slaqsoó Mungú un lu'umisaán.

¹⁰ Gawaá afkwihe gár ti'imiit a tsuuqa nee lo'o. Gawaá adoorihe hhaee'eé', muruú adór kwí miwa tleehharuút.

¹¹ Kutli i káhh ar ma'aá tsuuá' duxuum, iri ma'aá qarqará' dúx sleeme didá' wák wa ale.

¹² Hhaee'eé', /aantsí i deéro ar mamaá seituúni gi laqwaal? Laqaá xa'anoó sabiíbu i deéro oo /aantsí ga laqwaál? Gawaá adoorihe sleeme kutltá ma'aá diwtá koom, ma'aá tsuuá' ngi duxká.

Sagalooár gáwtá daahh

¹³ Baraá tla/angwhunge heé sagalooár koóm nee oo xu'utír koóm i deéro? Ala bir deer, inós gár kuwa hariím in hoot ar hotaá hhohho', nee sagalooarós ngi laqan ar tlehhemi'i, ar tsatsa'areemaadá' baraá sagalooár dahhá'.

¹⁴ Ala kuungá' barnaxes da/itá tlarara/aay a koondá' baraá munerhunge, nee barnaxes ti kiloohúng sla'á', ma daara/aamara' tiwa kiloohúng xirfayeemisa', lama kari tsatá' daanduú looeema.

¹⁵ sagalooarí a tidá' naa gawaá doorí wa awetká, ala a tidár baraá yaamu, ar qeeruuwooká ala ar Neetlaangw.

¹⁶ Asma didár da/i iwa deér, nee muu tiwa kilooín slai, tlaahhi i kahhká, nee umuúqo tlehhema'aá tlakw i dayá' didaádae.

¹⁷ Ala sagalooadá' gawaá dooraá daahh a adoorí, gár geera ka hhoohhoo'. Slám i wayduú koón, nee ka tsatsa'aar. Nee slám axweesanoó muu gu huwaahúp. Nee slám fola i kaahh dirose, laqaá hhaahhafiingw.

¹⁸ Mukduú loo/ír qamiím ar wayda, gadiyér'ín gár i huwahup a gan'amu.